Media-icmal 09.04.21

Rayonlarda kredit faizlərinin Bakıdan yüksək olması, minalarla bağlı Qarabağdakı vəziyyət, Bakıda saxlanılan erməni yaraqlıların Ermənistana qaytarılmaması, elmi ad almaq üçün prosedurların səmərəsizliyi və s. məsələlər medianın aparıcı mövzuları sırasındadır. 

“Bizimyolinfo.az”  saytı  “Rayonlarda ağlasığmaz kredit faizləri: “Mərkəzi Bank niyə pul qazanmağı hədəfləməlidir…” sərlövhəli məqalədə rayonlarda əhaliyə verilən kredit faizləri barədə danışılır.

Müəllif  bildirir ki, nə qədər təəccüblü olsa da rayonlarda kredit faizləri Bakıdakından 2 dəfə çox imiş, özü də bankların ən yüksək kredit faizləri Füzuli, Ağdam və Tərtər rayonları olmaqla Yuxarı Qarabağ iqtisadi rayonundadır.

İqtisadçı Nemət Əliyev isə bunu anormal vəziyyət adlandırır, faiz dərəcələrinin səviyyəsinə görə Mərkəzi Bankın rolu olduğunu bildirir.

 “Belə aydın olur ki, regionlarda faiz dərəcələri daha yüksək imiş. Əslində isə Bakı ilə müqayisədə faiz dərəcələri daha aşağı səviyyədə olmalı idi” deyə ekspert vurğulayır.

Onun deməsinə görə, bankların region əhalisindən topladığı, səfərbər etdiyi maliyyə vəsaitlərinin də çəkisi çox azdır, bu isə əhalinin sosial vəziyyətinin, maliyyə imkanlarının hədsiz dərəcədə aşağı olmasının göstəricisidir.

N.Əliyevə görə, bu vəziyyət kommersiya banklarının öz istədiklərini bu şəkildə ortaya qoyur: “Bankların tətbiq etdikləri faiz dərəcələri sosial sarsıntılar içərisində yaşayan region əhalisinin vəziyyətini bir az da ağırlaşdırır. Əhalinin mövqeyinə, düşüncəsinə, sosial vəziyyətinə görə məsuliyyət daşıyan hökümət, birmənalı şəkildə o xətti tutmalı idi ki, faiz dərəcələri aşağı düşsün”.

“Redaktor.az” saytı isə "Qarabağda minalarla bağlı vəziyyət ağırdır" – hərbi ekspert”  sərlövhəli məqalədə işğal dövründə erməni tərəfin Qarabağ torpaqlarını minalamasını şərh edir.

Müəllifin fikrincə, müharibələr tarixinin ən acınacaqlı statistikalarından biri mülki şəxslərin minalardan əziyyət çəkməsidir və beynəlxalq təcrübəyə əsasən münaqişələr bitdikdən sonra əksər hallarda minalı sahələrin xəritələri qarşı tərəfə təqdim edilir, Ermənistan isə 30 ilə yaxın müddətdə işğalda saxladığı Azərbaycan torpaqlarının minalanmış xəritələrini nəinki təhvil vermir, hətta bu ərazilərdə hərbi təyinatı olmayan torpaqları belə minalayıb.

Hərbi eksapert Ramil Məmmədli birmənalı olaraq Ermənistan tərəfin minaladığı ərazilərin xəritəsini Azərbaycana heç vaxt verməyəcəyini bildirir,

“Birinci Qarabağ Müharibəsində, ümumiyyətlə, minalanmış ərazilərin xəritəsi yox idi, bəzi ərazilər hələ birinci müharibə zamanı minalanıb. Hesab edirəm ki, bu məsələ beynəlxalq hüquq səviyyəsində həll olunmalıdır. Vəziyyət getdikcə daha da gərginləşir, mina təmizləmə prosesi çətinləşir”, ekspert bildirib.

Onun fikrincə, vəziyyət daha da gərginləşməmiş Azərbaycan tərəfi beynəlxalq hüquq çərçivəsində məsələnin həllinə çalışmalıdır, əks halda Ermənistanın hansısa humanist addım atacağını gözləmək inandırıcı deyil”, -ekspert bildirib.

“Müsavat.com”  saytı isə “Bakıdan İrəvana uçan təyyarə Ermənistanı qarışdırdı-erməni terrorçular qaytarılmadı” sərlövhəli məqalədə aprelin 8-də İrəvandan Bakıya gələn təyyarənin yenidən İrəvana boş qayıtması şərh olunur.

Söhbət ondan gedir ki, İkinci Qarabağ Müharibəsilə bağlı hərbi əməliyyatlar dayandırıldıqdan bir ay sonra Azərbaycan tərəf Hadrut yaxınlığında silahlı  erməni dəstəsini saxlayıb. Azərbaycan tərəf onlara təxribatçılar deyir, erməni tərəf isə onları hərbi əsirlər adlandırır.  

Dünən, aprelin 8-də Rusiya sülhməramlılarının komandanı Rüstəm Muradov Bakıya gələrək həmin şəxsləri Ermənistana aparmağa ümidli olub, amma təyyarə Bakıdan İrəvana boş qayıdıb.  

Musavat.com xəbər verir ki, bununla bağlı erməni mediası məlumat yayıb, hətta  “Azatutsyun” radiosu və İctimai Televiziya “Erebuni” aeroportundan canlı yayım veriblər. Bu zaman “əsirlər”in yaxınlarının hava limanına toplaşdığı aydın olub. Daha sonra məlumat yayılıb ki, təyyarə boş enib və ardınca canlı yayım dayandırılıb.

Xatırladaq ki, Ermənistanın baş naziri Nikol Paşinyan Rusiya prezidenti ilə bu günlərdəki görüşündə də Azərbaycanda həbsdə saxlanılan erməni terrorçuların – onları “hərbi əsir” adlandırıb, azad olunması zərurətindən bəhs edib və Putindən kömək istəyib. Azərbaycan isə dəfələrlə bəyan edib ki, hərbi əsirlər son nəfərinədək İrəvana qaytarılıb, saxlanılanlar 10 noyabr bəyannaməsinin imzalanmasından sonra Azərbaycan ərazisinə keçən və Qarabağda cinayət törədən terrorçulardır.

“Konkret.az” saytı  “Azərbaycanda elmlə məşğul olanlara işgəncə verilir” sərlövhəli məqalədə ölkədə elmi ad almaq üçün prosedurların səmərəsizliyinə dair professior Vaqif Sultanlının düşüncələrinə yer verilib.

Onun deməsinə görə, dünyanın heç bir qitəsində elmlə məşğul olan insanlara Azərbaycandakı qədər “işgəncə” verilmir.

Vaqif Sultanlı deyir ki, mövzunun kafedrada, Elmi Şurada, Koordinasiya Şurasında təsdiqi bir ilə qədər vaxt aparır, bunun üçün təxminən 10 səhifəlik plan-prospekt deyilən gərəksiz sənəd hazırlanır.

Dissertasiya yazılandan sonra ilkin müzakirə, seminar müzakirəsi, açıq müdafiə keçirilir.

Onun deməsinə görə, bu prosedur bəzən iki-üç il vaxt aparır,  əksər hallarda formal xarakter daşıyır, disertantı haldan salır, hər bir müzakirə üçün müxtəlif rəylər və müdafiə zamanı rəsmi opponentlərin rəyi, iki dildə avtoreferat tələb olunur.

Vaqif Sultanlı əlavə edir ki, müzakirələr və müdafiə prosesi videoya çəkilir, daha sonra kağıza köçürülərək təsdiqlənir, dərc olunan məqalələrin əsli, surəti, elektron versiyası tələb olunur.

O, yazılan avtoreferatların keçmiş sovet respublikalarına göndərilməsinə də  narazılıq bildirir: “Avtoreferatlar Türkiyəyə, Avropaya, Amerikaya deyil, nədənsə elmi mühitin dağıldığı keçmiş sovet respublikalarına göndərilir.

Professor  deyir ki, müdafiə bitəndən sonra Ali Attestasiya Komissiyasında “ikinci cəbhə” açılır, bütün “işgəncə prosesi” az qala yenidən təkrar olunur.

Onun deməsin görə, olur ki, Ali Attestasiya Komissiyasında işə baxılma prosesi heç bir səbəb göstərilmədən bəzən illərlə uzadılır, bu quruma təqdim olunan sənədlərin həcmi bəzən dissertasiyanın həcmindən iki-üç dəfə çox olur.