Media-icmal 10.03.21

Bayram öncəsi qiymət bahalığı iddiaları, sərt karantin rejiminə qayıdışın olub-olmamasına baxış,  İkinci Qarabağ Müharibəsində qazanılmış qələbə və s. məsələlər medianın aparıcı mövzuları sırasındadır.

“Bizimyolinfo.az” saytı “Bahalaşma davam edəcək: “Bazar iqtisadiyyatı deyil, məmur iqtisadiyyatıdır” sərlövhəli məqalədə qiymət bahalaşması müzakirə edilir.

İqtisadçı ekspert Natiq Cəfərli deyir ki, uzun illərdir ki, topdansatış bazarında qiymət diqtəsi  hökm sürür, buna görə də tələbat artan vaxt, yəni bayramlar öncəsi Azərbaycanda qiymətlər sürətlə artır.

Ekspert deyir ki, Azərbaycanda uzun illərdir ki, noyabr ayının sonundan başlayaraq, aprel ayına qədər qiymət artımı müşahidə edilir, özü də bu yeni il bayramı, Novruz bayramı qabağı sürətlənir.

Səbəb isə budur ki, məhsulların saxlanılması üçün infrastruktur o qədər də ürəkaçan deyil, həcm artdıqca logistik və digər xərcləri nəzərə alsaq, qiymətlərin yüksəlməsinin şahidi oluruq.

Daha bir səbəb isə Azərbaycanda topdansatış bazarında çox az sayda oyunçuların olmasıdır, yəni ölkəyə mal gətirən, hətta ölkə daxilində mal istehsal edən şirkətlər barmaqla sayılacaq qədərdir, üstəlik, qeyri-rəsmi inhisarçılıq mövqeyində dururlar.

İqtisadçının sözlərinə görə, təəssüf ki, proqnozlar qiymət artımının mart ayı ilə yekunlaşmayacağını göstərir.

N.Cəfərli deyir ki, bəzən məmurlar, deputatlar süni qiymət artımından danışırlar, burada da maraqlı bir məqam var: “Əgər Azərbaycanda bazar iqtisadiyyatıdırsa, süni qiymət artımı ola bilməz. Yox,  əgər süni qiymət artımı varsa, onda bazar iqtisadiyyatı deyil, məmur iqtisadiyyatıdır”.

“Yenisabah.az” saytı “Qırmızı xətti” keçsəydik, əsas üstünlüyümüzü itirə bilərdik - sabiq nazirdən sensasion açıqlama” sərlövhəli məqalədə isə İkinci Qarabağ Müharibəsnə son verən 2020-ci il 10 noyabr üçtərəfli bəyanatından ötən dördaylıq dövrü keçmiş xarici işlər naziri Tofiq Zülfüqarov şərh edir. 

T.Zülfüqarov öncə baş verənlərin əvvəlcədən “planlaşdırılmış olması, yoxsa əksinə sualına cavab verərək deyir: “Səmimi olsaq, burada birinci variantın da əlamətləri var. Eyni zamanda keçmiş nazirə görə, elə hadisələr var ki, onları əvvləcədən planlaşdırmaq, sadəcə, mümkün deyil: “İkinci variantın xeyrinə belə nümunələr çoxdur, amma bunlar Ermənistanda və Azərbaycanda birinci variantın tərəfdarlarının rəylərinə təsir etmir.

T.Zülfüqarovun deməsinə görə, Azərbaycan və Ermənistan rəhbərlikləri hələ hərbi əməliyyatlar başlayana qədər tərəfdaşları ilə məsləhətləşiblər, pozulması tövsiyə edilməyən “qırmızı xətləri” müəyyən ediblər. 

Keçmiş nazirin şərhinə görə, Azərbaycan qoşunları Xankəndini, Xocalını alardı, amma Rusiyanın “neytrallığı”nın olmaması şəraitində Ağdam, Laçın, Kəlbəcər uğrunda uzunmüddətli və qanlı döyüşlər aparmalı olardı.  

T.Zülfüqarov deyir ki, əgər Azərbaycan “qırmızı xətti” keçsəydi əsas üstünlüyünü mənəvi cəhətdən düzgünlüyünü, Qarabağda olan suveren haqlarının hüquqi əsasını itirmiş olardı.

“Azpolitikainfo.az” saytı isə “Sərt karantin rejiminə qayıdış? - "İmkan versinlər, camaat bayramı keçirsin...” sərlövhəli məqalədə professor Adil Qeybulla Azərbaycanda COVİD-19 pandemiyası ilə bağlı vəziyyəti dəyərləndirir.

Müəllifin deməsinə görə, ölkədə vaksinasiya prosesinə bir aydan çox start verilsə də proses ləng aparılır, bu da media və sosial şəbəkələrdə tənqidlərə səbəb olur.

Müəllif deyir ki, son günlərdə infeksiyaya yoluxma halları artıb, bu isə əhali arasında mart ayının 15-dən sonra SMS icazə rejiminə keçiriləcəyi, kafe-restoranların, ticarət mərkəzlərinin bağlanacağı haqda söz-söhbətin yayılmasına səbəb olub.  

Professor Adil Qeybulla isə yoluxmaya dair son günlərin göstəricilərinə əsasən sərt karantin rejiminin tətbiq oluna bilməsi yanaşmasını doğru saymadığını bildirir. Onun fikrincə. epidemoloji vəziyyət belə davam etsə hər hansı qadağanın tətbiqini doğru hesab etmir. 

“Heç olmasa imkan versinlər, insanlar bayramı keçirsinlər. Düşünürəm ki, yoluxma sayı indiki kimi qalsa bir problem olmayacaq”, - A.Qeybulla  bildirir.

Bununla belə A.Qeybulla hesab edir ki, vətəndaşlar məsafə gözlənilməsi, maska taxılması, gigyena qaydalarına əməl olunması qaydalarına əməl etməli, vaksinasiya prosesinə xüsusi diqqət ayırmalıdırlar.