Media-icmal 10.06.20

Ölkə regionlarının inkişafı, polis-vətəndaş münasibətləri, virusa yoluxmanın gizlədilməsinin səbəbləri və s. məsələlər medianın aparıcı mövzuları sırasındadır...

Rəsmi "Azərbaycan" qəzeti "Heç bir maneə regionların inkişafını ləngidə bilməz" sərlövhəli məqalədə ölkə bölgələrinin inkişafını dəyərləndirir.

Müəllif dövlət başçısının vaxtaşırı ölkənin müxtəlif bölgələrinə səfərlərini vurğulayaraq, bunu bölgələrin inkişafının diqqət mərkəzində saxlanması kimi qiymətləndirir.

"2004-cü ildə regionların sosial-iqtisadi inkişafına dair ilk dövlət proqramının qəbul edilməsindən bugünədək icra olunan dörd proqram sayəsində regionların sosial-iqtisadi siması tamamilə dəyişmiş, bölgələrdə iri sosial-iqtisadi müəssisələrlə yanaşı, kiçik və orta obyektlər fəaliyyətə başlamış, yeni iş yerləri açılmış, əhalinin iqtisadi fəaliyyəti canlanmışdır", deyə müəllif əlavə edir.

Bu inkişafı Tərtər rayonunun simasında təqdim edən müəllif deyir ki, rayonda qazlaşdırmanın səviyyəsi 98 faizə çatıb, yolların 80 faizi əsaslı təmir olunub, infrastruktur layihələri həyata keçirilib, su problemini həll etmək məqsədilə bugünədək 72 subartezian quyusu qazılıb, əlavə 21 subartezian quyusunun qazılması da nəzərdə tutulub.

Müəlllif deyir ki, rayonun fasiləsiz elektrik enerjisilə təmin olunması üçün 110/35/6 kilovoltluq "Tərtər" elektrik yarımstansiyasının yenidən qurulmadan sonra açılışı olmuşdur. "Azərxalça" Açıq Səhmdar Cəmiyyətinin Tərtər filialının açılışı edilib.

Müəllifə görə, proqram başa çatanadək bölgələrdə, o cümlədən də Tərtərdə hələ yeni sosial-iqtisadi obyektlər tikilib istifadəyə veriləcək.

"Yeniavaz.com" saytı "Taleh Yüzbəyov: Polis bizdən qisas almalı deyil" sərlövəhli məqalədə isə polis-vətəndaş münasibətlərinin səviyyəsindən bəhs edilir.

Aktyor Taleh Yüzbəyov bu münasibətləri iyunun 7-8-də Bakının Yasamal rayonu, Dadaş Bünyadzadə küçəsi 13 saylı ünvanda baş vermiş hadisələr fonunda dəyərləndirir.

Müəllif deyir ki, Azərbaycanda koronavirus pandemiyası aşkar olunandan bu yana ən çox zəhməti olan qruplardan biri polisdir: "Gecə-gündüz gücləndirilmiş rejimdə işlədiniz. Haqqınızda qəşəng sosial çarx da çəkildi. Amma gəlib karantinin sonunda öz kameralarınızla çəkdiyiniz "sosial çarxlarla" niyə bütün əziyyətinizi məhv eləyirsiniz?!".

Qeyd edilən tarixdə baş vermiş hadisədə bəzi vətəndaşların polisə qarşı hərəkətinin düzgün olmadığını deyən müəllif saxlanılan vətəndaşlara polisin qanundankənar addım atmasının da yolverilməz olduğunu vurğulayır. "O adamlar qanunu pozmuşdu və düz eləməmişdilər. Siz də o adamlar kimi elədiniz. Vətəndaş qanunu pozanda bu bütün vətəndaşların adına ləkə gətirmir. Amma eləyən polisdirsə, bu, hamınızın adına yazılır".

Müəllifə görə, polis vətəndaşı qorumalıdır, qorxutmalı deyil. Siz bizim haqqımızı bərpa etməlisiniz, bizdən qisas almalı deyilsiniz. Vətəndaş qanunu poza bilər, amma polis pozmamalıdır".

"Yeniçağ.az"da yer alan "İnsanlar koronavirusa yoluxduğunu niyə gizlədir?" sərlövhəli məqalədə müəllif problemin səbəbləri barədə sosioloq Əhməd Qəşəmoğlu ilə söhbətləşir.

Sosioloqa görə, bu xəstəliyin gizlədilməsi səbəblərini bu virusa yoluxan vətəndaş müxətlif hallarla izah edə bilər.

Onun sözlərinə görə, bu virus getdikcə həyatımıza daha çox daxil olmağa başlayır. Yaxınlarımız, doğmalarımız arasında bu virusdan dünyasını dəyişənlər də var. İnsanlar bilir ki, bu virus yoluxucudur. Buna görə də yoluxduğunu gizlədir. Ümumiyyətlə, ənənəvi olaraq hər zaman yoluxucu xəstəlikdən əziyyət çəkən insanlar bunu digərlərindən gizlətməyə çalışıblar".

Ə.Qəşəmoğlu əlavə edir ki, adi zökəm, qızılca xəstəliyi də youluxucudur, amma insanlar yoluxanda, bunu açıq şəkildə deyirlər, çünki kütləvi şəkildə yayılıb. Koronavirus barədə isə ətraflı bilgiyə malik deyilik və yeni yayılmış bir virusdur, buna görə də gizlədilir.

Sosioloq vurğulayır ki, belə insanlar düşünürlər ki, yoluxmanı açıqlaması gələcəkdə ailə qurması proseslərinə kimi hər şeyə mane ola bilər, odur ki, çarəni bu xəstəliyin olmasını gizlətməkdə görürlər. 

Ə.Qəşəmoğluna görə, çıxış yolu əhali arasında maarifləndirmə işinin gücləndirilməsindədir: "Bu virusla bağlı ictimai rəyi formalaşdırmaq lazımdır ki, xəstəliyin simtompları necə inkişaf edir, immuniteti yüksək olan insanların virusa yoluxmaq riski nə dərəcədə azdır, virusa yoluxan adamların yüzündən bir-ikisi dünyasını dəyişir və s. Bu virusdan sağalma ehtimalı da çox böyükdür. Sağalandan sonra başqaları üçün təhlükəli deyil".