Media-icmal 11.08.20

Ölkədə içməli su ilə bağlı vəziyyət, kirayə evlərin qiymətlərinin ucuzlaşmaması,  qəbul imtahanlarındakı suallara baxış, dövlət müəssisələrinin özəlləşdirilə bilməsi imkanları və s. medianın aparıcı mövzuları sırasındadır.

"Azərbaycan" qəzeti "Bir daha içməli su haqqında" sərlövhəli məqalədə ölkədə içməli su ilə bağlı vəziyyəti dəyərləndirir. 

Müəllif deyir ki, içməli su məsələsi daim dövlətin diqqət mərkəzində olub, bununla bağlı 2004-cü ildən bu yana çoxsaylı layihələr icra edilib: "Ölkənin şirin su ehtiyatlarının azlığı, son illərdə müşahidə olunan qlobal iqlim dəyişikliyi və orta temperaturun yüksəlməsi, əsasən qonşu ölkələrdən daxil olan yerüstü su ehtiyatlarının, çaylarda sululuğun və yağıntıların xeyli azalması ortaya bir sıra problemlər çıxarır", deyə müəllif  bildirir.

Müəllif əlavə edir ki, içməli su ilə fasiləsiz təminat məsələsi bu il iyulun 23-də dövlət başçısı İlham Əliyevin keçirdiyi müşavirədə də müzakirə mövzusu olub və müşavirədən bir neçə gün sonra yeni su kəmərlərinin çəkilməsi və s. ilə bağlı sərəncamlar imzalanıb.

 Həmin görüşdə Oğuz-Qəbələ-Bakı su kəmərinin, ölkənin müxətlif regionlarında su anbarları qurulmasının əhəmiyyəti vurğulanıb: "Regionlarda digər su anbarları da inşa edilib, subartezian quyuları qazılıb. Əksər şəhərlərdə içməli su və kanalizasiya layihələri icra olunub. Cəmi bir neçə şəhər qalıb ki, orada bu işlər hələ tamamlanmayıb, lakin davam etdirilir.

Amma müəllif vurğulayır ki, bu və digər layihələr uğurla həyata keçsə də, əsas hədəf ölkə əhalisini 100 faiz keyfiyyətli içməli su ilə təmin etməkdir.

Müəllifə görə, bu sahədə bəzi problemlər obyektiv səbəblərə bağlıdırsa, bəziləri  təchizat prosesində buraxılan bir sıra səhvlərdən qaynaqlanır, odur ki, su itkilərinin qarşısı qəti surətdə alınmalıdır.

"Yenisabah.az" saytı "Tələbə yox, turist yox, Bakıda kirayə evlər niyə ucuzlaşmır?" sərlövhəli məqalədə verilən suala əmlak ekspertləri ilə cavab axtarır.

Müəllif son illər Azərbaycanda evlərin qiymətində davamlı artım müşahidə olunduğunu deyir. Həm də əlavə edir ki, pandemiyanın iqtisadiyyatı, turizmi və s.  vurduğu kimi mənzil bazarını vuracağı da ehtimal edilirdi, amma əksinə oldu, kirayə evlərin qiymətində heç bir azalma olmadı.

Əmlak məsələləri üzrə ekspert Ramil Osmanlı deyir ki, şəhərin mərkəzi hissəsində gündəlik kirayə evlərin bahalaşması müşahidə edilir. Mərkəzdən kənar olan ucuz evlərin qiymətlərində hər hansı artım müşahidə olunmur. 

Ekspertə görə, qarşıdakı dövrdə bazara müraciət kəskin artsa və ya pandemiyadan sonra tədris müəssisələrinin fəaliyyəti bərpa olunsa qiymət artımı qaçılmaz olacaq.

R.Osmanlı deyir ki, hələ ki, kirayə mənzil bazarında ciddi bir dəyişiklik müşahidə edilməyib, qiymət artımı daha çox kirayə bağ sahələrində baş verib:

Ekspert deyir ki, bu, karantin rejimlə bağlı məsələdir, insanlar yaşayış yeri seçərkən fərdi yaşayış evlərinə daha çox üstünlük verirlər.

Ekspertə görə, qarşıdakı dövrlərdə vəziyyətin necə olacağını demək tez və çətindir, bu prosesləri tam şəkildə təhlil etmək növbəti ilin əvvəlində mümkün olacaq".

"Redaktor.az"da "Bu il qəbul imtahanlarında test tapşırıqları daha asandır? - ekspert rəyi" sərlövhəli məqalədə bu ilki buraxılış imtahanlarındakı suallar ekspertlərlə müzakirəyə çıxarılır.

Müəllifin sözlərinə görə, müəllim və abituriyentlər buraxılış imtahanındakı sualların çətinliyindən şikayətçidirlər və bu, əsasən riyaziyyat fənninə aiddir.

"Bildirirlər ki, Bakı ərazisində imtahan verənlər üçün riyaziyyat sualları çox çətin, rayonlarda isə asan olub. Müəllim və abituriyentlər qəbul imtahanında da bu halın baş verəcəyindən narahatdırlar. 

Təhsil eksperti Kamran Əsədov isə bildirir ki, tədris prosesinin uzunmüddətli dayandırılması şagirdlərin imtahan nəticələrinə ciddi təsir göstərib. 

Onun fikrincə, mart ayından etibarən tədris prosesinin dayanması şagirdlərin hazırlıq kursları və repititor fəaliyyətinin imkanlarından məhrum olması onların qəbul imtahanlarının nəticələrinə birbaşa təsir göstərib.

Maksimum 300 bal toplamaq nəticəsini neçə nəfər göstərə bilib: "Bunun bir neçə səbəbi var. Birincisi dərslərin mart ayından etibarən dayanması, hazırlıq kurslarının və repititor fəaliyyətinin qadağan edilməsi, şagirdlər üçün sınaq imtahanlarının keçirilməməsi, teledərs və virtual dərslərin əlçatan və keyfiyyətli olmamasıdır".

K.Əsədov da təsdiq edir ki, abituriyentlər 6 aydır ki, normal bilik əldə edə bilmirlər, amma indiyədək keçirilən imtahanlarda riyaziyyatdan verilən suallar çox çətin olub, odur ki, test tapşırıqları müəyyən qədər sadələşdirilməlidir.

K.Əsədov hesab edir ki, normal vaxtda belə test tapşırıqlarını cavablandırmaq mümkün ola bilər, amma indiki şəraitdə mümkün deyil.

Onun sözlərinə görə, bu il məhz pandemiya onların imtahan nəticələrinə ciddi təsir göstərəcək və buna görə test tapşırıqlarında qarışıq, dolaşdırıcı, çaşdırıcı ifadə və üsullardan istifadə edilməməlidir.

"Modern.az"da yer alan "Dövlət müəssisələrinin bu sahələri mütləq özəlləşdirilməlidir - iqtisadçı deputatdan açıqlama" sərlövhəli məqalədə deputat Vahid Əhmədovun düşüncələrinə yer verilib.

Müəllif vurğulayır ki, Prezident İlham Əliyev ötən həftə keçirdiyi müşavirədə Dövlət Neft Şirkəti, "Azərenerji" və AZAL-da aşkarlanan nöqsanları tənqid edib.

Dövlət başçısı adı çəkilən dövlət şirkətlərinin dövlət büdcəsindən böyük vəsaitlər aldıqlarını, dövlət büdcəsinin əsas mənbəyinin isə neft-qaz sahəsi olduğunu xüsusi vurğulayıb.

Bu şirkətlərin zərərlə işlədikləri mövqeyindən baxan müəllif onların özəlləşdirilməsinin mümkünlüyü ilə bağlı deputat Vahid Əhmədova müraciət edir. 

Deputat Vahid Əhmədov şirkətlərin tam özəlləşdirilməsinin mümkün olmadığını qeyd edib, bununla yanaşı, özəlləşdirmənin müəyyən xidmət növlərində aparılmasının mümkünlüyünü vurğulayıb: "Ancaq adıçəkilən şirkətlərin müəyyən xidmət növləri var ki, onlar mütləq özəlləşdirilməlidir. Bu barədə çoxdan söhbət gedir".

V.Əhmədov yeni yaradılan Azərbaycan İnvestisiya Holdinqindən də söhbət açıb: "Cənab prezidentin yaratdığı Azərbaycan İnvestisiya  Holdinqinin əsas vəzifələrindən biri bu sahələrdə ciddi struktur islahatlarının aparılmasından ibarət olacaq. Struktur islahatlarının getməsi nizamnamədə də öz əksini tapıb".

Amma deputata görə, o sahələrdə elə hissələr var ki, heç bir strateji əhəmiyəti yoxdur və onları özəl şirkətlərə vermək olar.