Media-icmal 12.05.2016

Banklara nicat, vətəndaşa intihar yolu...

“Azadlıq” qəzeti “Banklara “yaşıl işıq”, vətəndaşa “dar ağacı” sərlövhəli məqalədə hakimiyyətin özünə yaxın banklara sağlamlaşdırma adı ilə milyardlar verdiyini, vətəndaşların isə dollarla götürülmüş 250 milyon həcmində kreditlərinin  ödənilməsində güzəşt etməməsi arasında paralel aparır. 

Məqalədə hakimiyyətin vətəndaşa bu mövqeyi kəskin tənqidə məruz qoyulur: “Necə olur ki, vətəndaşa 250 milyonluq güzəşt edəndə maliyyə intizamı pozulur, amma banklara güzəşt məsələsi gündəmə gələndə milyardlar havada oynayır?”. Müəllif xatırladır ki, Dünya Bankı belə manatın devalvasiyası, dolların məzənnəsinin qalxması nəticəsində xalqa dəyən ziyanın dövlət, bank və vətəndaş arasında bölünməsi təklifini verib. Müəllif hakimiyyətin xalqa bu qədər sayğısız münasibətini belə dəyərləndirir: “Bütün bunlar bir daha təsdiqləyir ki, hökumət məqsədli şəkildə vətəndaşı zülmə salır. Utanmadan, çəkinmədən də göstərirlər ki,  “xalqa üz çevirsək də banklarımıza qucaq açırıq”. Göstərirlər ki, “xalqı züilmdən azad etməsək də öz banklarımızı mənfəət vergisindən azad edirik”.

Müəllif bu kredit boclarına görə baş verən intiharlara işarə ilə deyir: “Bir sözlə, banklara “yaşıl işıq”, vətəndaşa intihar yolu göstərirlər. Vətəndaş “dar ağacı”na layiq görülür”.

Azərbaycan hesabatda tənqid edilib

“Exo” qəzeti Avropa Şurasının baş katibi Tornborn Yaqlandın 2015-ci ilin nəticələrinə görə AŞ-yə üzv ölkələrdə insan haqlarının,  media və birləşmə azadlıqlarının durumuna dair hesabatından çıxarışlar dərc edib. Bu hesabatda insan haqlarının durumuna görə Azərbaycan mənfi kateqoriyada yer alır. Məqalədə bu haqda belə deyilir: “Azərbaycanın adı “dövlətin nəşrlərin əksəriyyətini nəzarətdə saxlayan və məzmununu senzuraya məruz qoyan ölkələr çırasında çəkilir. Bundan əlavə, ölkənin adı “qadağan edilən materialların yayılmasının qarşısını almaq üçün onlayn məzmun üzərində nəzarəti gücləndirməyə yönəlik siyasətin gücləndirirlməsi” qrafasında yer alır”.

Birləşmə azadlığına gəlincə, burada insanların daha çox toplaşdığı məkanlarda aksiyalara icazə verilməməsi vurğulanır. Aksiya iştirakçılarına sərt cəzaların verildiyi xatırladılır.

Vətəndaş cəmiyyəti institutlarına qanunvericilik yolu ilə edilən basqılar da diqqətdən kənarda qalmır. “2013-cü ilin dekabrında QHT-lərin fəaliyyətilə bağlı bir sıra qanunlara dəyişikliklər edildi. Qanunlarda bu müddəalar elə yazılmışdı ki, hüquq-mühafizə orqanlarının geniş müdaxiləsinə yol açırdı. Bununla bağlı AŞPA Azərbaycan həmin qanunlara yenidən baxmaq çağırışı etdi”. Məqalədə QHT-lərin qeydiyyatı ilə bağlı yaradılan problemlər də əksini tapır. Avropa məhkəməsinin qərarlarının tam şəkildə yerinə yetirilmədiyi nəzərə çatdırılır.   

Bir istəyə görə canından olmaq

“Bizım Yol” qəzeti  Küdəmir rayon sakini Qılman Piriyevin polis əməkdaşı Asif Fərəcov və qohumları tərəfindən döyülməsilə bağlı Q.Piriyevin vəkili Bəhruz Bayramovun baş prokuror Zakr Qaralova müraciətini dərc edib. Vəkil Q.Piriyevin martın 31-də məscidin qarşısında döyüldüyünü bildirir və bunun müşahidə kameralaırnda əksini tapdığını deyir. Döyülməsinə səbəb də qonşusu olan A.Fərəcovla öz evi arasında hasar çəkmək istəməsi olub. Vəkil deyir: “Qılmanın ayağı 5, əli 4 yerdən sındırılıb, əli ola bilər ki, kəsilsin, kəllə-beyin travması alıb, daxili oqranları zədələnib, müstəntiqsə deyir ki. ekspertiza yalnız qolunun sındırılması haqda rəy verib. Əslində isə heç bir ekspertiza keçirilməyib”. Vəkilə görə, dörd nəfərdən yalnız bir nəfər cinayət məsuliyyətinə cəlb edilib. Vəkil isə Z.Qaralova müraciətində 4 nəfərə qəsdən ümumi təhlükəli üsulla və xuliqanlıq niyyətli əmələ görə ittihamı irəli sürülməsini tələb edir.

B.Bayramov Q.Piriyevin hələ də müalicəni evdə davam etdirdiyini deyir və səhhətində hər hansı irəliləyiş olmadığını bildirir.