Media-icmal 12.12.17

Rusiyaya separatizm xəbərdarlığı, sakinlərin qaz problemi, yarmarkalardakı bahalıq bugünkü (12 dekabr, 2017-ci il) medianın aparıcı mövzularındandır.

Rusiyaya Azərbaycandan separatizmə dəstək xəbərdarlığı

"Azərbaycan" qəzeti "Rusiya erməni lobbisinin əlində alətə çevrilməsinin fərqində olmalıdır" sərlövhəli məqalədə Azərbaycan-Rusiya münasibətlərini bu baxış (http://www.azerbaijan-news.az/index.php?mod=3&id=135790) bucağından dəyərləndirir.

Müəllif Rusiya və Azərbaycan arasında həmişə qarşılıqlı anlaşma mühitinin hökm sürdüyünü deyir: "Son illərdə isə əlaqələr yüksələn xətt üzrə daha sürətlə inkişaf etmiş, dövlət başçılarının qarşılıqlı səfərləri əməkdaşlığın genişlənməsinə güclü təkan vermişdir. Ən əsası, hər bir səfər münasibətlərin strateji və dostluq xarakterini təsdiqləmişdir".

Yazı müəllifi xatırladır ki, Azərbaycan beynəlxalq səviyyədə də daim Rusiyaya dəstək verib, digər tərəfdən, indinin özündə də Rusiyanın cənubunda, Şimali Qafqazda terror hadisələri, silahlı toqquşmalar baş verir.

Müəllif deyir ki, Azərbaycan bu istiqamətdə də Rusiyaya daim dəstəyini əsirgəməyib, öz ərazisindən Rusiyaya qarşı üçüncü tərəflərin, beynəlxalq terror şəbəkəsinin, Rusiyaya sızmasının qarşısını qətiyyətlə alıb: "Hətta iki ölkə arasında ekstremist qüvvələrə qarşı birgə mübarizə sahəsində əməkdaşlıq da mövcuddur. Rusiya və Azərbaycan terrorizmin və ekstremizmin yayılmasının qarşının alınması məqsədilə birgə əməliyyatlar keçiriblər".

Amma müəllif vurğulayır ki, eyni fikirləri Rusiyanın bəzi çevrələrinə, onların təsirində olan KİV və vətəndaş cəmiyyəti təsisatlarına şamil etmək olmaz.

Müəllif deyir ki, Rusiyanın müəyyən strukturlarına sızmış erməni əsilli şəxslər artıq həmin strukturları, media və vətəndaş cəmiyyəti təsisatlarını antiazərbaycan siyasətinə alət edir və bununla da öz planlarının həyata keçirilməsi üçün Rusiyanı bir növ platsdarma çeviriblər.

Yazı müəllifi xatırladır ki, bir müddət öncə Azərbaycan əleyhinə talış məsələsi ilə "ikinci cəbhə" açmaq məqsədilə bəzi şəxslərdən istifadə edərək Ermənistanda telekanal və mərkəzlər açılmışdı: "O zaman Azərbaycan ictimaiyyəti və ilk növbədə talış əsilli vətəndaşlar buna ciddi təpki göstərdilər. Bunun nəticəsində erməni xüsusi xidmət orqanları həmin qurumların fəaliyyətini Moskvaya köçürdülər".

Bundan irəli gələrək müəllif deyir ki, Azərbaycan əleyhinə belə aqressiv fəaliyyətin Moskvada özünə meydan tapması Rusiya-Azərbaycan münasibətlərinin ruhuna ziddir.

Müəllif deyir ki, buna görə də Rusiya erməni lobbisinin Moskvanı get-gedə öz xəyanətlərinin qurbanına çevirməsinin, onu geostrateji əhəmiyyətli bölgələrdə daha çox təcrid etməsinin fərqində olmalıdır.

Qaz ölkəsində "qazsızlıq dərdi"

"Bizim Yol" qəzetində "Bakıda 320 ailə qazsız qalıb" sərlövhəli məqalədə

(http://www.bizimyol.info/az/news/37764.html) bu ailələrin qazsız qalması sualına cavab axtarılır.

Müəllif deyir ki, Nəsimi rayonu, Ceyhun Səlimov küçəsi, 16 ünvanında yaşayan 320 ailə 8 ildir ki, qazsız qalıb. "Günəşli" MTK-nın inşa etdiyi binadan mənzil alan vətəndaşlarla bağlanan müqaviləyə görə, tikinti şirkəti qaz, su, kanalizasiya çəkilişi barədə öhdəlik götürsə də vədinə əməl etmir. Vətəndaşların haqlı narazılığına səbəb olan bu hal dəfələrlə bina sakinlərinin etirazına, qalmaqalına səbəb olub. Qarşıdurmalar yaranıb".

Müəllif vurğulayır ki, binanın qızdırılması üçün mərkəzi istilik sisteminə qoşulmaq məqsədilə hər bir sakin 150-1000 manat miqdarında vəsait ödəyib.

Müəllif deyir ki, mənzillər istiliklə təmin olunsa da mənzillərə qaz verilmir və 8 ay öncə problemin həlli üçün "Azəriqaz" ilə danışıqlar aparılaraq podratçı təşkilat olaraq "VİP" təmir-tikinti şirkəti ilə müqavilə bağlanılıb.

Yazıda xatırladılır ki, bunun üçün hər bir vətəndaşdan 350 manat vəsait yığılıb və "VİP" təşkilatına 32 min manat vəsait ödənilib.

Amma qaz verilməsini təmin etməli olan təşkilat boru xətlərindəki nasazlığı əsas gətirərək günahı vətəndaşların boynuna atır.

Müəllif deyir ki, bəzən təşkilat qaz verilməməsinə səbəb kimi bəzi mənzillərdə yaşayışın olmamasını, qapıların bağlı olmasını əsas gətirir.

Artıq qışın gəlməsinə baxmayaraq, müəllif hələ də nə vaxt qazla təmin olunacaqlarını heç sakinlərin özlərinin də bilmədiklərini deyir.

"VİP" təşkilatına 32 min manat vəsait ödənildiyini xüsusi vurğulayan müəllif deyir ki, təşkilat aldığı vəsaitin müqabilində işini görməli olduğu halda hər hansı fəaliyyət göstərməyib.

Müəllif deyir ki, təşkilat bu işi başa çatdırmalı ikən ayrı-ayrı bəhanələr gətirməklə öz üzərinə götürdüyü mənzillərin qazla təmin olunması məsuliyyətindən yayınmaq istəyir.

Müəllif isə xatırladır ki, təşkilatın boru xətlərindəki nasazlığı əsas gətirərək günahı vətəndaşların boynuna atması, bəzi mənzillərdə insanların yaşamaması və qapıların bağlı olması kimi arqumentlərin öhdəliyini yerinə yetirməməyə əsas vermir.

Müəllif deyir ki, bu, azmış kimi binanın "Azəriqaz"a olan ötənilki borcuna görə mərkəzi istilik sisteminə qaz verilişi dayandırılıb və 320 ailə bu soyuq qış günü yaşamaq mücadiləsi vermək məcburiyyətində qalıb.

Yazı müəllifi deyir ki, binanın problemlərinin həlli üçün kənardan-kənara "məsləhətlər" verən MTK sədrinin isə özünün harada olduğu bilinmir.

Ucuzlaşmayan yarmarkalar

"Yeni Müsavat" qəzetində "Kənd təsərrüfatı yarmarkaları marketlərə qarşı, qiymət fərqi niyə cüzidir..." (http://musavat.com/news/kend-teserrufati-yarmarkalari-marketlere-qarsi-qiymet-ferqi-niye-cuzidir_489813.html) sərlövhəli məqalə diqqəti cəlb edir.

Müəllif qiymət baxmından bütün alıcı təbəqələrinin əlçatanlığı üçün yarmarkaların təşkil edilməsi, amma qiymətlərin bazar və marketlərlə müqayisədə o qədər də fərqli olmaması səbəblərini ekspert Natiq Cəfərli ilə müzakirəyə çıxarır.

Müəllif deyir ki, yarmarkanın məqsədi fermerlərə məhsullarını birbaşa bazara çıxartmaq, daha çox qazanmaq, bazarlarda ucuzluq yaratmaq imkanıdır: "Lakin görünən odur ki, qiymətlər arasında demək olar, ciddi fərq yoxdur. Bakıda təşkil olunan bir neçə yarmarkanı dolaşsanız da müxtəlif məhsulların demək olar ki, hər yerdə eyni qiymətə satıldığının şahidi ola bilərsiniz".

İqtisadçı ekspert Natiq Cəfərli qiymət məsələsinin bazarda tələb və təkliflə əlaqəli olduğunu deyir: "İndi, Yeni il öncəsi tələbin artması ehtimalı yüksəkdir, məhsullarını yarmarkalara çıxaran fermerlər də gözləntilərə uyğun qiymət formalaşdırırlar. Çünki hər zaman Azərbaycanda bayram öncəsi qiymət artımı müşahidə olunur. İstər kənd təsərrüfatı məhsulları, istərsə də sənaye istehsalı olan ərzaq məhsulları bahalaşır. Ona görə də bu gözləntilər fonunda qiymətlər artır və fermerlər də onu aşağı salmaq istəmirlər".

Ekspert qiymət artımına daha bir bir səbəb kimi fermerlərin xərclərinin artmasını göstərir: "Odur ki, həmin xərcləri qarşılamaq üçün qiyməti artırmaq məcburiyyətindədirlər. Əgər ölkədə rəsmi inflyasiya 14 faizdirsə, 18 faizlik ümumi ərzaq inflyasiyası varsa, fermer də satdığı məhsulla əldə etdiyi pulu marketlərdə alış-veriş edib ailəsini dolandırmalıdır".

N.Cəfərliyə görə, qiymətlərin ümumi artım fonunda fermer aşağı qiymətlərlə məhsulunu bazara çıxartmaqda maraqlı deyil və buna görə də yarmarkalarda qiymətlərin heç də ciddi fərqlənmədiyinin şahidi oluruq".

İqtisadçı qiymət artımına digər bir səbəb kimi fermerlərin birbaşa bazarlara çıxmaq imkanları zəif olduğu üçün yarmarkalara məhsulların bir neçə alverçi tərəfindən gətirildiyini göstərir.

Ekspert hesab edir ki, fermerlərin birbaşa bazarlara daha asan və daha tez çıxış imkanlarını icra qurumları təmin etməli və fermerlər özləri də bunda maraqlı olmalıdır.

N.Cəfərliyə görə, bahalığa daha bir səbəb isə "bazar alverçiləri" adlı qrupdur, onlar fermerlərdən məhsulu elə qapıdaca alır və gətirib bazarda daha baha qiymətə satırlar.