Media-icmal 13.02.20

Əgər pozuntular olubsa...

“AZƏRTAC” fevralın 12-də Kürdəmirdə “ASAN xidmət” mərkəzinin istifadəyə verildyini və burada iştirak edən dövlət başçısı İlham Əliyevin ölkə həyatında baş vermiş bir sıra hadisələrə, o, cümlədən fevralın 9-da keçirilmiş parlament seçkilərinə də münasibət ifadə etdiyini bildirir.

“Parlament seçkiləri bir daha onu göstərdi ki, bizim niyyətimiz demokratik inkişafın təmin edilməsidir”. Bunu fevralın 12-də Kürdəmir rayonunda “ASAN-xidmət” binasının açılışında dövlət başçısı İlham Əliyev fevrlaın 9-da keçirilmiş növbədənkənar parlament seçkilərilə bağlı bildirib.

Onun sözlərinə görə, Azərbaycana ən tənqidi mövqedən yanaşan təşkilatlar da seçkilərlə bağlı məruzəsində müsbət meylləri qəbul etməyə məcbur olmuşlar.

Bu seçkilərdə pozuntulara toxunan dövlət başçısı onları prosedur pozuntuları adlandırıb: “Yəni, bu, hər bir ölkədə var. Heç bir ölkədə tam kamil seçkilər keçirilmir. Amma bu seçkilərdə nə saxtakarlıq, nə ciddi pozuntular olub, nə də ki, seçkilərin legitimliyini, yaxud da nəticələrini şübhə altına alan hər hansı bir pozuntu. Müşahidəçilərin mütləq əksəriyyəti seçkiləri çox müsbət qiymətləndirdi, Bəziləri qeyd etdi ki, bu, bir çox ölkələr üçün nümunə ola bilər”.

ATƏT-in Demokratik Təsisatlar və İnsan Hüquqları Bürosunun həmişə Azərbaycana qərəzli yanaşdığını iddia edən İ.Əliyev deyir ki, 9 fevral seçkilərilə bağlı qurumun hesabatı tarazlı, əvvəlki dövrlərə nisbətən daha obyektiv olub. 

Dövlət başçısı hesabatda bəzi məsələlərlə razılaşa bilmədiyini desə də, onun obyektivliyə daha yaxın olduğunu bildirir: “Biz də bəyan etmişik ki, mövcud olan pozuntular ciddi araşdırılacaq, pozuntulara yol vermiş şəxslər cəzalandırılacaq və bundan sonra da biz bütün beynəlxalq təşkilatlarla bu istiqamətdə fəaliyyətimizi və əməkdaşlığımızı davam etdirəcəyik”, deyə prezident qeyd edir.

Dövlət başçısı bu dəfə deputatlıq iddiası ilə 1300-dən çox şəxsin seçkiyə qatılmasını seçkilərin rəqabət şəraitində keçməsinin göstəricisi kimi dəyərləndirir.

Bu mənada ATƏT/ DTİHB-nin məruzəsində seçkilərin rəqabətsiz keçirilməsi haqqında müddəa ilə razılaşmır.

Prezident məruzədə yer alan  “sərbəst toplaşmaq azadlığı təmin olunmayıb” mövqeyi ilə də razılaşmır: “...yalandır, olunub. Çünki indi hər kəs sərbəst toplaşmaq haqqını müvafiq yerlərdə icra edə bilər, amma qanun çərçivəsində. Necə ki, başqa ölkələrdə. Ona görə seçki prosesi bütün demokratik meyarlara cavab vermişdir”, deyə prezident seçkilərə öz münasibətini ifadə edir.

Dövlət başçısı əgər pozuntular olubsa, onların araşdırılacağını bir daha vurğulayıb: “Biz istəmirik ki, pozuntular olsun. Pozuntulara yol verən şəxslər öz cəzasını almalıdırlar ki, gələcəkdə belə hallara yol verilməsin”, deyə İ.Əliyev mövqeyini bildirib.

Vətəndaş cəmiyyəti institutlarının təmsilçiləri seçkilər barədə

“Azadlıq.info”da “Etirazlar siyasi təlatümlərin bazasını yaradacaq” sərlövhəli məqalə oxumaq olar.

Məqalədə fevralın 9-da Azərbaycanda baş tutmuş növbədənkənar parlament seçkilərinin ilkin nəticələrinə etiraz olaraq fevralın 11-də bir qrup deputatlığa namizəd və müçahidəçilərinin keçirdiyi aksiyaya siyasi və ictimai xadimlərin münasibəti ifadə edilir.

 Müəllif vurğulayır ki, deputatlığa namizədlərin və fəalların dinc aksiyasına güc tətbiq olunması birmənalı şəkildə tənqidə məruz qalır.

İlkin olaraq prezident İlham Əliyevin seçkilərə münasibətini ifadə edən fikir önə çıxaırılır və deyilir ki, bunu dövlət başçısı fevralın 10-da Türkiyə-Azərbaycan parlamentlərarası dostluq qrupunun rəhbəri Şamil Ayrımla görüşdə bildirib: “Əgər onlar seçkilərdən narazı olsalar, öz səslərini ucaldardılar. Ancaq indiyə qədər biz belə hallara rast gəlmirik. Bu, bir daha onu göstərir ki, bu seçkilər Azərbaycan xalqının iradəsini əks etdirir və əsas odur”.

Seçkilərə və deputatlığa namizədlərin aksiyasına münasibət ifadə edənlər aksiyann polis gücü ilə dağıdılmasını hökumətin deputatlığa namizədlərin dinc aksiyasına dözüm nümayiş etdirə bilməməsi kimi dəyərləndirir. Həm də vurğulanır ki,deputatlığa namizədlərin toxunulmazlıq hüququna da fikir vermədilər, aksiya dağıdıldı, namizədlər saxlandı.

Bu münasibətlərdə ifadə edilən daha bir fikir budur ki, etiraz səsləri eşidilməsə ölkədə siyasi böhran genişləncək və indiki hada ən yaxşı çıxış yolu azı 10 seçki dairəsində təkrar parlament seçkilərinin keçirilməsi, seçki qanunvericliyinə liberal dəyişikliklər və siyasi məhbusların azad olunmasıdır.

Aksiyanın özü isə parlament seçkilərinə etirazın kiçik təzahürü kimi qiymətləndirilir.

Ən çox işsiz Azərbaycanda

“Yeniavaz.com” isə “MDB-də işsizlərin sayı ən çox Azərbaycanda artıb” sərlövhəli məqalədə Azərbaycanda işsizlik probleminə toxunur.

Sayt Müstəqil Dövlətlər Birliyinin (MDB) Dövlətlərarası Statistika Komitəsinin açıqladığı statistik göstəricilərə istinadən bildirir ki, bu ilin əvvəlinə olan məlumata görə, son bir ildə işsiz kimi qeydiyyata alınan vətəndaşların sayı ən çox Azərbaycanda artıb.

Müəllif vurğulayır ki, 2019-cu il ərzində Azərbaycanda işsiz kimi müvafiq dövlət orqanlarında qeydiyyata alınan şəxslərin sayı 4 dəfədən çox artıb.

Azərbaycanla bərabər Qırğızıstanda və Qazaxıstanda da işsizlərin sayı artıb. Son bir ildə Qırğızıstanda işsizlərin sayı 7,4%, Qazaxıstanda isə 6,5% artıb.