Media-icmal 13.04.21

Virusa yoluxmanın artması ehtimalları, təhsil və iqtisadiyyatda qeyri-bərabərliyin aradan qaldırılması yolları, oruc tutanların immunitet zəifliyinin kütləvi yoluxmaya səbəb ola bilməsi və s. məsələlər medianın aparıcı mövzuları sırasındadır.

“Yenisabah.az” saytı “Sərt karantin rejimi gözləniləndir”  sərlövhəli məqalədə bəhs olunan məsələni dəyərləndirir.

Koronaviruslu xəstələrin müalicəsi ilə məşğul olmuş həkim Məlahət İsayeva deyir ki, 2020-ci ilin fevral-aprel, 2021-ci ilin fevral aylarında sərt karantinə keçilsə də virusa yoluxma artdı, səbəbi isə son vaxtlar virusun mutasiya etməsi, yoluxuculuğu əvvəlki virusdan daha güclü olmasıdır.

Həkim vaksin vurulmasına  baxmayaraq, yoluxma sayının yenə də artacağını söyləyib, buna səbəb kimi isə avtobuslardakı, dükan və kafelərdəki sıxlığı göstərib. 

Məlahət İsayeva hesab edir ki, bu xəstəliyin kökünü, səbəbini tapmaq lazımdır, çünki sağlam, immuniteti güclü adamlar heç vaxt xəstələnmir, virusa yoluxmur.

“Xəstələri müayinə etdikdə məlum olur ki, insanların 70%-nin arterial təzyiqi, şəkər, bununla yanaşı digər xəstəlikləri var. Belə insanların immuniteti zəif olur. Onlar virusa daha tez yoluxurlar. Əlbəttə, yoluxma sayı get-gedə artsa sərt karantin rejimi gözləniləndir”, - Məlahət İsayeva bildirib.

“Sfera.az” saytı isə “Ölkə əhalisinin 40%-ə qədəri coğrafi olaraq ərazisinin təxminən 5%-də məskunlaşıb” sərlövhəli məqalədə iqtisadçı-ekspert Rövşən Ağayev ölkədə iqtisadi sahədə, təhsil sahəsindəki qeyri-bərabərliyin aradan qaldırılmasının yollarını göstərir: “Təhsil inkişaf  etməsə Azərbaycanda mövcud olan fantastik qeyri-bərabəriyi aradan qaldırmaq mümkün olmayacaq”, - iqtisadçı bildirir.

Rövşən Ağayev iqtisadi inkişafdakı qeyri-bərabərliyin miqyasının böyük olduğunu söyləyir: “Milli gəlirin tam 80%-i coğrafi olaraq ölkə ərazisinin 5%-də, 20%-i isə 95% ərazidə formalaşır. Yaxud ölkə əhalisinin 40%-ə qədəri coğrafi olaraq ərazisinin təxminən 5%-də məskunlaşıb”.

Ekspert deyir ki, bu mənzərə təhsildə də qeyri-bərabərlik yaradır, hər bir bölgə üzrə məzunların əhalinin hər 10000 nəfəri hesabı ilə universitetə qəbul sayını hesablamaqdır.

Onun deməsinə görə, aşağı-yuxarı göstərici arasnda təxminən 12 dəfə fərq var, belə ki, Bakıda, Sumqayıtda, Naxçıvan şəhərində, Abşeron, Zəngilan və Qubadlıda hər 10 min nəfərə qəbul sayı 60 nəfər, Ağsu, Hacıqabul, və s. 15-17 nəfər, Gəncə, Oğuz, Qazqx, Qəbələ qzrə isə 30-45 nəfər arasında dəyişir.

“Bizimyolinfo.az” saytı isə “Ramazan ayında sərt qapanma gəlir: İftar süfrələri qorxuludur, yoxsa diskotekalar?” sərlövhəli məqalədə sərt qapanma ehtimalını dəyərləndirir.

Müəllifə görə, Ramazan ayında iftar süfrələrilə insanlar arasında ünsiyyətin artmasının qarşısını almaq üçün bu addımlar atılacaq.

Onun deməsinə görə, əgər Ramazanda qapanma olmasa, yoluxmanın sürətlə artacağı riski ehtimal edilir.

Müəllif yada salır ki, onsuz da ölkədə bir ildən çoxdur ki, müsəlmaların ibadət yeri olan məscidlər bağlıdır: “Diskotekalar, kafelər, restoranlar, mağazalar və s. obyeklər açılsa da bir çox etirazlara baxmayaraq, məscidlərin qapısı hələ də insanların üzünə bağlı olaraq qalır. Ramazan ayında insanların iftar süfrəsində toplaşmasına gəldikdə isə kafelərdə, restoranlarda toy məclislərini xatırladan görüntülərdən dahamı təhlükəlidir?” - müəllif sual ünvanlayır.

“Məşədi Dadaş Məscidi”nin imamı, Qafqaz Müsəlmanları İdarəsinin nümayəndəsi Hacı Şahin Həsənli də düşünür ki, ailə çərçivəsində iftar süfrəsi təşkil etmək məqsədəuyğundur.

Din xadimi vurğulayır ki, Ramazan ayı boyunca canlı yayım vasitəsilə din xadimləri insanlara müraciətlər edəcəklər, insanlar da evlərindən həmin dua mərasimlərinə qoşula bilərlər.