Media-icmal 15.02.21

Bakıda binaların seysmoloji vəziyyəti, Qarabağda separatçı rejimlə danışıqlar aparılması iddiasına cavablar, daşınmaz əmlak bazarında durum və s. mövzular medianın aparıcı mövzuları sırasındadır... 

"Müsavat.com" saytında dərc edilən "Tanınmış seysmoloqdan sos: "Son vaxtlar tikilən binalardan xəbərsizik" sərlövhəli məqalədə Bakıda tikilən ev və binaların zəlzələlərə dayanıqlığı müzakirə edilir.

Yazıda vurğulanır ki, Azərbaycanın da yerləşdiyi regionda son vaxtlar zəlzələlərin sayı, gücü və intensivliyi artıb və son günlər Türkiyədən Qafqaza qədər ərazilərdə bu özünü göstərir. Əlavə edilir ki, fevralın 5-də Ermənistansda baş vermiş zəlzələ Azərbaycanın Qazax, Tovuz, Gədəbəy, Gəncə, Şahbuz ərzilərində 5-4 bal gücündə hiss olunub.

Respublika Seysmoloji Xidmət Mərkəzinin baş direktoru Qurban Yetirmişli də təsdiq edir ki, son vaxtlar yeraltı təkanlar artıb, onun sözlərinə görə, fevral ayının 5-də sutka ərzində 37 təkan qeydə alınıb.  

Müəllif bundan irəli gələrək Mərkəz rəhbərinə Bakıda tikilmiş ev və hündürmərtəbəli binaların zəlzələyə dayanıqlığı ilə bağlı sual ünvanlayır.

Q.Yetirmişli deyir ki, hər hansı bina tikilməzdən öncə onun zəlzələyə dayanıqlığı hələ layihə mərhələsində müəyyən olunmalıdır.

Amma vəziyyət heç də elə deyil: "Son vaxtlar heç kim bizimlə maraqlanmır. Bilmirəm, hazırda evləri hansı təşkilat tikir, hansı firma, hansı MMC tikinti işləri aparır. Özləri bilər", deyə Q.Yetirmişli narazılığını ifadə edir.

Mərkəz rəhbəri deyir ki, binanın neçə mərtəbəli olması sütunların ölçülərindən, bünövrənin necə qoyulmağından asılıdır. Bunlar yerində olsa, lap 60 mərtəbəli bina da tikmək olar. Onun heç bir problemi yoxdur".

"Yenisabah.az" saytında  dərc edilən "İndiki situasiyada Xankəndidəki separatçıların həbsi mümkün deyil - Rusiya çalışacaq ki..." sərlövhəli məqalədə isə Dağlıq Qarabağ seprataçılarının başçısı Araik Arutyunyanın

Azərbaycandan olan rəsmi şəxslə görüşməsi iddialarına münasibət ifadə edilir.

Politoloq Məhəmməd Əsədullazadə deyir ki, Ermənistanın iştirakı olmadan Azərbaycanın birbaşa Xankəndində ermənilərlə belə təması mümkündür.

"Müharibədən sonra Ermənistan məğlub olub, tərəf deyil. Buradakı ermənilər isə Azərbaycan ərazisində yaşayırlar".

Politoloqa görə, Azərbaycan separatçıları heç vaxt tərəf kimi qəbul etməyib və bu görüşü də A.Arutyunyanın şəxsində Azərbaycan tərəfin "DQP prezidenti"lə görşüməsi kimi dəyərləndirmək absurddur.  Politoloq əlavə edib ki, Azərbaycan Dağlıq Qarabağ ermənilərinə muxtariyyət hüququ tanımayacaq.

Politoloq hesab edir ki, Qarabağdakı separatçı rejim cinayətkardır və həbsi mütləqdir.

M.Əsədullazadəyə görə, bu görüş olubsa, buradan mənalar çıxır, Azərbaycan göstərmək istəyib ki, Qarabağdakı ermənilərlə problemi yoxdur və onları öz vətəndaşı kimi qəbul edir. Daha bir məna budur ki, Azərbaycn problem daxili məsələ kimi göstərir, "Xankəndiyə gedə bilərəm" mesajı verir. Nəhayət Azərbaycan göstərmək istəyir ki, Qarabağdakı ermənilərə status tanımayacaq.     

Politoloq vurğulayır ki, seprataçı rejim başçıları indi ona görə həbs edimir ki, mövcud situasiyada bu, hələ ki, mümkün deyil. 

M.Əsədullazadə bu məsələdə Rusiyanın roluna toxunaraq deyib ki, Rusiya çalışacaq ki, ermənilərlə azərbaycanlıların arasında mümkün barışa imkan verməsin, bu isə bu dövlətin geosiyasi maraqlarından irəli gəlir.

"Modern.az" saytında yer alan "Daşınmaz əmlak bazarında son vəziyyət - Qarabağda torpaq almaq istəyənlər çoxalır" sərlövhəli məqalədə ölkənin əmlak bazarındakı mövcud vəziyyətdən danışılır.  

Müəllif bu vəziyyəti ekspert Rəşad Əliyevlə müzakirə edir.

Ekspertə görə, "COVID-19 pandemiyası tamamilə sıradan çıxmasa da, hazırda daşınmaz əmlak bazarı postpandemiya dövrünü yaşayır, karantin rejiminin yumşaldılması ilə bazar qismən də olsa canlanır:

R.Əliyev deyir ki, bazardakı süstlük sırf pandemiya ilə də bağlı deyildi, hələ pandemiyadan əvvəl bazarda müəyyən gərginlik yaranmışdı.

Ekspertə görə, hazırda bazara əsas təsir hadisələrindən biri də Qarabağın işğaldan azad edilməsidir. Həmin ərazilərdə yenidənqurma işləri aparılacaq, kifayət qədər vəsaitlər yönləndiriləcək.

R.Əliyev deyir ki, burada  həmin ərazilərdə bərpa işlərinin aparılması və vətəndaşların geri dönüşü kimi gözlənti var, üsətlik ola bilər ki, paytaxtda yaxşı şəraiti olanların çoxu Qarabağa qayıtmasın. 

Qarabağda torpaq almağa gəlincə, ekspert deyir ki, proses müəyyən ediməsə də, indidən orada torpaq almaq istəyənlər çoxdur.