Media-icmal 16.03.21

Korrupsiyaya qarşı mübarizə, marketlərdə bahalaşmanın səbəbləri, kiçik sahibkarların vergi yükünün azaldılması və s. məsələlər medianın aparıcı mövzuları sırasındadır.

“Moderator.az” saytı “Oliqarxların kimlər olduğu, nə qədər vəsait mənimsəyə bildikləri aşağı-yuxarı bəllidir” sərlövhəli məqalədə müəllif Azərbaycanda korrupsiyaya qarşı mübarizəni deputat Vahid Əhmədovla dəyərləndirir.

Vahid Əhmədov deyir ki, korrupsiya və onun verdiyi ziyanla bağlı fikirlərini daima bildirib və korrupsiya ilə bağlı faktları “dövləti laxladan məsələlərdən biri” adlandırır.

O vurğulayır ki, ölkədə kadr islahatları aparılır, gənclərə böyük etimad göstərilir, oliqarxlar vəzifədən kənarlaşdırılır və istiqamətdə aparılan işlərin sürəti aşağı düşməməlidir: “Əgər biz Azərbaycanı gözəl dövlətə çevirmək, demokratik əsasları bərkitmək istəyiriksə, korrupsiyaya qarşı mübarizə canlanmalıdır. Atılan addımlar hətta kifayət etməsə belə, davam etdirilməlidir”, - Vahid Əhmədov bildirir.

Vahid Əhmədov vəzifədən azad olunmuş oliqarxların həbsinin əleyhinə olduğunu deyərək fikrini belə əsaslandırır ki, bir neçə il həbs cəzası çəkib çıxırlar və topladıqlarını əllərində saxlayırlar.

Deputat yada salır ki, Azərbaycan qətiyyətli müharibə apararaq işğal olunan ərazilərini azad edib, indi bu ərazilərin bərpası üçün bizə kifayət qədər maliyyə lazımdır: “Hər oliqarxa bir rayonu tapşırmaq olar. O mənadakı vəsaitini gətirib rayonda tikinti, infrastruktur işləri aparsın, kommunikasiya xətlərini həyata keçirsin. Bu baxımdan maliyyə amnistiyasının verilməsinin tərəfdarıyam”, - Vahid Əhmədov mövqeyini izah edir.

Onun fikrincə, təxminən oliqarxların kimlər olduğu, nə qədər vəsait mənimsəyə bildikləri aşağı-yuxarı bəllidir, həmin vəsaiti yavaş-yavaş onlardan geri götürmək, dövlət büdcəsinə köçürmək lazımdır. Vahid Əhmədov deyir ki, korrupsiya qarşı effektli mübarizə üçün azad məhkəmə sisteminə iböyük ehtiyac var.

“Redaktor.az” saytında dərc edilən “Marketlərdə bahalaşmaya səbəb nədir? – Novruz bayramı, yoxsa...?” sərlövhəli məqalədə bahalaşmanın səbəbləri araşdırılır. Müəllif deyir ki, ölkədə ərzaq məhsullarında qiymət artımı müşahidə edilir. Onun deməsinə görə, bahalaşma daha çox xaricdən idxal edilən məhsullarda qeydə alınıb.

Bundan irəli gələrək müəllif bu məhsulların ölkə daxilində istehsal edilib-edilməməsinin mümkünlüyü ilə bağlı sualı da gündəmə gətirir.

Bu məsələ ilə bğlı açıqlama verən  deputat Fazil Mustafa hesab edir ki, ilk növbədə keyfiyyətli məhsul istehsalına önəm verilməlidir: “Biz keyfiyyətli məhsul istehsal etməliyik ki, əhali yerli istehsala üstünlük versin. İnsanlar marketdən Belarus, Rusiya istehsalı olan südü alırlarsa, problem bizdədir” deyə deputat bəyan edir. Digər tərəfdənsə deputat deyir ki, kənd təsərrufatında doğru inkişaf getmir.

Onun firkincə, bazara dayanıqlı, müasir texnologiyaların tələbatını ödəyə biləcək məhsul çıxarmaq lazımdır. 

Deputat vurğulayır ki, əks halda vətəndaşlar məcburiyyət qarşısında xarici ölkədən gətirilən məhsula üstünlük verir, bu da qiymət artımına səbəb olur.

“Sfera.az” saytında “Kiçik sahibkarların vergi yükü azaldılmalıdır – ekspert” sərlövhəli məqalədə bəhs olunan məsələ müzakirə edilir.

Müəllif vurğulayır ki, Türkiyə hökuməti mikro və kiçik sahibkarları gəlir vergisindən azad etməyi planlaşdırır. Hazırda Türkiyədə 850 min mikro və kiçik sahibkar var. Hökumətdə hesab edirlər ki, gəlir vergisindən azad etməklə kiçik sahibkarların maliyyə yükünü azaltmış olacaqlar.

Bundan irəli gələrək müəllif Azərbaycanda da mikro və kiçik sahibkarları vergidən azad etməyin mümkünlüyü sualını gündəmə daşıyır.

Kiçik və Orta Müəssisələrin İnkişafına Yardım Mərkəzi İctimai Birliyinin rəhbəri İlkin Qarayev isə deyir ki, Türkiyədə nəzərdə tutulan güzəşt tam vergidən azadetmə yox, bir vergi növündən azadetmədir.

Onun deməsinə görə, Türkiyədə kiçik sahibkarlar gəlir vergisi ilə yanaşı həm də əlavə dəyər vergisi ödəyicisidirlər.

İ.Qarayevə görə, Azərbaycanda da bu qurumların vergi yükünün azaldılması məqsədə uyğundur. Onun fikrincə, kiçik sahibklar sadə vergi mexanizmindən istifadə etsələr daha yaxşı olardı.

İ.Qarayev hesab edir ki, burada gəlir vergisinin ləğvi, yalnız əlavə dəyər vergisinin saxlanılması yaxşı olardı. O vurğulayır ki, Çində bu təcrübədən istifadə edilib və nəticələr yaxşı olub,  Çinin bəzi regionlarının inkişafı üçün bu müəssisələrdən ancaq əlavə dəyər vergisi alınıb.

Qarayevin deməsinə görə, kiçik sahibkarların yalnız dövriyyə vergisi  ödəməsi daha əlverişlidir.