Media-icmal 18.02.21

“Moderator.az” saytı “Türkiyə və Azərbaycana yönəlik siyasəti dəyişməyibsə, bizə uzanan erməni əli havada qalmalıdır...” sərlövhəli məqalədə Ermənistanın Azərbaycan və Tükiyəyə yönəlik siyasəti müzakirə obyektidir.

Müəllif deyir ki, Ermənistan Türkiyənin bu dövlətlə sərhədlərini açması üçün heç bir əngəlin olmadığını bildirir. 

Politoloqlar isə rəsmi İrəvanın bu mövqeyini bölüşmürlər: “Qonşularla mehriban ortamda yaşamaq istəyirlərsə, Ermənistan əvvəlcə problemləri həll etməli, terrorçu mahiyyətindən imtina etməlidir. Türkiyə və Azərbaycanın uzanmış barış əllərini nəinki sıxmağa, öpməyə hazır olduğunu  əməlləri ilə ortaya qoymalıdırlar. O zaman bölgənin digər xalqları kimi erməni xalqı da nəhayət, xoş günlərinə qovuşa bilər”, - politoloqlar bəyan edirlər.

Digər tərəfdən, politoloqlar deyirlər ki, Ermənistan terrorçu mahiyyətindən imtina etməyənə kimi bu ölkə ilə sərhədlərin açılmasından söhbət gedə bilməz.

Onlara görə, Ermənistanın sərhədlərin açılmasını istəməsi başqa çıxış yolunun olmamasının göstəricisidir: “Ermənistanda da anlayanlar var ki, bu ölkənin Azərbaycan və Türkiyə ilə inteqrasiya etməkdən başqa bir yolu yoxdur. Amma indiki durumda  Ermənistan dövləti və xalqı buna hazır deyil. O zaman sərhədlər Ermənistanın buna hazır olduğu vaxta qədər açılmamalıdır”, - politoloqlar münasibətlərini ifadə edirlər.

“Bizimyolinfo.az” saytı isə “Ağıllı kəndlər”də məskunlaşmayıb, muzey kimi saxlayacağıqsa pul tökməyə dəyməz” sərlövhəli məqalədə işğaldan azad  edilmiş ərazilərdə “ağlllı kəndlər” və “ağıllı şəhərlər” layihələri dəyərləndirilir.

Müəllif  bu layihələri bəyənir, eyni zamanda onların icrasının nəzərdə tutulduğu kimi aparıla bilməməsindən ehtiyat edir. Buna nümunə göstərən müəllif deyir ki, vaxtilə  “nəqliyyatın intellektual idarəetmə sistemi" layihəsi icra edildi, amma fəaliyyəti olmadı. Bundan irəli gələrək müəllif bu layihələrin də taleyinin nəqliyyatın intellektual idarəetmə sisteminin gününə düşə bilməsi qorxusunu dilə gətirir.

İqtisadçı Eldəniz Əmirov  deyir ki, əgər, “ağıllı şəhər” texnologiyası azad edilmiş ərazilərdə tətbiq edilə bilsə təkcə ölkənin digər əraziləri üçün deyil, həm də bütün region üçün təcrübə rolunu oynayacaq.

Ekspert vurğulayır ki, buna görə də işğaldan azad edilmiş ərazilərdə bərpa haqqında deyil, daha çox yenidən qurulma haqqında danışılmalıdır: “Çünki bərpa ilə smart azad edilmiş ərazilərdə “ağıllı şəhər”, hətta “ağıllı kənd” adlanan müasir texnologiyalar tətbiq etmək mümkün deyil. Bu yalnız yenidən qurulmanın məhsulu ola bilər”,

E.Əzimov deyir ki, əğər bu böyük layihə tamamlanıb real olaraq, insanlar üçün praktik yaşayış məskəninə çevrilməyəcəksə, sadəcə, bu yaşayış məskəninin təyinatı dəyişəcəksə, belə bir yaşayış məskəni yaradılıb deyə muzey kimi saxlanılacaqsa, o zaman bu istiqamətdə vasait xərcləməyə dəyməz.

“Yenisabah.az” saytı isə “Rəsmi Bakı hərəkətə keçməlidir: Araik bunu edirsə, deməli, qondarma referendum keçirib Rusiyanın...” sərlövhəli məqalədə erməni separatçıların “Dağlıq Qarabağda” rus dilinə rəsmi dil statusu vermək istəmələrini politoloq Məhəmməd Əsədullazadə ilə müzakirə edilir.

Politoloqa görə,  “Dağlıq Qarabağda Rusiya sülhməramlı qüvvələrinin məsuliyyət zonasında fəaliyyət göstərən erməni separatçıların rəhbəri Araik Arutunyanın rus dilinə "rəsmi status" verməsi birbaşa Kremldən idarə olunan porsesdir.

O deyir ki, A.Arutunyan Kremlin nəzarətində olan şəxsdir və bütün qərarları Rusiya sülhməramlı qüvvələrinin komandanı Rüstəm Muradovla razılaşdırılır. Ona görə də Azərbaycanın suverenliyinə və üçtərəfli birgə bəyanata zidd olan bu qərara qarşı rəsmi Bakı hərəkətə keçməlidir.

“Göründüyü kimi, Rusiya hakimiyyəti Dağlıq Qarabağda konkret olaraq Azərbaycanın əleyhinə yaşıl işıq yandırır. Bununla da azərbaycanlıların Xankəndi, Ağdərə və Xocavəndə köçürülməsinin qarşısını alır” deyə politoloq bildirir.  

Onun fikincə, bunun olmaması üçün Rusiya sülhməramlılarının mandatının çərçivəsi müəyyən olunmalıdır, bu qüvvələr erməni separatçıları müdafiə edəcəklərsə bu fəaliyyətə son verilməlidir.              

Politoloqa görə, əgər separatçı rejim rus dilinə rəsmi dil statusu verirsə, bir müddət sonra Rusiya  buradakı ermənilərə Rusiya pasportu da verə, referendum keçirib Rusiyanın tərkbinə qatılmağa da cəhd edə bilər və bu təhlükə var. Belə ssenarilərin qarşısını almaq üçün Azərbaycan konkret planlar həyata keçirməlidir.