Media-icmal 18.05.2016

Ölkədəki ictimai-siyasi durum, AXCP-yə hakimiyyətin münasibəti, Vyana danışıqlarının təfərrüatları, ixracın kəskin azalması, turizmin vəziyyəti bugünkü medianın aparıcı mövzusudur.

Azərbaycan qüdrətli dövlətə dönür   

“Azərbaycan” qəzeti ölkədəki ictimai-siyasi durumu dəyərləndirən “Güclü lider-müstəqil siyasət” sərlövhəli məqalə dərc edib. Məqalədə xalqın İ.Əliyevə inamı, siyasi irsə sadiqliyi və bu il aprelin əvvəlində cəbhə bölgəsində baş verən hərbi əməliyyatlar təhlil edilir.

Müəllifə görə, aprel döyüşləri ordunun gücünün və xalqın birliyinin nümayişi idi və bu arada ölkə rəhbəri kimi İ.Əliyevin müstəsna rolunun olması xüsusi qeyd edilir: “Dövlət başçısının ordu quruculuğu ilə bağlı əvvəlcədən gördüyü hərtərəfli tədbirlər bu gün düşmənə  sarsıdıcı zərbələr vurmağa imkan verir. Müdafiə məqsədilə ayrılan hərbi xərclərin ildən ilə artırılması, eləcə də ölkədə hərbi təyinatlı məhsulların istehsalını həyata keçirən sənaye müəssisələrinin qurulması ordu quruculuğu baxımından vacib əhəmiyyətə malikdir. Azərbaycan müxtəlif xarici ölkələrdən hərbi texnika alır, ordunun arsenalında olan bir sıra texnikanın modernləşdirilməsini həyata keçirir”.

Müəllif bütün bunları dövlət başçısı İ.Əliyevin Azərbaycanı müasir və qüdrətli dövlətə çevirmək üçün atdığı konkret addımlar kimi dəyərləndirir.

Hüquq sistemi cəza aparatına dönəndə

“Azadlıq” qəzeti rəsmi Bakının AXCP-yə qisasçılıq mövqeyindən yanaşmasına dair məqalə dərc edib və qisasçılığın qanunvericilik səviyyəsində həyata keçirildiyi vurğulanır. “Uzun illərdir ki, hakimiyyət qanunları, məhkəmələri, Cinayət Məcəlləsini rəqiblərə qarşı cəza vasitəsinə, qisas aparatına çevirib. Bu ölkədə günahsız insanı şərləmək, vicdanlı insanı “vətən xaini” kimi təqdim etmək şəxsi mülkiyyəti zorla mənimsəmək adi hala çevrilib”. 

Daha sonra məqalədə 10-dan çox AXCP üzvünün həbsdə olduğu,  hakimiyyət və hüququn onlara “xüsusi münasibət” bəslədiyi nəzərə çatdırılır: “Bu gün də bu iyrənc ənənə davam edir. Hazırda 10-a yaxın AXCP üzvü həbsdədir. Məhkəmə proseslərində onların günahsızlığı sübut edilib, ittihamların qondarma olduğu aydın görünüb. Sadəcə, sifariş yuxarıdan gəldiyi üçün məhkəmə, qanun, hüquq aciz qalıb”.

Məqalədə AXCP sədri Fuad Qəhrəmanlının ittihamının ağırlaşdırılması xüsusi qeyd olunur və belə münasibət ifadə edilir: “Əlbəttə, vicdanı olan, içində ləyaqət hissi olan heç kim bu iyrəncliyi özünə sığışdıra bilməz. Amma mənəviyyatı epidemiyaya yoluxmuş adamlar hələ də var və bu adamlar bütün müqəddəs dəyərləri əzməyə hazırdırlar”.

AXCP-yə hakimiyyətin belə münasibəti barədə məqalədə oxuyuruq: “İlham Əliyevin yaratdığı, inkişaf etdirdiyi və “yaşıl işıq” yandırdığı hüquq sistemi bu qədər eybəcər və iyrəncdir. Bütün bunlar acizliyin, qorxaqlığın göstəricisidir. Əgər İ.Əliyev xalqın 97%-nin səsini alıbsa Fuaddan, Asifdən, Seymurdan niyə qorxur?”

Məqalədə son olaraq hakimiyyətə bu qisasçılığın ən ağır zərbəsinin onun özünə dəyəcəyi barədə xəbərdarlıq edilir.

Qarabağ problemi -Xalq sözünün zamanı

“Novoye Vremya” qəzeti Qarabağ münaqişəsinin tənzimlənməsilə bağlı Azərbaycan və Ermənistan dövlət başçılarının iştirakı ilə mayın 16-da Vyanada keçirilmiş danışıqların təfərrüatı və əldə edilən nəticələr haqda yazır.

Müəllifə görə, bu, rəsmi Bakının status-kvo- ya məcbur edilməsidir və buna görə də məqalə “Bakının status-kvo-ya məcbur edilməsi” adlanır. Məqalədə Ermənistan dövlət başçısı Sarkisyanın Yerevandakı açıqlamalarına toxunulur və bu açıqlamaların sonucu olaraq qənaətlər oxucu ilə bölüşülür: “Sarkisyanın dediklərindən əldə edilən nəticə budur ki, danışıqlar prosesinin iştirakçıları münaqişə tərəflərini nəyəsə məcbur etmək istəyirlər. Qarabağın statusu məsələsində tərəflərin bir-birinə zidd mövqelərini nəzərə alsaq burada söhbət ciddi güzəştlərdən gedir”.

Məqalədə deyilir ki, erməni tərəf Dağlıq Qarabağ ətrafında 5 rayonun Azərbaycana qaytarılması, Dağlıq Qarabağa aralıq statusunun verilməsi və sülməramlı qüvvələrin yerləşdirilməsi variantına üstünlük verir. Azərbaycan tərəfi isə ölkə Konstitusiyasında ölkənin bir hissəsində referendum keçirilməsinin nəzərə alınmadığını bəyan edir.

Müəllifə görə, rəsmi Bakının qarşısına “ya status-kvo, ya Qarabağın tanınması” şərti qoyulub: “Bu iki variantın heç biri bizim xeyrimizə deyil. Beləliklə, faktiki olaraq geosiyasi qüvvələr sözdə Azərbaycanın ərazi bütövlüyünü dəstəklədiklərini desələr də  əməldə Bakıdan Dağlıq Qarabağı tanımağı tələb edirlər. Tarixi məntiqə görə, istər hərbi, istər siyasi və istərsə də iqtisadi baxımdan indi öz sözünü Azərbaycan xalqı deməlidir”.

Ekspert: “Azərbaycan ticarət bazarlarını itirir”

“Exo” qəzeti ölkədən ixracın azalmasını ekspertlərlə müzakirə edir. Belə ki, ekspert Nəriman Ağayev bütün bu azalmaların arxasında neftin qiymətinin enməsini göstərir. “Maşınqayırma və kənd təsərrüfatı sahələrində ixrac azalır. Azərbaycan xarici bazarlarda yerini itirir. Mal ixracı azalan kimi bizim yerimizi başqaları tutur. Bazarda həmin yeri təkrar əldə etmək daha böyük səylər tələb edəcək”.

N.Ağayev Azərbaycan bazarında xarici məhsulların həcm və çeşidlərinin çoxalmasına da diqqət çəkir və deyir: “Bu fakt ölkədə çoxsaylı kiçik müəssisələrin fəaliyyətlərini dayandırmasına şahidlik edir. İş adamları rentabelli idxalla məşğul olurlar”.

N.Ağayevin fikrincə iş adamları maliyyə çətinlikləri səbəbindən istehsal bazarını tərk edirlər. “Azərbaycanın daxili istehsal bazarında boşluqdur. Ölkədə lift istehsal edilsə də xaricdən bu qurğuların gətirilməsinə üstünlük verilir. Passiv münasibət üzündən dünyada mövqelərimizi itiririk. İlbəil Azərbaycandan ixrac azalacaq. Bunu da etiraf etmək lazımdır ki, Azərbaycan xarici ticarət sahəsində düzgün siyasət yeritmir. Bütün göstəricilər üzrə uğurlar olduqca azdır”.

Daha sonra məqalədə rəqəmlərin sadalanması və keçən ilki eyni dövrlə müqayisələrin aparılması ilə ekspert mövqeyinin əsaslı olduğunu ortaya qoyur və bildirir: “Cari ilin ilk 4 ayı ərzində Azərbaycan 152 ölkə ilə ticarət əməliyyatı keçirib, 1503 adda mal ixrac edib, 5391 adda mal idxal olunub”.

Ölkədə turizmin durumu necədir?

“Yeni Müsavat” qəzeti qarşıdakı turizm mövsümü ilə bağlı bu sahədə durumu araşdırır. “Yay da gəlir, turistlər də, bəs,,,” sərlövhəli məqalədə müəllif öncə bu sahədə otellərin qiymətlərinin baha olmasına toxunur.

Belə ki, qiymətlər 120 manatdan başlayaraq 800 manata qədər yüksəlir. Amma bu da qeyd edilir ki, məhz bahalıq üzündən turistlər Azərbaycana gəlməyə maraq göstərmirlər və bütün xidmətlər üzrə Azərbaycandan 2-3 dəfə ucuz xidmət təklif edən Gürcüstana üz tuturlar. Bu sırada Gürcüstana gedənlər arasında azərbaycanlıların da çox olduğu deyilir: “Ölkədəki əksər turizm bölgələrində qiymətlər çox baha olduğu üçün orta statistik azərbaycanlı orada istirahət edə bilməz. Xarici turistlər üçün isə xidmət və çeşidlər qiymətlərə adekvat deyil”.

Ekspertlər isə bu sahənin inkişaf etməsi üçün aşağıdakı təklifi verirlər: “İlk növbədə sahibkarlar azad olmalı, inhisar aradan qalxmalıdır. Xarici ölkələrdə istirahət xarici turistlər üçün daha sərfəli, daha əyləncəlidir, heç kimə sirr deyil ki, Gürcüstanda qiymətlər, təyyarə biletləri, xidmətlər bizdən 2-3 dəfə ucuzdur. Bütün bunların Azərbaycanda olması hələ ki mümkün deyil”.