Media-icmal 19.10.20

“Azərbaycan” qəzeti ”Ermənistan Avropa İttifaqının açıqlamasına isterik reaksiya verərək necə aciz durumda olduğunu bir daha göstərdi” sərlövhəli məqalədə müəllif Ermənistan hərbi-siyasi rəhbərliyinin müharibə cinayətinə yol vermələrini diqqətə çatdırır.

Müəllif deyir ki, oktyabrın 17-i gecə Ermənistan Silahlı Qüvvələri növbəti dəfə Gəncədə mülki əhalini raket hücumuna məruz qoyub.

Müəllifə görə, günahsız insanların qətlinə Avropa İttifaqının (Aİ) dərhal reaksiya verməsi çox böyük əhəmiyyətə malikdir və qurumun bəyanatında bu hücum pislənilir, mülki əhalinin hədəf seçilməsinə kəskin etiraz bildirilir.

Beynəlxalq Münasibətlərin Təhlili Mərkəzinin əməkdaşı Vasif Hüseynov deyir ki, Ermənistanın bəyanata isterik münasibəti aciz durumda olmasının göstərcisidir.

V.Hüseynov deyir ki, oktyabrın 18-də yaydığı açıqlamada Ermənistan XİN Aİ-ni birtərəfli mövqedə, Azərbaycanın Dağlıq Qarabağdakı əməliyyatlarına qarşı bəyanat verməməkdə  ittiham edir.

Şərhçi isə deyir ki, Azərbaycan tərəf Ermənistandan fərqli olaraq barbar yollara əl atmır, yalnız hərbi obyektləri dəqiq zərbələrlə hədəfə alır.

Qeyd etmək lazımdır ki, Avropa İttifaqı Azərbaycanın ərazi bütövlüyünü tanıyır və ölkəmizlə qurum arasında imzalanmış bütün sənədlərdə bu mövqe əks olunur.

V.Hüseynov hesab edir ki, buna görə də Ermənistanın işğal edilmiş Azərbaycan torpaqlarımızda yaratdığı qondarma rejimi tanıtmaq cəhdləri iflasa uğrayır. “Ermənistan dövləti anlamalıdır ki, beynəlxalq ictimaiyyətin mövqeyi birmənalıdır: Azərbaycanın beynəlxalq ictimaiyyət tərəfindən tanınmış ərazi bütövlüyü bərpa olunmalı və işğalçı Ermənistan ordusu Azərbaycan torpaqlarını tərk etməlidir”, - şərhçi vurğulayır.

Xatırladaq ki, oktyabrın 11-nə keçən gecə Ermənistan Gəncəni raket atəşinə tutub. Bunun nəticəsində mülki əhalidən 10 nəfər həlak olub, 30-dan çox adam yaralanıb. Oktyabrın 17-i gecə ikinci raket hücumu zamanı isə 13 nəfər həyatını itirib, 50-dən çox adam yaralanıb.

“Redaktor.az” saytı “Qələbədən sonra Azərbaycanda köklü dəyişikliklər olacaq" sərlövhəli məqalədə Azərbaycanın işğal altındakı  ərazilərinin azad edilməsindən sonra ölkədə köklü dəyişikliklərin olacağına dair iqtisadçı-ekspert Natiq Cəfərlinin düşüncələrinə yer verilib.

N.Cəfərliyə görə, Azərbaycan ordusu ölkənin  ərazi bütövlüyünü bərpa etdikdən sonra  ölkənin həm iqtisadi-siyasi, həm də hərbi nüfuzu kifayət qədər artacaq.

Onun fikrincə, ölkədə aparılan islahatlar müharibədən sonra daha da dərinləşəcək: “Düşünürəm ki, torpaqlarımız işğaldan azad olunduqdan sonra daxili siyasətdə daha rahat davranmaq üçün iqtidarın imkanları yaranacaq. Çünki daxili dəstəklə bağlı prezidentin və onun yeni komandasının bir problemi yoxdur.

Qələbə müjdəli əməliyyatlar, ərazi bütövlüyümüzün bərpası ölkədə hakmiyyətə kifayət qədər ciddi güvən yaradıb. Həmçinin qələbədən sonra Azərbaycan iqtidarı daha ciddi və dərin islahatlar aparacaq.

Ekspert torpaqların azad olunmasından sonra Azərbaycana investorların cəlb olunmasından da danışıb: “Torpaqlar azad edildikdən sonra ölkə iqtisadiyyatı indikindən qat-qat daha güclü olmalıdır. Çünki Ermənistanın vəhşicəsinə dağıtdığı torpaqların düzəldilməsinə, infrastrukturun qurulmasına, yeni yaşayış məskənlərinin salınmasına, iş yerlərinin açılmasına milyardlarla vəsait lazım olacaq. Həmin vəsaitlər tək Azərbaycanın daxili resursları hesabına mümkün deyil”.

N.Cəfərli hesab edir ki, bura beynəlxalq investorlar cəlb olunmalıdır və bu sahədə də ciddi işlər görüləcək.

Bir sözlə, Dağlıq Qarabağın işğaldan azad olunması hazırki iqtidarın bir çox sahələrdə önünü açacaq. Çünki hazırda iqtidarın legitimliklə və xalqdan gələn dəstəklə bağlı heç bir problemi yoxdur”.

“Moderator.az” saytı “Ermənistanın xalqımız üçün “əbədi problem” olaraq qalmasına imkan verməməliyik” sərlövhəli məqalədə isə deputat Vahid Əhmədov hərbi əməliyyatlar gedən ərazilərdə və ondan kənarda baş verən hadisələri dəyərləndirir.

V.Əhmədov erməni tərəfin Gəncəni raket atəşinə tutmasını və mülki əhali  arasında kütləvi itkilərin olmasını 1992-ci ildə baş vermiş Xocalı soyqırımının davamı  kimi dəyərləndirib: “Ermənistanın Azərbaycan xalqına qarşı soyqırım siyasətini davam etdirdiyini bildirən deputata görə, Gəncə, Mingəçevir və s. şəhərlərin ballistik raketlərlə atəşə tutulması, işğalçıya bu günün özündə belə hansısa qüvvələr tərəfindən dəstək verildiyini göstərir”.

Deputat deyir ki, Gəncədə mülki əhaliyə qarşı tətbiqi qadağan olunmuş ballistik raketlərdən istifadə edilib ki, Azərbaycan xalqına qarşı soyqırım siyasətinin davam etdiridiyini göstərir: “Baş verənlər göstərir ki, Ermənistan öz məkrli siyasətini davam etdirməkdə qərarlıdır və humanitar atəşkəs adı altında soyqırım siyasətini davam etdirir. Mülki insanlarımızı qətliama məruz qoyanlarla birgə yaşamaq necə mümkün ola bilər? Ermənistan çox təhlükəli bir oyun oynayır. Hansı ki, bu oyun onun özü üçün ağır nəticələrə səbəb ola bilər. Baş verənlər göstərir ki, hansısa qüvvələr ona kömək edir, işğalçıya ballistik raketlər verir”.

V.Əhmədov yada salır ki, İran da, Rusiya da Ermənistana kömək etmədiyini deyirlər: “Bəs o zaman Ermənistanın mülki insanlarımızı atəşə tutmaq üçün istifadə etdiyi ballistik raketləri haradan, necə əldə edir? Bu raketlər Ermənistanda necə peyda olur?”, - deputat vurğulayır.

Deputat ATƏT-in Minsk Qrupunu problemin həllinə biganə yanaşdığına görə sərt tənqid edib.

Deputata görə, Azərbaycan Türkiyə və Pakistanla hərbi müqavilə imzalamalı, türk hərbi bazaları Azərbaycanda yerləşdirilməli, Ermənistan məsələsi birdəfəlik həll edilməlidir: “Biz uzun illərdir ki, əsas problemimizə çevrilən Ermənistan faktorunun bundan sonra da problem olaraq qalmasına imkan verməməliyik”, - deputat bildirib.