Media-icmal 22.10.20

"Azərbaycan" qəzeti  "Azərbaycan Ordusunun döyüş qabiliyyəti dünya hərbçiləri və ekspertlərini heyran qoyur" sərlövhəli məqalədə Azərbaycan Ordusunun döyüş qabiliyyətini dəyərləndirir.

Müəllif deyir ki, Azərbaycan Ordusunun hazırda apardığı döyüş əməliyyatları dünyanı heyrətə gətirir.

Müəllifə görə, bu, təkcə onuna bağlı deyil ki, döyüş meydanlarında qısa müddətdə böyük uğurlar qazanılıb, həm də bu, ortaya yeni döyüş taktikası nümunəsi qoyulması ilə bağlıdır.

Yazı müəllifi vurğulayır ki, Ermənistan Azərbaycan tərəfdə Türkiyə, Pakistan ordularının əsgərlərinin, Suriyadan gələn terrorçuların vuruşması haqda yalan yaymasını Azərbaycan ordusunun uğurlarını ləkələmək istəyi kimi dəyərləndirir: "Onlar bununla illərdir yaratdıqları "məğlubedilməz Ermənistan ordusu" mifini qorumaq istəyirdilər. Ancaq Azərbaycan Ordusunun endirdiyi sarsıdıcı zərbələr nəticəsində bu mif bir neçə gündə sabun köpüyü kimi yox oldu", deyə bu yalanın səbəbini diqqətə çatdırır.

Daha sonra müəllif ayrı-ayrı dünya ölkələrinin hərbi eskpertlərindən, istefada olan hərbçilərindən sitatlar gətirir və onlar tətbiq edilən döyüş taktikasının öyrənilməsinin vacibliyini bildirirlər. 

Müəllifə görə, artıq heç kəsdə şübhə yoxdur ki, Azərbaycan Ordusu qısa bir zamanda işğal olunmuş bütün əraziləri düşmən tapdağından azad edib və həmin yerlərə üçrəngli Azərbaycan bayrağını sancacaq.

"Yenisabah.az" saytında "Paşinyan indi də İranı oyuna çəkir" sərlövhəli məqalədə müəllif Ermənistanın üçüncü tərəfi münaqişəyə cəlb etmək sahəsindəki cəhdlərini şərh edir.

Müəllifin sözlərinə görə, bu səylər hərbi əməliyyatların başladığı ilk gündən, yəni, sentyabrın 27-dən bu yana davam etməkdədir.

Məqalədə vurğulanır ki, Ermənistan öncə Türkiyənin Cənubi və Şimali Qafqaza nəzarət etmək istəyi yalanını yaymaqla Rusiya ilə Türkiyəni üz-üzə qoymaq istədi.

Amma bu hiylə baş tutmadığı üçün indi də İranı oyuna çəkməyə çalışır.

Ermənistan Səhiyyə Nazirliyi bu günlərdə döyüş meydanında qalan cəsədlərin yoluxucu xəstəliklərə səbəb ola biləcəyini, xətəliklərin Araz çayı vasitəsilə İran ərazisinə yayıla biləcəyini bəyan edir.

Məüllifin fikrincə, İrəvan Tehranın susqunluğundan narazıdır, odur ki, hər vəchlə İranı münaqişəyə cəlb etməyə çalışır.

İranın "İran" qəzetinə müsahibəsində isə Paşinyan iddia edib ki, Qarabağda Azərbaycan tərəfdən terroçu  qruplar döyüşür və region ölkələri bundan narahat olmalıdır.

Müəllifə görə, terrorçu qrupların Azərbaycan tərəfdən döyüşdüyünü sübut edən hər hansı fakt yoxdur, odur ki, dünya artıq bu iddiaları qəbul etmir.

Müəllifin sözlərinə görə, Qarabağda həqiqətən terrorçu qruplar döyüşür, onlar ermənilər tərəfindən savaşa cəlb olunublar, Ermənistan tərəfi bu məlumatları təkzib belə etmirdi.

Müəllifin fikrincə, region dövlətlərinin xüsusilə İranın "qayğısına qalan" İrəvan bu dəfə elə həmin ölkələrin ərazilərində terror aktları planlaşdırır, sonradan isə törədəcəyi terror aktını Azərbaycanın ayağına yazacaq, İran və Rusiyanın münaqişəyə müdaxilə etməsinə çalışacaq.

"Redaktor.az" saytı isə "Şuşa və Xankəndinə gedən əsas yollar ordumuzun nəzarətində" sərlövhəli məqalədə hərbi əməliyyat rayonunda vəziyyəti ekspert Abuzər Əbilovla dəyərləndirir.

İşğaldan azd edilən ərazi və yaşayış məntəqələrinin strateji əhəmiyyətindən danışan ekspertə görə, Zəngilanın iki mühim əhəmiyyəti var.

O əlavə edir ki, Zəngilan rayonu Dağlıq Qarabağın "Üç küncündə" yerləşir, oradan artıq Azərbaycan-İran sərhədi tamamilə Azərbaycan sərhəd qoşunlarının nəzarətinə keçir.

"Əsası isə Zəngilandan Qubadlıya, Laçına gedən və Ermənistanla Dağlıq Qarabağı bağlayan iki yol bağlanır. Bundan əlavə, şəhərdən aşağıya tərəf, yəni, bir hissəsi Cəbrayıl tərəfdən, bir hissə də Zəngilan rayonu tərəfdən Dağlıq Qarabağın ürəyinə - Xankəndinə, Şuşaya, Ağdarəyə yol açılır. Bununla da düşmənin bütün qoşunlarını məhv eləmək üçün ən böyük strateji ərazilər bizim nəzarətimizə keçir".

İşğaldan azad edilən Çinarlı adı verilən Vəng kəndinin strateji əhəmiyyətindən danışan eskpert deyir: "Çinarlı kəndi birinci Qarabağ savaşında ən qanlı döyüşlərin getdiyi bir ərazi olub. Bu strateji yüksəklik həddindən artıq böyük bir əhəmiyyətə malikdir. Ermənilər Çinarlıda güclü istehkamlar qurmuşdu. Amma bu istehkamları Azərbaycan ordusu məhv elədi".

Strateji əhəmiyyətə malik Çinarlı kəndindən bütün Qarabağın ərazisinə - Xankəndi, Şuşa və Ağdərənin ərazisinə yolumuz açılıb. Bir sözlə, faktiki olaraq Azərbaycan ordusu Qarabağın ən vacib strateji yüksəkliklərinə nəzarət edir.

"Moderator.az" saytında isə "Torpaqlarımızın işğaldan azad edilməsi iqtisadi inkişaf tempinin artmasına səbəb olacaq" sərlövhəli məqalədə müəllif işğaldan azad edilən torpaqlarda iqtisadi həyatın canlanması barədə deputat Vahd Əhmədovla söhbətləşir. 

Deputat hesab edir ki, Qarabağ torpaqlarının kənd təsərrüfatı üçün çox böyük əhəmiyyəti var, məhsuldar torpaqlardır: "Orada taxıl, tərəvəz və s. kimi ən müxtəlif məhsullar yetişdirmək mümkündür. Qarabağda 1 milyon hektara yaxın kənd təsərrüfatı üçün yararlı torpaq var", deyə V.Əhmədov bildirir.

Onun fikrincə, bu torpaqların kənd təsərrüfatına cəlb olunması sözügedən sahənin inkişafı üçün böyük imkanlar açacaq.

Deputat əlavə edir ki, Qarabağdakı dağlıq rayonlarımız heyvandarlıq baxımından da mühüm əhəmiyyət kəsb edir. O deyir ki, Qarabağ həm əklinçilik və heyvandarlıq, həm də turizm baxımından mühüm fayda verəcək. Qarabağın özünəməxsus flora və faunası mövcuddur. Hətta arıçılığın inkişaf etdirilməsi üçün gözəl imkan var.

Deputata görə, bundan öncə isə oradakı yol və körpülərin bərpa edilməsi, su, qaz, işıq təminatının həyata keçirilməsi, lazımi infrastrukturun formalaşması reallaşacaq. "Bir sözlə, torpaqlarımızın işğaldan azad edilməsi iqtisadi inkişaf tempinin əhəmiyyətli dərəcədə artmasına səbəb olacaq", deyə V.Əhmədov bidirib.