Media-icmal 23.02.2016

“Neft pulları ölkəyə gələn zamanlar magistral yolların, xüsusilə Bakı-Astara və Bakı-Qazax yolu üstə yaşayış məntəqələrinin hər iki tərəfdən hasarlanmasının şahidisiniz”. Milli Şuranın sədri Cəmil Həsənli bunu “Azadlıq” qəzetində qeyd edir. O, bu hasarlamanı ironiya ilə “böyük neft erası dövrünün ağlagəlməz “tikintiləri” adlandırır.

Onun fikrincə, əgər böhran araya girməsəydi bütün yollar hər iki tərəfdən belə hasarlanacaqdı və “bütün bunlar hamısı böyük neft erası dövründəki pulları dağıtmaq üçün ağlagəlməz uydurmalar idi”. C.Həsənli bütün baş verən faktları pul silmək üçün vasitə kimi dəyərləndirir. “”Əslində yolkənarı hasarlar onların “memar”larının, xüsusilə yerdəki idarəçilərin uzağa baxmaq, ətrafı görmək həvəs və arzusunun olmamasının ifadəsidir. Belə dar düşüncə ilə böhrandan çıxmaq mümkündürmü?”, - Milli Şuranın sədri cəmiyyətə sual ünvanlayır.

Azərbaycanın öz hərbi potensialını 217% artırması Avropada silah idxalını 264% artırıb və Avropada Rusiya silahının əsas idxalçısıdır. “Exo”  qəzeti bunu “lenta.ru”ya isnadən verir. Öz növbəsində hərbi ekspert Üzeyir Cəfərli müstəqilliyin ilk illərində ölkənin Rusiyadan daha çox sılah aldığını deyir.

“İndi meyl bir az dəyişib, Rusiyadan ancaq “Favorit” zenit-raket, “Smerç” zenit-qurğuları, hərbi helikopterlər alınır. Rusiyadan başqa Azərbaycan bu sahədə İsrail, Pakistan, Türkiyə, Ukrayna Belarusla da əməkdaşlıq edir”, - Ü.Cəfərli bildirib.

“ABŞ səfiri hansı yanaşmadan danışır?”, - müəllif A.Məmmədov “Novoye Vremya” qəzetindəki məqaləsində ABŞ səfiri R.Sekutanın ölkə mətbuatında dərc edilən yazısında ABŞ-ın Azərbaycanda sabitlik və rifaha dəstək verməsi fikrinə etiraz bildirir. “Açıq danışsaq nə bizim ölkə, nə bizim xalq ABŞ-dan xüsusi bir kömək görmür, nəqliyyat və energetika dəhlizlərində sabitiyə gəlincə, bu məsələdə Ağ Ev heç də Azərbaycandan az maraqlı deyil”, - müəllif burada ABŞ-ın marağının əsas rol oynadığını vurğulayır.  

30 ilə yaxın müddətdə Qarabağ məsələsinin həll edilməməsinin məqalədə Azərbaycanla strateji tərəfdaşılq çərçivəsinə sığmadığı iddia ediir.

“Amerikalılar daim bizim ölkədə demokratik institutların inkişaf etdirilməsindən danışırlar, bəs hanı o institutlar? Lazım olanda biizm ölkədə insan haqlarının pozulduğunu görürlər, lazım olmayanda görmürlər”, - müəllif ABŞ-ı bu məsələdə ardıcıl olmamaqda ittiham edir.

“Dəfələrlə qeyd etdiyim kimi, təhlükəsizlik, demokratiya və iqtisadiyyat /enerji/ sahələri ABŞ və Azərbaycan arasında olan münasibətləri təşkil edən üç önəmli sahədir”, - R. Sekuta Azərbaycana ABŞ-ın səfiri təyin olunmasının ildönümü ilə bağlı “Yeni Müsavat” qəzetində dərc edilən məqaləsində iki dövlət arasında prioritetləri göstərir.  

O, sözügedən sahələrin bir-biri ilə sıx bağlı olduğuna görə onların  birinin digərini üstələyə bilmədiyini bildirir. “Sağlam iqtisadiyyat ölkənin təhlükəsizliyinin əsasıdır. Yalnız qanunun aliliyinin və insana hörmətin təmin olunduğu cəmiyyətdə tam iqtisadiyyat potensialı əldə etmək mümkündür. Demokratik cəmiyyətlər isə vətəndaşların təhlükəsizliyi qorunanda çiçəklənə bilər. Sözügedən bu amillər Azərbaycanın uzunmüddətli sabitliyi və firavanlığı üçün zəruridir”, - səfir bu üç sahə arasındakı bağları anladır.  

ABŞ həmişə Azərbaycanın davamlı sabitliyini və firavanlığını dəstəkləyib. “Sabit və firavan Azərbaycan istər terrorçuluğa qarşı mübarizə, istər mövcud ticarət və iqtisadiyyat dəhlizlərinin inkişafı və eyni zamanda yeni dəhlizlərin yaradılması, istərsə də qlobal enerji mənbələrinin və dəhlizlərinin sabitliyinin qorunması və diversifikasıyası kimi fəaliyyətlərdə bölgədə və dünyada sabitlik və firavanlığın əldə olunmasında önəmli rol oynayır”, - səfir fikrini əsaslandırır.

“Biz dostuq yoxsa yox?” sualına “bəli” cavabını Azərbaycanın Sovet İttifaqından sonra müstəqil olduğu 25 ilin hər birinə şamil etmək olar. Əminəm ki, gələcək 25 ildə və ondan sonrakı dövrdə də bu sualın cavabı “bəli” olacaq”, - səfir iki ölkə arasında münasibətlərin dayanqılı olmasına toxunur. 

“Azərbaycanda üçüncü devalvasiya gözlənilir”. “Bunu isə “Bizim yol” qəzeti ekspertlərə isnadən yazır. Qəzet həm də ekspertlərin hələ keçən ildən etibarən hökumətin antiböhran tədbirlərinin zəif və yetərsiz odluğunu da bəyan etdiklərini xatırladır. 

“Gəlirlər azalıb, anna ehtiyaclar yerində qalıb, problemli kreditlər artıb, devalvasiyadan sonra yaranan şərait də yerində qalır və bu mənada antiböhran istiqamətində hər hansı bir iqtisadi islahat yerinə yetirilməyib”,- ekspert Natiq Cəfərli qənaətini bölüşür. N.Cəfərli ölkəni bu durumdan xilas etmək üçün investisiya cəlb olunmasına, investisyanı cəlb etmək üçün müstəqil və ədalətli məhkəmə sisteminə ciddi ehtiyacın olduğunu  xatırladır.

“Əsas səbəb iqtisadiyyatın hazırlıq səviyyəsinin çox aşağı olmasıdır”, - ekspert devalvasiya baş verməsinə səbəbi göstərir. Onun firkincə, indiki böhran təkcə maliyyə böhranı deyil, bütünlükdə siyasi-iqtisadi islahatlar tələb edən böhrandır. Odur ki, burada “kosmetik tədbirlər”lə vəziyyətdən çıxmaq heç mümkün də deyil.

Manatın undiki dəyərini real saymayan hər iki ekspert bundan irəli gələrək növbəti devalvasiyanın qaçılmaz olduğunu birmənalı bildirir.