Media-icmal 24.08.20

Neft-qaz sahəsində milli işçi qüvvəsinin yetişdirilməsi, deputatdan karantin davranışının bilərəkdən pozulması iddiası, təhsili necə tədris etməli, biznesin problemləri və s. məsələlər medianın aparıcı mövzuları sırasındadır.

90:10 nisbətindən 10:90 nisbətinə

“Azərbaycan” qəzeti  “Neft-qaz sənayesində milli işçi qüvvəsi yetişdirmək yenə də gündəmdədir” sərlövhəli məqalədə bəhs edilən sahədə görülən fəaliyyəti dəyərləndirir.

1994-cü ildə "Əsrin müqaviləsi” adlı neft kontraktları imzalandıqdan sonrakı ilk illərdə saziş çərçivəsində dənizdə və quruda həyata keçirilən layihələrdə çalışanların 90 faizi xarici vətəndaşlar olub, işçilərin yalnız 10 faizi Azərbaycan vətəndaşları idi. Bu istiqamətdə əsas hədəf isə nisbəti Azərbaycanın xeyrinə 90:10 nisbətinə dəyişmək idi.

2018-ci ilin ortalarından  Azərbaycanda ən iri neft-qaz və ixrac layihələrinin əməliyyatçısı olan BP-nin ixtisaslı işçilərinin 90 faizini milli kadrlar təşkil edir. Hazırda şirkətdə çalışan ölkə vətəndaşlarının sayı 2485 nəfərdir.

Müəllif deyir ki, indi şirkətin təkcə ofisindəki işçilərin deyil, podratçı və subpodratçı müəssisələrində çalışanların da tərkibinin 90 faizi milliləşdirilib.

“Azərbaycanda güclü milli işçi qüvvəsi yetişdirmək şirkətin əsas prioritetlərindən biri olaraq qalır.

Müəllifə görə, milli işçi qüvvəsi yetişdirmək daim gündəmdə olan məsələlərdən biridir və əsas şərt şərt işçinin düzgün seçilməsidir.

Müəllif hesab edir ki, bu səbəbdən də əməkdaşların işə götürülməsində, vəzifədə irəli çəkilməsində hər kəsə qabiliyyətinə görə imkan yaratmaq öhdəlik kimi qəbul olunub.

Onlar bilərəkdən qaydaları pozurlar- deputatdan iddia

“Redaktor.az”da dərc edilən “Onlar bilərəkdən qaydaları pozurlar - qalmaqallı toy...” sərlövhəli məqalədə deputat Adil Əliyevin düşüncələrinə yer verilib.

Milli Məclisin sədr müavini, deputat Adil Əliyev bəzi səlahiyyətli şəxslərin sərt karantin rejiminə əməl etmək istəməmələrinə təəssüfləndiyini bildirib və onun fikrincə, onlar qaydaları bilərəkdən pozurlar.

“Bəzi səlahiyyətli şəxslər sərt karantin rejiminə əməl etmək istəmirlər.

Qaydalardan kənara çıxırlar. Onlar bilərəkdən qaydaları pozurlar. Karantin rejiminin qorunması yönündə görülən işlərə kölgə salırlar. Bununla da cəmiyyətdə inamsızlıq və etibarsızlıq yaradırlar. Hamılıqla qaydalara əməl etməliyik ki, vəziyyət nəzarətdən çıxmasın”.

Qeyd edək ki, AMEA prezidenti, akademik Ramiz Mehdiyevin nəvəsi (sabiq millət vəkili İlham Əliyevin qızı) üçün villada baş tutan təntənəli toy mərasimi və bu mərasimdə bir çox sabiq və hazırkı məmurların iştirakı ciddi müzakirə mövzusuna çevrilib.

Ənənəvi, yoxsa, on-layn təhsil?

“Oxu.az” saytı isə “Ekspert: “Tədris prosesini ölkə boyu ənənəvi rejimdə bərpa etmək mənasızdır” sərlövhəli məqalədə müəllif qarşıdakı tədris ilində dərslərin təşkili məsələsini ekspert Qoşqar Məhərrəmovla dəyərləndirir.

Ekspert COVİD-19 pandemiyası ilə bağlı ölkənin müxtəlif  bölgələrində epidemıoloji vəziyyətin dəyişik halda olduğunu, buna görə də təhsil prosesini bərpa məsələsinə fərqli yanaşmağın lazım gəldiyini iddia edir.

Q.Məhərrəmova görə, tədris prosesini ölkə boyu ənənəvi rejimdə bərpa etmək mənasızdır: “Karantinin tamamilə ləğv olunduğu bölgələrdə ənənəvi təhsil formasına qayıtmaq olar. Əlbəttə ki, vacib tədbirlərə riayət etmək şərti ilə”.

Karantin rejiminin daha sərt tətbiq olunduğu zonalara gəldikdə, Q.Məhərrəmovun fikrincə, burada tədris prosesi Azərbaycan Təhsil İnstitutunun bu günlərdə verdiyi tövsiyələr əsasında təşkil edilə bilər.

“Bu vəziyyətdə dərs günlərinin, saatların sayı, həmçinin siniflərin sıxlığının azaldılması üçün tədbirlər görmək vacibdir. Bəzi şagirdlərin bazar ertəsi, çərşənbə və cümə günləri, digərlərinin isə çərşənbə axşamı, cümə axşamı və şənbə günlərində məktəbə getməsi daha məqsədəuyğundur”, -  ekspert vurğulayıb.

Biznesin “ayağa qalxmaq” problemləri

“Müsavat.com” da  “Karantin yumşaldı, amma sahibkarların cibi çətin dola -səbəblər” sərlövhəli məqalədə biznesin problemləri ekspert Samir Əliyevlə müzakirə edilir.

Ekspert S.Əliyev deyir ki, böhran dövründə şirkətlərin iki önəmli problemi olur və hazırda onların həllinə böyük ehtiyac var.

Problemin biri məhsul satlmamasıdır, çünki tələbat azalır və hazırda şirkətlərdə analoji vəziyyət yaranıb.

Ekspertə görə, ikinci problem maliyyə əldə etməkdir, əgər məhsul sata bilmirsə, deməli: maliyyəsi də olmur, borcu qaytarmaq imkanından da məhrum olur, çünki əksər müəssisələr kredit hesabına fəaliyyət göstərirlər.

“Banklar da təzyiq göstərirlər ki, müəssisələr borcu qaytarsınlar. Satış məsələsi ərzaq məhsullarında yaxşı olsa da digər sahələrdə tələbat azalır. Xarici ölkələrdə bu tələbi normada saxlamaq üçün əhaliyə maliyyə dəstəyi verilir.

“Bu Azərbyacanda fərqli şəkildə, yəni maaşların saxlanılması, sahibkarlara müəyyən maddi yardımların verilməsi kimi həyata keçirildi. Sahibkarların maliyyə vəsaitlərinə çıxışına banklardan müəyyən dəstək olsa da tam olaraq  hamısını əhatə etmədi. Daha çox borcunu vaxtında ödəyən sahibkarlara yardım edildi. Ödəyə bilməyən sahibkarlar üçün isə kredit tətilindən söhbət getmədi. Bu isə o deməkdir ki, sahibkar aldığı krediti qaytarmalıdır”.

Ekspertin fikrincə, biznesə dəstək verilməlidir, ilk dəstək də  kreditlərlə bağlı olmalı, kredit tətili verilməlidir. Onun fikrincə, ikinci məsələ kredit faizləridir, şirkətlər heç borcu qaytara bilmirlər, odur ki, faizsiz maliyyələşmə təmin edilməli idi.

Daha bir dəstək əhalinin maliyyə əlçatanlığının artırılması və istehlak kreditləri ola bilər. S.Əliyev əlavə edir ki, indiki halda istehlak kreditlərinin azaldılması uğurlu addım deyil. Əhalinin istehlak kreditlərinə çatımı olmalıdır ki, tələb formalaşsın.

Ekspert  hesab edir ki, istehsalı dəstəkləyən proqramların həyata keçirilməsi vacibdir, daxili turizmin inkişafına dəstək verilməlidir.