Media-icmal 26.02.21

“Yenisabah.az”  saytı “Hökumət çörək sexləri ilə “centlmen sazişi” bağlamalıdır” sərlövhəli məqalədə  çörəyin qiymətinin qalxması iddialarını  iqtisadçı-ekspert Natiq Cəfərli ilə dəyərləndirir.

Müəllif  yolların buz bağlaması (fevralın 23-24-də qar yağması və yolların buz bağlaması nəzərdə tutulur-red.) ilə çörək qıtlığının yarandığını, fevralın 25-dən isə bəzi satış mərkəzlərində çörəyin qiymətinin qalxdığını iddia edir.  

N.Cəfərli isə bahalaşma iddialarının səbəblərini izah edərək deyir ki, ölkədə çörəyin qiyməti dövlət tərəfindən tənzimlənmir, idxal edilən taxılın bahalaşması çörəyin qiymətinə təsir göstərə bilir.

“... Nazirlər Kabinetinin qərarına əsasən bəzi taxıl idxalı ƏDV-dən azad edildi və nəticə etibarilə bu da qiymətlərin tənzimlənməsinə müsbət təsir göstərəcək bir amilə çevrilməli idi. ƏDV-dən azad olunmuş taxılın ölkəyə gəlməsi hələ yeni başlayıb”, - ekspert səbəbi izah edir.

N.Cəfərli deyir ki, fevralın 1-dən Rusiya ixrac etdiyi taxılın rüsumunu 25 avrodan 50 avroya qaldırıb, bu, kifayət qədər ciddi artımdır və ölkədəki qiymətlərə təsir edir, çörəyi bahalaşdıran amilə çevrilir. Ekspertə görə, qiymət bahalaşmasının daha bir səbəbi dizel yanacağının qiymətinin bahalaşmasıdır (2021-ci il yanvarın 4-də ölkədə dizelin qiyməti  60 qəpikdən 80 qəpiyə qaldırılıb-red.). 

N.Cəfərli əlavə edir ki, gələcəkdə qiymətin bahalaşması istənilmirsə, dövlət çörək sexlərinə müəyyən vergi güzəştləri tətbiq etməli, bu güzəştlərin müqabilində qiymətlərin bahalaşmaması ilə bağlı “centlmen sazişi” bağlamalıdır.

“Axar.az”  saytı “Üçüncü Qarabağ savaşı başlaya bilər - Ruslar tərəf tutacaq?” sərlövhəli məqalədə Üçüncü Qarabağ Müharibəsi iddialarını eks-xarici işlər naziri Tofiq Zülfüqarovla müzakirə edir.

T.Zülfüqarov bu iddiaya inamlı yanaşmır: “Bundan sonra Azərbaycan və Ermənistan arasında genişmiqyaslı bir müharibənin olması real deyil. Çünki 44 günlük müharibə zamanı Ermənistan ordusuna dəyən ziyanın yaxın 50 ildə bərpa ediləcəyi çətin məsələdir”, - eks-nazir iddiaya münasibətini ifadə edir.

Amma buna baxmayaraq, keçmiş nazir Üçüncü Qarabağ Müharibəsinin başlaya bilməsi ehtimalını da arxa plana keçirmir: “Lakin bu, heç də Birinci və ya İkinci Qarabağ müharibəsi kimi genişmiqyaslı bir müharibə olmayacaq. Məsələ ondadır ki, indiki halda rəsmi İrəvanın Azərbaycanla müharibə etmək üçün nə kifayət qədər hərbi gücü, nə də müharibəyə cəlb edəcək canlı qüvvəsi var. Bununla belə, Xankəndidəki keçmiş və qondarma “DQR”in ehtimal edilən təxribatları və ya yaradacağı gərginlik qarşısında Azərbaycan tərəfi hərbi əməliyyatlara başlaya bilər. Yəni III Qarabağ Müharibəsi mahiyyət etibarilə antiterror əməliyyatı olacaq”, - ehtimal olunn müharibənin mahiyyətinə toxunur.

T.Zülfüqarova görə, bu ehtimal reallaşsa belə rus sülhməramlıları tərəf olmayacaq, səbəb də budur ki, bu konteingentin silahı, sadəcə, öz təhlükəsizliyini qoruyacaq qədərdir.

“Bizimyolinfo.az”  saytı “Məmur korpusunda irimiqyaslı təmizləmə əməliyyatı olacaq”“Tezliklə “Dəmir yumruq-2” əməliyyatı başlayacaq. Amma bu dəfə hədəf və məkan fərqli olacaq” sərlövhəli məqalədə “kadr təmizliyi” iddialarından bəhs olunur.  

Sosial Tədqiqatlar Mərkəzinin mətbuat xidmətinin rəhbəri Əziz Əlibəylinin iddiasına görə, xalq arasında  hakimiyyət qollarına qarşı yaranmış inamsızlıq bu əməliyyatın keçirilməsini zərurətə çevirib.

“Dəmir yumruq 2” bu dəfə xarici yox, daxili düşmənlərin başına enəcək.

Bu o deməkdir k, biz “Dəmir yumruq” əməliyyatı ilə düşməni məhv etdik. İndi ikinci bir dəmir yumruq əməliyyatı ilə daxilimizdə xalqa qənim kəsilənlərə qarşı mübarizə başlayacaq” deyə Ə.Əlibəyli bu əməliyyatın mahiyyətini izah edir.

Xidmət rəhbəri deyir ki, yeni əməliyyat gözlənilir, bu dəfə məkan və səbəblər fərqli olacaq. İdarəçilkdə ciddi şəkildə  problemlər yaşanır və məmur korpusunda mənimsəmə faktları çoxdur, süründürməçilik var.

Ə.Əlibəyli vurğulayır ki, ölkə rəhbəri dəfələrlə bununla bağlı xəbərdarlıq edib, amma ölkənin birinci prioriteti torpaqların azad edilməsi idi, indi diqqət insanları narazı salan, xalqla prezident arasındakı körpüləri yandırmaq istəyən şəxslərədir və onlara qarşı irimiqyaslı mübarizə tədbirləri başladılacaq.

“Hesab edirəm ki, bu “Dəmir yumruq 2” ifadəsilə möhürlənməlidir. Ona görə həm qalibiyyətlə başa çatmalıdır, həm də elə bu da xalqın  düşmənlərinə qarşı yönəlmiş  əməliyyatlar olacaq”, - Ə.Əlibəyli bildirir.

Onun deməsinə görə, yaxın günlərdə  daxilə yönələn “Dəmir yumruq 2” əməliyyatlarına şahidlik olunacaq və bu, bütün sahələri və bütün pillələri əhatə edəcək.

“Sfera.az”  saytı  “Artıq pandemiyanın dinamikası nəzarət altındadır” – “Yazın gəlişi ilə...” sərlövhəli məqalədə müəllif qarşıdakı aylarda koronavirus infeksiyası ilə bağlı vəziyyətin necəliyini tibb professoru Adil Qeybulla ilə dyərləndirir.     

Müəllif deyir ki, yaz fəslinin yaxınlaşması ilə mövsümi infeksion xəstəliklərin artması gözlənilir, bu isə koronavirusa yoluxmanın da çoxalacağı ilə bağlı narahatlıqları artırır.

Müəllifə görə, hətta mart ayının ortalarından etibarən yoluxmanın yenidən pik həddə çatacağı və sərt karantin rejiminin tətbiqi kimi məsələlər də gündəmdədir.

Professor Adil Qeybulla isə narahatlığa əsas olmadığını və vəziyyətin daha da stabilləşəcəyini bildirib.

Onun deməsinə görə, yaz-yay aylarında koronavirusa yoluxmada artımın olması ilə bağlı çox müzakirələr gedir: “Bu günlərdə Ümumdünya Səhiyyə Təşkilatının rəhbəri də bildirdi ki, artıq pandemiyanın dinamikasını nəzarət altına almaq mümkün olub. Yəni, bu o deməkdir ki, xəstəliyi lokallaşdırmaq üçün imkanlar var. Hesab edirəm ki, vaksinasiya uğurla həyata keçirilsə biz qarşıdakı aylarda yoluxmanın daha da azaldığını görəcəyik, nəinki artımın olmasını...””