Media-icmal 30.03.2017

Ölkədə pambıqçılığın inkişafı, ölkə həbsxanalarındakı durum, nazirin açıqlamalarına baxış və mənzil bazarındakı durum bugünki medianın aparıcı mövzusudur...

Pambıqçılıqda yeni mərhələ

“Azərbaycan” qəzeti “Pambıqçılığın inkişafında dönüş mərhələsi başlayıb” (http://www.azerbaijan-news.az/index.php?mod=3&id=118862) sərlövhəli məqalədə ölkədə bu sahənin inkişaf etdirilməsini dəyərləndirir.

Müəllif deyir ki, ixracyönümlü məhsulların istehsalı ölkə qarşısında prioritet olaraq dayanır, bu istiqamətdə zəruri tədbirlər həyata keçirilir və bu gözlənilən nəticənin əldə olunmasına şərait yaradacaq: “Prezident İlham Əliyevin sədrliyi ilə Saatlıda pambıqçılığın  inkişafı məsələlərinə həsr edilən ikinci respublika müşavirəsinin keçirilməsi dövlətin bu sahəyə olan diqqət və qayğısını bir daha göstərdi”. 

Məqalədə ölkədə pambıqçılığın inkişafının XX əsrin 70-80-ci illərində keçmiş prezident Heydər Əliyevin adı ilə bağlı olduğu və bu sahənin o zaman inkişaf etdirilməsinin yüksək həyat şəraiti yaratmağa imkan verdiyi deyilir.

Müəllif H.Əliyev siyasətini davam etdirən dövlət başçısı İlham Əliyevin qeyri-neft sektorunun, o cümlədən pambıqçılığın inkişafına xüsusi qayğı göstərdiyini bildirir: “Sahibkarlığa Kömək Milli Fondunun xəttilə bu kateqoriyadan olan vətəndaşlara 2 milyard manatdan çox güzəştli kreditlər verilib. Bu kreditlər hesabına 10 minlərlə yeni iş yerləri, yeni müəssisələr yaradılıb, bu ilin ilk iki ayında sənaye 5%, kənd təsərrüfatı 3%-dən çox artıb”. 

Müəllif vurğulayır ki, bu sahənin daha da inkiaşf etdirilməsilə bağlı dövlət başçısı İlham Əliyev Saatlıdakı müşavirədə bildirib: “Pambıqçılığın ölkə iqtisadiyyatına çox böyük xeyri var. Bu, ölkəmizə valyuta gətirir və pambıq elə bir məhsuldur ki, dünya birjalarında satılır. Ona görə pambığın və mahlıcın satışı üçün bazarları aramaq lazım gəlmir və bu, əlbəttə ki, böyük üstünlükdür. Eyni zamanda, pambıqçılıq əməktutumlu kənd təsərrüfatı sahəsidir. Keçən il pambıqçılığa 10 minlərlə insan cəlb edilmişdir. Bu il bu rəqəm daha da böyük olacaq”.

Müəllif deyir ki, dövlət proqramları çərçivəsində həyata keçirilən tədbirlər regionlarda sahibkarlığın inkişafını sürətləndirib, buradakı əmək ehtiyatlarından, təbii iqtisadi resurslardan kifayət qədər səmərəli istifadəyə, əhalinin əmək məşğulluğunun artırılmasına və yoxsulluğun azaldılmasına zəmin yaradıb.    

Məhkum çox, zindan az

“Exo” qəzeti “Hüquq müdafiəçisi: Azərbaycan həbsxanaları həddən artıq yüklənib, yeniləri lazımdır” (http://ru.echo.az/?p=58047) sərlövhəli məqalədə müəllif ölkə həbsxanlarındakı durumu Hüquq Müdafiə Mərkəzinin direktoru  Eldar Zeynalovla müzakirə edir.

“Keçən il həbsdə olanların sayı yol verilən limitə çatmışdı, amma parlament bu həddi azalda bildi (hüquq müdafiəçisi son amnistiya aktının qəbul edilməsini nəzərdə tutur), bu isə müvəqqəti idi. Yeni həbsxanalar lazımdır və əhəmiyyətsiz cinayətə görə həbsə almaq kimi cəza siyasəti dəyişməlidir”. E.Zeynalov həbsxanalardakı durumu qəzetə belə şərh edir.

E.Zeynalov hesab edir ki, hər cinayətə görə yox, yalnız ağır cinayətlərə azadlıqdan məhrumetmə baş verməlidir.

Hüquq müdafiəçisi deyir ki, həbsdə olan qadınların şəraitləri həddən artıq pisləşib, son bir neçə ildə onların sayı 500-ü keçib: “Bu isə o deməkdir ki, yataqxanalarda yaşayış sahələri azalıb, münaqişələr artıb, bu isə şərti vaxtından tez azad olmaq perspektivlərini pisləşdirir, qadın həbsxanası tikilməsi isə uzanır.

E.Zeynalov deyir ki, qadın və həddi-buluğa çatmayanlar üçün həbsxana Kürdəxanı qəsəbəsində salınır, orada hər iki qrup üçün yaxşı şərait yaradılması nəzərdə tutulur.

E.Zeynalov deyir ki, cəzanın sərtləşdirilməsinin cinayətin azalmasna səbəb olacağı kimi düşüncə özünü doğrultmur, əksinə, bu, daha da qəddarlaşmağa kömək edir.

E.Zeynalov həbslərin artmasına daha bir səbəb kimi iqtisadi böhranı göstərir və deyir ki, böhranla bağı yaranan işsizlər kəndlərə qayıtmaqdansa şəhərdə qalıb cinayətlər törətməyə üstünlük veriblər: “Görünür, dələduzluq və oğurluq daha “cəlbedici”dir. Odur ki, son illər dələduzluq, soyğun, oğurluq, sui-istifadə, rüşvət, vergidən yayınma kimi cinayətlər artıb”.

Hüquq müdafiəçisi vurğulayır ki, ciddi cəzalar olmasına baxmayaraq, narkobiznes inkişaf edir və bu sahədə cinayətlərin də sayı çoxalır.

E.Zeynalov bildirir ki, az cəza alınması üçün narkobaronlar müharibə veteranlarını və s. öz cinayətlərinə şərik edirlər. Bundan əlavə, bu cinayətlərdə narkotikdən asılı olanlar da iştirakçıdır, onları isə həbs etmək yox, müalicə etmək lazımdır.

“Uzun və xoşbəxt ömürlülər” diyarı

“Novoyşe Vremya” qəzetində “Amma uzun və xoşbəxt ömür üçün şərait varmı?” (http://www.novoye-vremya.com/w86702/.../#.WNwcfjuLTIU) sərlövhəli məqalədə müəllif  əmək və əhalinin sosial müdafiəsi naziri Səlim Müslümovun martın 29-dakı açıqlamalarını müzakirə edir.

Müəllif xatırladır ki, parlament bu il martın 10-da pensiyaya çıxmaq üçün yaş müddətini uzadıb, nazir S.Müslümov isə martın 29-dakı çıxışında bu addımı əsaslandırmağa çalışıb. 

Məqalə müəllifi nazirin açıqlamalarının reallıqla uzlaşmadığını bildirir.

Müəllif S.Müslümovun ölkədə 65 və daha yuxarı yaşlıların 67,3% artması, 2050-ci ilə kimi ölkə əhalisinin 1,4 dəfə artacağı və s. məsələlərlə bağlı göstərdiyi rəqəmlərə etimadsız yanaşır: “Nazir bu statistikanı haradan götürür, aydın deyil, amma necə olursa olsun, bu bəyanatı ilə inandırmaq istəyir ki, pensiya yaşı çatmış adamların yaxşı həyat şəraitləri var və ona görə də ömür müddətləri uzanıb”.

Müəllif bunu xüsusi vurğulayır ki, nazirin nə deməsindən asılı olmadan pensiyaçıların həyat şəraitləri yaxşılaşmır və hazırda verilən pensiya məbləğilə yaxşı yaşamaq sadəcə mümkün deyil: “Bütün xəstəliklər, eləcə də ölüm “cavan”laşıb, görünür bu, nazir S.Müslümovdan başqa hamıya aydındır, əgər belə olmasa üzidi, nazir tələsik nəticələr çıxarmazdı.  Bu yanaşma təhqirdir və onu başqa cür adlandırmaq olmaz”.  

Daha sonra müəllif parlamentin komitə sədri Hadı Rəcəblinin ölkədə pensiya yaşına çatmış çoxsaylı şəxslərin pensiyaya çıxarılmamaları üçün parlamentə müraciət etmələri barədə bəyanatını xatırladır.

Müəllif deyir ki, çox insanlar pensiyaya çıxmaqdan ona görə imtina edirlər ki, verilən pensiya ilə yaşamaq mümkünsüzdür, buna görə də hətta səhhəti imkan verməsə də, heç kim işini itirmək istəmir, bu isə sosial müdafiənin olmaması deməkdir.

Məqalə müəllifi isə bu sosial müdafiənin olmamasına görə iqtisadi bloka baxan nazirliklərin və parlamentin məsuliyyət daşıdığını bildirir. 

Müəllif bu təbəqənin yadına salır ki, qiymətlərin bahalığı üzündən bu il çoxları Novruz bayramını qeyd edə bilmədi və bu sırada pensiyaçılar daha çox idi.

“Amma nazir S.Müslümov deyir ki, bu insanlar “yaxşı və uzun ömür” sürürlər.

Yazıda indiki işsizlik, intiharlar, yoxsulluq, sosial müdafiəsizlik, bahalıq şəraitində “uzun və xoşbəxt yaşamağın” mümkün olmadığı xatırladılır.

Keyfiyyətsiz özü də baha

“Bizim yol” qəzeti “Kirayə evlərə tələbat artıb, köhnə binaların sökülməsi alıcıları yeni tikilən binalara yönəldib” sərlövhəli məqalədə mənzil bazarındakı durumu (http://www.bizimyol.info/news/94541.html) müzakirəyə çıxarıb.

Müəllif deyir ki, manatın dollara nisbətdə dəyər itirməsi tikinti materialları bazarında da kəskin qiymət artımına səbəb olub: “İdxal olunan məhsullarla yanaşı, yerli istehsalın da qiymətində bahalaşma müşahidə olunur. Buna səbəb isə maya dəyərinin artmasıdır. Qiymət artımı ilə yanaşı, materialların keyfiyyəti də aşağı düşüb”.

Müəllif bazardakılara istinadən deyir ki, əvvəlki illərin payız-qış ayları ilə müqayisədə bazara gələn müştərilərin sayı azalıb, bu azalmaya səbəb elə qiymətlərin bahalaşmasıdır. 

Müəllif vurğulayır ki, rieltorlar isə tikinti materialları bazarı ilə əlaqəli olan mənzil bazarında son zamanlar canlanma müşahidə olunmasını tələbatın artması ilə izah edirlər: “Rieltorların sözlərinə görə, iyun ayına kimi qiymət artımı davam edəcək, söküntülərin aparılması ilə əlaqədar olaraq isə kirayə bazarında da canlanma müşahidə olunur”.   

Müəllif deyir ki, rieltor Ülvi Zeynalov nisbi canlanma olduğunu desə də, bunu müvəqqəti sayır, ilkin bazarda bahalaşma baş verdiyi üçün təkrar mənzil bazarında tələbatın yüksəldiyini bildirir. 

Müəllif rieltor Nicat Vəliyevə istinadən deyir ki, “Sovetski” adlanan ərazidə, sovet dövründə tikilən köhnə binaların sökülməsi ilə əlaqədar olaraq kirayə bazarında da canlanma var: “May-iyun aylarında qiymətlərin aşağı düşəcəyi gözlənilir, ötən illərdəki vəziyyəti nəzərə alaraq deyə bilərik ki, sentyabrın əvvəlində bazarda yenidən qiymət artımı müşahidə olunacaq”.

Müəllifə görə, rieltorlar xatırladırlarki, 2017-ci ilin dövlət büdcəsində xərclərin kifayət qədər azaldılması əhalinin gəlirlərinə təsirsiz ötüşməyib və eyni zamanda, bu, daşınmaz əmlak bazarında satış təkliflərini artırıb.