Media-icmal 31.03.20

Koronavirus pandemiyası ilə bağlı ölkədə görülən tədbirlər, bu virusun əmlak- tikinti bazarına təsiri, banklardan dollar çıxarılmasına baxış və s. məsələlər medianın aparıcı mövzuları sırasındadır...

“Azərbaycan” qəzeti  “Səhiyyə Nazirliyinin rəsmisi: Təəssüf ki, bəzi vətəndaşlar koronavirus təhlükəsini hələ də dərk etmirlər” sərlövhəli məqalədə Azərbaycanda koronavirus pandemiyası ilə bağlı vəziyyəti dəyərləndirir.

Müəllif Səhiyyə Nazirliyinin rəsmisi Pərviz Abubəkirova istinadən deyir ki, son zamanlar ölkə daxilində də insanların bir-birini koronavirus infeksiyasına yoluxdurma hallarında artım qeydə alınır.

“Son zamanlar ölkə daxilində də insanların bir-birini koronavirus infeksiyasına yoluxdurma hallarında artım qeydə alınır. İnfeksiyaya daxili yoluxma hallarının daha da artmasının qarşısını almaq məqsədilə məcburi şəkildə xüsusi karantin rejimi tətbiq olunub”, deyə P.Abubəkirov bildirir.

P.Abubəkirovun sözlərinə görə, buna səbəb bəzi vətəndaşların hələ də koronavirus təhlükəsini dərk edə bilməməsi, xəbərdarlıqlara məhəl qoymamasıdır.

Onun sözlərinə görə, xəbərdarlıqlar arasında insanlarla yaxın təmasdan çəkinmələri də yer alır.

“Çünki koronavirusun inkubasiya dövrünü nəzərə alsaq, hətta xəbərimiz olmadan belə həmin virusun daşıyıcısı ola bilərik”, deyə P.Abubəkirov vurğulayır.

Onun sözlərinə görə, buna baxmayaraq, bəzi vətəndaşlar belə hallara məhəl qoymurlar, qonaq gedir, evlərinə qonaq çağırırlar.

Onun fikrincə, xüsusi karantin rejimi də belə halların qarşısını almağa yönəlib.

“Müsavat.com”da dərc edilən “Koronavirus əmlak-tikinti sektorunda qiymətləri aşağı salacaq?” sərlövhəli məqalədə bu virusun əmlak-tikinti sektoruna təsiri iqtisadçı-ekspert Fikrət Yusifovla dəyərləndirilir.

Müəllif deyir ki, koronavirus (COVİD-19) infeksiyasının yayılmasının qarşısını almaq üçün Azərbaycanın bir sıra dövlət və özəl müəssisələrində işlər müvəqqəti dayandırılıb.

Müəllif deyir ki, bəzi iqtisadçılar virusdan qorunmaq üçün atılan bu addımların ölkə iqtisadiyyatına mənfi təsirləri olacağını də istisna etmirlər.

Müəllifin sözlərinə görə, Bakıda ən çox yeni binaların tikildiyi ərazilərdən olan metronun “Qara Qarayev” stansiyasının ətrafındakı ərazilərdə tikilən binalarda təmir-tikinti işləri davam etməkdədir:

Amma iqtisadçı alim Fikrət Yusifov musavat.com-a açıqlamasında bildirib ki, digər sahələr kimi, əmlak-tikinti sahəsinə də koronavirusun yan təsirləri olacaq: “Koronavirus iqtisadiyyatın bütün sahələrinə olduğu kimi, tikinti və daşınmaz əmlak sektoruna da mənfi təsir göstərəcək. Çünki belə bir durumda aktivlik praktik olaraq çox aşağı səviyyəyə düşüb. Həm müəssisələrin, həm də çalışanların fəaliyyəti dayanıb. Ümumiyyətlə, cəmiyyətdə aktivlik aşağı düşüb”.

Bundan irəli gələrək F.Yusifov qeyd edib ki, belə olan halda, təbii ki, bazarın aktiv olması mümkün deyil, həm tikinti sektorunda, həm də əmlak bazarında fəallıq aşağı düşüb və düşəcək.

Onun fikrincə, bu proses uzunmüddətli olsa, yəqin ki, mənzil bazarında qiymətlərin enməsi baş verəcək, Bakıda mənzil bazarında kifayət qədər şişirdilmiş qiymətlər mövcud olması reallıqdır və bu qiymətlər, təbii ki, aşağı düşməlidir.

F.Yusifova görə, baş verən hadisələr nə qədər xoşagəlməz olsa da, bazarda qiymətlərin optimallaşması baxımından rol oynaya biləcək.

“Bizimyol.info”da isə “Bəzi banklarda dollar hesabından dollar çıxarmağa qanunsuz qadağa” sərlövhəli məqalədə müəllif ekspert Əkrəm Həsənovla bəhs olunan problem barədə söhbətləşir.

 “Bəzi banklar fiziki və hüquqi şəxslərin dollar hesabından dolları nağdlaşdırmağa imkan verməyiblər”, deyə bank sahəsi üzrə ekspert Ə.Həsənov bildirir.

Ə.Həsənovun sözlərinə görə, bank əməkdaşları sahibkarlara hesablarında olan dolları rəsmi məzənnəyə uyğun manatla verə biləcəklərini deyiblər: “Mənə müraciət edən sahibkarlara dedim ki, bankarın buna ixtiyarı yoxdur. Banklar özünü elə aparır ki, guya koronavirusa görə onlara dollarla bağlı göstəriş var. Sahibkarlar bankdan yazılı şəkildə imtinanın verilməsini istədi. Bank yazılı şəkildə imtina vermədi. Çünki bankın dediyi qanunsuzdur, cəfəngiyyatdır”.

Onun sözlərinə görə, kim haqqını bilir, onlara dollar verirlər, kim ki, haqqını bilmir, ona vermirlər. Əgər şəxsi hesablardan dolların nağdlaşdırılması ilə bağlı qadağa varsa, bu göstərişi Mərkəzi Bank verib, deyə düşünülür. Mərkəzi Bankın isə buna ixtiyarı yoxdur”.

Ekspert hesab edir ki, qanuna görə, hər kəs şəxsi hesabından istədiyi valyutada istədiyi qədər vəsaiti çıxara bilər: “Son zamanlar qeyri-rəsmi olaraq bank hesablarından 30 min manat həddində rəsmi məzənnəyə uyğun xarici valyutanın çıxarılmasına məhdudiyyət qoyulub. Amma bunu da etmirlər. Dollar hesabından valyuta çıxarılmasına qadağa qoyulub və bu milli valyutaya etimad məsələsini gündəmə gətirir.

Ekspertin sözlərinə görə, əksər banklarda ya dollar problemi var, ya da onlar dollarla bağlı oyun oynayırlar ki, bu da bank sisteminə etimadı sarsıdır”.