Media-icmal 31.03.21

Koronavirus infeksiyasına yoluxmanın üçüncü dalğasının qeydə alınması iddiaları, apteklərdə dərmanların baha satılmasının səbəbləri, avtomobil bazarında bahalaşma mümkünlüyü və s. məsələlər medianın aparıcı mövzuları sırasındadır...

Tanınmış tibb professoru Adil Qeybulla koronavirus infeksiyasının üçüncü dalğasının qeydə alınmasından danışır. “Yenisabah.az” saytında dərc edilən “Rəsmən üçüncü dalğa qeydə alınıb...” sərlövhəli məqalədə Adil Qeybulla bununla bağlı fikirlərini bildirir.

Hazırda yoluxanların sayının artdığını deyən professor bunu insanların xəstəliyə laqeyd yanaşmaları ilə əlaqələndirir. Onun fikrincə, maarifləndirmə işinə diqqət edilməli, əhaliyə televiziya vasitəsilə xəstəliklə bağlı tez-tez məlumatlar verilməlidir.

Onun sözlərinə görə, COVID-19 virusunun 200-dən artıq mutasiya keçirmiş ştamları aşkarlanıb, bunların bəziləri zəif, bəziləri kifayət qədər aqressiv, yoluxuculuq potensialı yüksəkdir: “Bu gün bütün Avropada epidemioloji vəziyyətin pisləşməsi qeyd edilir və rəsmən üçüncü dalğa artıq qeydə alınıb. Buna görə də ayrı-ayrı ölkələrdə yoluxma sayında və ölüm göstəricilərində artım müşahidə olunur”, deyə professor bildirir.

Onun fikrincə, vəziyyət pisləşərsə, daha sərt karantin tədbirləri görülə bilər.

Bu mübarizədə vaksin vurulmasını əsas şərt sayan alim deyir ki, əhalinin 70-75%-i peyvənd olunduqdan sonra ölkədə kollektiv immunitetin formalaşmasından söhbət gedə bilər: “İndiki halda əsas iş karantin qaydalarını nisbətən sərtləşdirmək, təmasları azaltmaq, vaksinasiyanı intensivləşdirməkdir”, deyə professor hədəfi göstərir”.

“Bizimyolinfo.az” saytındakı “Can bazarında ölmüşük, ağlayanımız yox”  sərlövhəli məqalədə eyni dərmanların apteklərdə fərqli qiymətlərə satılması araşdırılır.

Müəllif deyir ki, pandemiyadan sonra ölkə əhalisinin dərman preparatlarına olan tələbatı sanki artıb, hamı cibinə uyğun dərman axtarır, elə bu zaman maraqlı məqam üzə çıxır.

Müəllifə görə, hər dərmana hər aptekdə fərqli qiymət qoyulur, şəhərin mərkəzində olan geniş apteklərdə, bir qayda olaraq, dərmanlar daha baha, ətraf rayonlarda daha münasib qiymətlərə satılır: “Məsələn, bir zamanlar apteklərdə 70 qəpiyə satılan Doksistsiklin tableti indi Yunidoks Solyutab adı altında bəzi apteklərdə 9 manat 90 qəpyə, bəzilərində 11 manata, bəzilərində 15 manata satılır.

İmmunitetin artırılması üçün vacib olan o ucuz dərmanları indi istəsəniz də tapa bilməyib, ən az 19-20 manatlıq siroplara möhtac qalacaqsınız”, deyə müəllif bildirir.

Müəllif deyir ki, bunun səbəbini soruşduqda apteklər deyirlər ki, Tarif Şurasının təsdiq etdiyi dərmanların hamısı eyni qiymətə satılır, molekul olmayan, bitki mənşəli, başqa sözlə, dərman hesab edilməyən preparatlara isə apteklər özləri tələbə uyğun qiymət təyin edirlər.

İqtisadiyyat Nazirliyi də bildirir ki, Tarif Şurası tərəfindən heç bir qiymət artımı həyata keçirilməyib: “Nazirlik deyir biz qaldırmamışıq, apteklər deyir dərman bizə belə gəlir. Sən vurmadın, mən yıxılmadım. Bəs bu necə olur? Belə çıxır ki, həmişəki kimi bütün hadisələrdə günahkar olan xalq özü aldığı məhsula artıq pul verməyə maraqlıdır. 1 manatlıq dərmanı qəsdən 2 manata alır?”.

“Mətbuat.az” saytında “Avtomobil alanların diqqətinə - Qiymətlər bahalaşacaq” sərlövəhli məqalədə ölkənin avtomobil bazarındakı vəziyyət dəyərləndirilir.

Avtomobil bazarı üzrə ekspert Eldəniz Cəfərov deyir ki, Azərbaycanda ikinci əl avtomobil bazarında son vaxtlar aktivlik müşahidə edilir. Onun fikrincə, ikinci əl avtomobil bazarında qiymətlərin 5-10 faiz artacağı gözlənilir. “Qiymət artımı hər hansı bir amil ilə əlaqəli deyil. Sadəcə mövsüm ilə əlaqəlidir.

Novruz bayramından sonra havanın temperaturu yaksəlməyə başladıqca üzü yaya doğru ikinci əl avtomobil bazarında oyanma müşahidə edilir. Yeni avtomobillərin qiymətləri isə sabit olaraq qalmaqda davam edir.  Bəzi yeni avtomobil markalarının qiymətində 2-5% arası artım var”, deyə E.Cəfərov bildirib.