Media-icmalı 01.02.18

İlham Əliyevin ölkəyə rəhbərliyi dövründə iqtisadiyyatın inkişafı, Bakının gəlir və xərclərinin şəffaf olmaması, musiqi müəllimlərinin maaşlarının kəsilməsi bugünki (01 fevral, 2018-ci il) medianın aparıcı mövzularındandır...

Son 14 ilin iqtisadi uğurları

"Azərbaycan" qəzeti "Son 14 il müasir Azərbaycanın inkişaf tarixində mühüm dövrdür" sərlövhəli məqalədə bəhs edilən dövrdəki inkişafı YAP Siyasi Şurasının üzvü Vüqar Rəhimzadə ilə dəyərləndirir.

V.Rəhimzadə deyir ki, İlham Əliyevin prezident seçildiyi 2003-cü ildən bu yana Azərbaycan yeni inkişaf mərhələsinə qədəm qoyub, əsası Heydər Əliyev tərəfindən qoyulan uğurlu islahatlar dövlət başçısı İlham Əliyev tərəfindən daha dinamik və çoxşaxəli şəkildə davam etdirilib: "Məhz ötən 14 ilin ictimai-siyasi, həmçinin sosial-iqtisadi mənzərəsinə, statistik göstəricilərinə nəzər yetirdikdə bir daha bu reallığın şahidi oluruq. Azərbaycan regionlarının sosial-iqtisadi inkişafı dövlət proqramlarının icrası çox uğurla gedir. Bu mənada üçüncü proqram da uğurla icra edilir, qarşıda duran bütün vəzifələr icra edilir".

Müəllif deyir ki, dövlət başçısı İlham Əliyev gördüyü işlərlə, imza atdığı qlobal layihələrlə dünya miqyasında nüfuzlu lider, ölkə daxilində qətiyyətli, uzaqgörən rəhbər olduğunu təsdiq edib.

V.Rəhimzadə Azərbaycanın dövlət müstəqilliyinin daha da möhkəmləndirilməsi yolunda ciddi uğurlar qazanıldığını deyir: "Ötən 14 ildə iqtisadiyyat 3,2 dəfə, qeyri-neft iqtisadiyyatı 2,8 dəfə artıb. Sənaye sahəsində 2,6 dəfə artım var, kənd təsərrüfatında 1,7 dəfə, qeyri-neft məsullarının ixracında isə 4,1 dəfə artım qeydə alınıb".

Ölkənin ötən 14 ildə böyük və şərəfli yol keçdiyini deyən V.Rəhimzadə bildirir ki, 2004-cü ildə Azərbaycanın valyuta ehtiyatları 1,8 milyard dollar olub, indi isə bu ehtiyatlar 42 milyard dollara bərabərdir: "Bu mənada 14 ildə valyuta ehtiyatlarımız 23 dəfə artıb, bununla yanaşı, 14 ildə ölkə iqtisadiyyatına 231 milyard dollar sərmayə qoyulub".

Müəllif belə bir məqamı xüsusilə vurğulayır ki, Azərbaycana yatırılan sərmayənin 93 faizi son 14 il ərzində qoyulub.

V.Rəhimzadəyə görə, son 14 ilin müasir Azərbaycanın inkişaf tarixində mühüm dövr olduğunu bir daha təsdiqləmək üçün yüzlərlə yuxarıda göstərilən kimi faktlar sadalamaq olar.

Gəliri, xərci "Gizli Bakı"

"Exo" qəzetində "Bakının illik gəlirləri: ictimaiyyətdən nələr gizlədilir" sərlövhəli məqalə oxumaq olar.

Müəllif paytaxt Bakının gəlirlərə malik olmasını, amma şəhər hakimiyyətinin bu barədə məlumatları açıqlamamasını ekspert Nəriman Ağayevlə müzakirə edir.

"Şübhəsiz, Bakı gəlir mənbələrinə malikdir və hər il pul qazandırır. Bakının illik gəlirləri gilzli saxlanılır, şəhər hakimiyyəti bu məlumatları ciddi səylə ictimaiyyətdən gizlədir. Bununla belə, bu gəlirlərin həcmi 10 milyonlarla manatla ölçülür". N.Ağayev bunu bildirir və deyir ki, Bakının büdcəsinə vəsaitlər ölkə büdcəsi vəsaitlərindən ayrılır.

Ekspert deyir ki, 2017-ci ildə şəhərin ehtiyaclarına 160 milyon manat ayrılıb, bundan əlavə, icra hakimiyyəti göstərdiyi xidmətlərdən gəlirlər əldə edib, belə ki, burada söhbət gəlirləri şəhər icra hakmiyyətinə daxil olan pullu dayanacaqlardan, torpaq sahələrinin satışından və ya icarəyə verilməsindən gedir.

N.Ağayev vurğulayır ki, inkişaf etmiş bütün ölkələrdə şəhərlərin gəlirləri və xərcləri şəffafdır, şəhərin istənilən sakini meriyanın saytına daxil olmaqla şəhər hakimiyyətinin maliyyə hesabatları ilə tanış ola bilirlər: "Bizdə isə bu informasiyalar ictimaiyyətdən gizlədilir, ona görə də şəhər hakimiyyətinin il ərzində nə qədər qazandığını və ya xərclədiyini bilmirik. Hər il şəhərin illik büdcəsinə şəhər yollarının qardan təmizlənməsilə bağlı xərclər daxil edilir, bu xərclərə qum alınması və s. aiddir, amma bilnimir ki, qar yağmasa bu vəsaitlər dövlətə qaytarılır, yoxsa?! Başqa ehtiyaclara sərf edilir, bir sözlə, suallar çoxdur, amma cavabları yoxdur".

Ekspert deyir ki, şəhər hakimiyyətinin kifayət qədər vəsaiti var və bu vəsaitlər paytaxt binalarının fasadlarının yenilənməsinə, mədəni-kütləvi tədbilərin keçirilməsinə xərclənir: "Odur ki, şəhər hakimiyyəti çoxdan hesabat verməlidir, ilkin olaraq heç olmasa jurnalistlər bu informasiyalara çıxış əldə etməlidirlər. Burada sirr olacaq heç nə yoxdur və şəhər hakimiyyəti "kölgə"dən artıq çıxmalıdır". Ekspert dumunun perspektivini belə gördyünü bildirir.

İqtisadçı Seyfəl Əliyev də deyir ki, təkcə Bakının dayanacaqlarından şəhər hakimiyyəti kifayət qədər qazanc əldə edir, amma bu pulların çoxu şəhər hakimiyyətinin "kassa"sına yox, dayanacaqda duran şəxslərin ciblərinə axır.

Ekspert bunun səbəbi kimi pulun nağd şəkildə dayanacaqda duran şəxslərə verilməsini göstərir və hətta bunun özünü belə şəhər hakimiyyətindən xəbərsiz etməyin mümkünsüz olduğunu bildirir.

Nazirlik vəd verir ki...

"Bizimyol.info"da isə diqqəti "Musiqi məktəblərində müəllimlərin maaşı yarıbayarı kəsilib" sərlövhəli məqalə cəlb edir.

Müəllif deyir ki, 2017-ci ilin dekabr ayında Bakı şəhər Mədəniyyət və Turizim İdarəsinə tabe olan məktəblərdə maaşlar qanunsuz olaraq iki dəfə kəsilib.

Yazı müəllifi vurğulayır ki, bu barədə müəllimlər öz statuslarında paylaşıblar: "İdarədən məktəb direktorlarına xəbər gəldi ki, müəllimlərin maaşı tutulsun, çünki nazirliyin büdcəsində pul yoxdur. Hər müəllimdən 4-5 saatın pulunu tutdular. Bu proses idarəyə aid olan məktəblərin hamısında baş verib".

Müəllif müəllimlərə istinadən deyir ki, Bakı Şəhər Mədəniyyət və Turizm Baş İdarəsi xəbər göndərib ki, müəllimlərdən tutulan məbləğlər yanvar ayının maaşında qaytarılacaq, amma büdcədə pul olmadığı üçün hələ də qaytarılmayıb.

Müəllif vurğulayır ki, müəllimlərə bu barədə heç kimə məlumat verməmək, şikayət etməmək tapşırılır.

Müəllif deyir ki, nazirlə görüşmək, imza toplamaq kimi təklfləri nəzərdən keçirirlər.

Yazı müəllifi müəllimlərə istinadən deyir ki, müəllimlərin öz görüşləri də keçirilir, vəziyyətdən çıxmaq üçün müzakirələr getdiyi bildirilir, eyni zamanda, müəllimlər büdcədə pul olmadığı üçün maaşların kəsilməsi barədə tapşırığın birbaşa nazirlikdən gəldiyini iddia edirlər.

Müəllif isə deyir ki, nazirlik kəsilən vəsaitlərin maaşlarla birgə fevral ayında ödənəcəyi vədi verir.

Məqalədə Mədəniyyət və Turizm Nazirliyi maaşla yaranan problemi belə izah edir ki, uşaq musiqi, incəsənət və rəssamlıq məktəblərində təhsilin keyfiyyətinin yüksəldilməsi, tədris prosesinin optimallaşdırılması, dövlət büdcəsinin səmərəli istifadəsi məqsədilə bir sıra tədbirlər həyata keçirilib.

Müəllif deyir ki, dekabr ayında vəsait çatışmazlığından Bakı şəhərində yerləşən musiqi və incəsənət məktəblərində çalışan müəllimlərin əmək haqqının bir hissəsi ödənilməsində problem yaranıb".

Müəllif nazirliyin müəllimlərə belə bir vəd verdiyini vurğulayır ki, müəllimlər yanvar ayının maaşı ilə birlikdə dekabr ayından yaranan maaş fərqini də fevral ayında ala biləcəklər.