Media icmalı – 29.08.2023

Ölkədə Azərbaycanda pensiya və müavinət alanların sayı, Gömrük Komitəsi əməkdaşının həbsi, Emmanuel Makronun İlham Əliyevə zəng etməsi, daşınmaz əmlakın alqı-satqısı ilə bağlı yeni qayda, Qaxda şəraitsiz formada yaşayan ailə, Laçında saxlanılmış erməni futbolçular bu gün (29.08.2023) üçün mediada müzakirə olunan əsas mövzulardandır.

525-ci qəzet saytında yayımlanan “Azərbaycanda pensiya və sosial müavinət alanların sayı açıqlanıb” sərlövhəli yazıda 2023-cü ilə aid statistika qeyd olunub. Müəllif qeyd edib ki, 2023-cü il iyulun 1-i vəziyyətinə Dövlət Sosial Müdafiə Fondunda 1096,6 min nəfər pensiyaçı qeydiyyatda olub ki, bu da ölkə əhalisinin 10,8 faizini təşkil edir. Müəllifin sözlərinə görə həmin şəxslərin 64,1 faizi yaşa, 23,6 faizi əlilliyə, 12,3 faizi isə ailə başçısını itirməyə görə pensiya alır. Ötən ilin iyulun 1-i ilə müqayisədə qeydiyyatda olan pensiyaçıların cəmi sayı 5,4 faiz, o cümlədən əlilliyə görə pensiya alanların sayı 16,4 faiz, ailə başçısını itirməyə görə pensiya alanların sayı 9,7 faiz azalmış, yaşa görə pensiya alanların sayı isə 0,4 faiz artıb. Əlavə olaraq qeyd olunub ki, təyin olunmuş aylıq pensiyaların orta məbləği ötən ilin müvafiq dövrü ilə müqayisədə 18,2 faiz, bu ilin əvvəli ilə müqayisədə isə 16,9 faiz artaraq 435,0 manat təşkil etmiş və orta aylıq əmək haqqının 47,2 faizinə bərabər olub. Müəllif vurğulayıb ki, bununla yanaşı, əhalinin sosial müdafiəsinin təmin edilməsi məqsədilə ayrı-ayrı kateqoriyadan olan şəxslərə müxtəlif növ aylıq sosial müavinətlər təyin edilir.

“Gömrük Komitəsinin əməkdaşı külli miqdarda rüşvətə görə həbs edilib” sərlövhəli yazıda Gömrük Komitəsinin əməkdaşının həbsi barədə detallı məlumat verilib. Belə ki, Aslan Bayramovun qeyd edilən vəzifədə işləyərkən ayrı-ayrı şəxslərdən rüşvət qismində aldığı 13 min 500 manat məbləğində pul vəsaiti müqabilində vəzifə səlahiyyətlərindən sui-istifadə edərək Azərbaycan Respublikası Nazirlər Kabinetinin “İstismar olunan minik avtomobillərinin Azərbaycan Respublikasının gömrük ərazisinə gətirilməsinin məhdudlaşdırılması haqqında” 29.03.2023-cü il tarixli qərarının tələblərini pozmaqla vəzifə saxtakarlığı törətməsinə görə həbs olunub.

Trend.az saytında yayımlanan “Emmanuel Makron Prezident İlham Əliyevə zəng edib” sərlövhəli yazıda prezidentlərin telefon danışıqları zamanı müzakirə etdiyi mövzular haqqında yazılıb. Müəllifin sözlərinə görə telefon danışığı əsnasında regiondakı vəziyyət, Ağdam-Xankəndi və Laçın-Xankəndi yollarının açılması məsələsi müzakirə olunub. Müəllif qeyd edib ki, İlham Əliyev Ağdam-Xankəndi yolunun istifadəsinə məqsədyönlü şəkildə Ermənistan və onun Azərbaycanın Qarabağ bölgəsində yaratdığı və dəstəklədiyi qondarma rejim tərəfindən süni əngəllər yaradılır və bundan siyasi manipulyasiya məqsədilə istifadə edilir. Sonda isə Prezident Emmanuel Makron vəziyyətin sabitləşdirilməsi və mövcud gərginliyin aradan qaldırılması üçün Fransanın da öz tərəfindən töhfə verməyə hazır olduğunu bildirib, Fransanın və Azərbaycanın aidiyyəti qurumlarının təmaslarının davam etdirilməsini təklif edib.

“Notariuslar üçün daşınmaz əmlakın alqı-satqısına dair yeni qayda müəyyənləşdi” sərlövhəli yazıda “Azərbaycan Respublikasında notariat hərəkətlərinin aparılması qaydaları haqqında Təlimat”da olunan dəyişikliklər haqqında məlumat verilib. Müəllifin sözlərinə görə dəyişikliyə əsasən, notariuslar daşınmaz əmlakın alqı-satqısı, pul vəsait- lərinin, qiymətli kağızların və ya digər əmlakın, habelə bank, depo, poçt, ödəniş və pul hesablarının idarə olunması, habelə hüquqi şəxslərin yaradılması, onların fəaliyyətinin təmin və idarə edilməsi, bu məqsədlərlə pul vəsaitlərinin toplanılmasının təşkil olunması, habelə hüquqi şəxslərin səhmlərinin və ya paylarının alqı-satqısı ilə əlaqədar əməliyyatlarla bağlı notariat hərəkətləri aparılarkən əməliyyatın predmeti olan əmlakın cinayət yolu ilə əldə edilməsi və ya terrorçuluğun maliyyələşdirilməsi ilə bağlı olmasına şübhə və ya belə şübhə üçün kifayət qədər əsaslar yaradan hallarda, həmçinin bu əməliyyatlar yüksək riskli zonaların vətəndaşları ilə, qeydiyyat, yaşayış və ya əsas fəaliyyət yeri həmin zonalarda olan şəxslərlə və ya onların vasitəsilə, eləcə də, həmin zonalarda qeydiyyatdan keçmiş bankda hesaba malik olan şəxslərlə və ya “Hədəfli maliyyə sanksiyaları haqqında” Azərbaycan Respublikasının qanununa uyğun olaraq sanksiya tətbiq edilən fiziki şəxslərin və qurumların aktivləri ilə bağlı həyata keçirildikdə, yaxud xarici dövlətlərin siyasi nüfuzlu şəxslərinin əmlakı ilə bağlı olduqda, bu barədə məlumat və sənədləri maliyyə monitorinqi orqanına təqdim etməlidirlər.

BBC Azərbaycan saytında yayımlanan “"Gəlinim də, oğlum da - hamımız bir otaqda yaşayırıq", - Qax sakini Rahim Həsrətov” sərlövhəli məqalə Qax sakininnin yaşadığı vəziyyətlə bağlıdır. Müəllifin sözlərinə görə Bir ilə yaxındır yataq xəstəsi olan 65 yaşlı Almas İsgəndərova Kəlbəcər rayonundan məcburi köçkündür. Onlar illərdir yaşayış yerləri olmadığına görə, Qaxın Qapıçay kəndindəki keçmiş kərpiz zavodunun gözətçi köşkündə məskunlaşıblar. Dörd nəfər və iki yaşlı körpədən ibarət olan ailə bu bir otaqlı daxmada yaşayır. Onların sözlərinə görə müraciət etdikləri heç bir yer onlara dəstək olmayıb. Müəllif isə müvafiq orqanlarla əlaqə saxlayıb:

“İcra nümayəndəsi deyib ki, Rahim Həsrətov Şəki qeydiyyatındadır, Almas İsgəndərova isə məcburi köçkün kimi başqa ünvanda, Gəncədə qeydiyyatdadır və onlardan yardım müraciəti daxil olmayıb. Onun sözlərinə görə, əgər ailə ərzaq yardımı üçün ona və ya bələdiyyəyə müraciət etsə vaxtaşırı icra hakimiyyətindən ayrılan belə yardımları ala bilər”.

“TƏBİB-dən BBC News Azərbaycancaya bildiriblər ki, Almas İsgəndərova və Rəhim Həsrətov heç biri Qax Rayon Mərkəzi Xəstəxanasına müraciət etməyib”.

"Rahim Həsrətov Zaqatala RMX-ya müraciət edib, ona özəl tibb müəssisəinə göz əməliyyatı üçün müvafiq göndəriş təmin olunub. Daha sonra o müraciət etdiyi özəl tibb müəssisəsindən narazılığını ifadə edib", - TƏBİB bildirib.

“Laçında saxlanmış erməni futbolçular: Azərbaycan və Ermənistan bir-birini ittiham edir” sərlövhəli yazıda  10 günlük həbs olunan futbolçular haqqında yazılıb. Müəllifsözlərinə görə Bazar ertəsi günü Azərbaycanın Laçındakı sərhəd-buraxılış məntəqəsində Qarabağdan Ermənistana gedən üç erməni futbolçusunu 10 günlük həbs etməsinə görə, Ermənistan və Azərbaycan bir-birini ittiham edib. Müəllif qeyd edib ki, Rəsmi Bakı bildirib ki, erməni futbolçular “2021-ci ilin dekabrında Azərbaycan bayrağıını təhqir ediblər” və buna görə inzibati qaydada 10 gün müddətinə həbs ediliblər. Ermənistan XİN bazar ertəsi günü bəyan edib ki, üç erməni futbolçu Rusiya sülhməramlılarının müşayəti ilə və əvvəlcədən razılaşdırılmış səfər zamanı “Azərbaycanın hüquq-mühafizə orqanları tərəfindən oğurlanıb”.