Məhkəmə fəalın kompüter və telefonunun müsadirəsi haqqında şikayətini təmin etməyib

Dünən Bakının Nərimanov rayon məhkəməsi vəkil Elçin Sadıqovun müvəkkili, NİDA hərəkatının fəalı Rəhim Vəliyevin mənzilində qanunsuz axtarış və onun kompüterinin və telefonunun götürülməsi ilə bağlı şikayətini təmin etməyib.

Vəkilin özünün Turan-a verdiyi məlumata görə, gənc yanvarın 16-da saat 12 radələrində saxlanılıb və Nərimanov rayon polis idarəsinin 12-ci polis bölməsinə aparılıb.

Elə həmin gün saat 17.00 radələrində elə həmin polis bölməsinin müstəntiqi guya fəalın anasının DİN-in "102" xidmətinə oğlunun yoxa çıxması haqqında müraciəti ilə əlaqədar onların evinə gəlib. Polis əməkdaşı qanunsuz olaraq axtarış aparıb və gəncin kompüterini və telefonunu müsadirə edib.

Vəkil apellyasiya şikayəti vermək niyyətindədir.

Rəhim Vəliyev yanvarın 16-da polisə tabe olmamaq ittihamı ilə inzibati qaydada 30 günlük həbs olunub. NİDA hərəkatından bildiriblər ki, həbsin əsl səbəbi onun facebook-da Azərbaycan hökumətini tənqid etməsi olub. –06D--