Məhkəmə Saatlı rayonundan olan fəalı azad edərək şərti cəzaya məhkum edib

Sentyabrın 18-də axşam Saatlı rayonunun Novruzlu kənd sakini, «Kür» Vətəndaş Cəmiyyəti Qərargahının fəalı, Mirabad Rzayev həbsdən azad edilib.

Saatlı rayon Məhkəməsi onu Azərbaycan CM-nin 315.1 maddəsi ilə («hakimiyyət nümayəndəsinə qarşı güc tətbiq etmə") təqsirli bilərək 1,5 il azadlıqdan şərti məhrum etmə cəzası verib. Rzayev məhkəmə salonundan azad edilib, deyə “Kür” Vətəndaş Cəmiyyəti Qərargahının əlaqələndiricisi Oqtay Güləliyev Turan-a bildirib.

«Mirabad Rzayevlə indicə telefonla danışdım. O, artıq evdədir və yardımı keçən hər kəsə salam göndərir», - deyə Güləliyev məlumat verib.

Xatırladaq ki, Mirabad Rzayev və oğlu Mirsaleh Rzayev iyulun 13-də Saatlı rayon İcra Hakimiyyətinin binasında həbs edilib. Onlar oraya həmkəndliləri ilə birgə 2010-cu ildə Kür və Araz çaylarında dağıdıcı daşqın nəticəsində ziyan çəkən mənzillərinin bərpasının uzadılması ilə bağlı şikayət etməyə gəlibmiş.

Amma Rzayevlərə qarşı fitnəkarlıq olub və onlar saxlanılıb.

Kiçik Rzayev 10 sutkalıq inzibati həbs alıb. Saatlı rayon Məhkəməsi Mirabad Rzayevlə bağlı həbs qətimkan tədbiri seçib və o, 2 aylığa həbs edilib.

“Kür” Vətəndaş Cəmiyyəti Qərargahı Rzayevin ünvanına ittihamları qondarma adlandırıb, onun azad edilməsini tələb edib və bu işi daim diqqət mərkəzində saxlayıb.