Məktəbin qumbarası sanitar qovşaqdan çıxıb

Lənkəran rayonunun Səpnəkəran kənd orta məktəbinin istifadə edilməyən sanitar qovşağına baxış zamanı məktəbin balansında olan, hərbi dərslərin keçirilməsində istifadə üçün nəzərdə tutulmuş 2 ədəd təlim və 1 ədəd döyüş qumbaraları aşkar edilib. Bu barədə Daxili İşlər Nazirliyinin mətbuat xidməti məlumat yayıb.

Məlumatda deyilir ki, döyüş qumbarası və 1 ədəd qumbara alışdırıcısı təhlükə yaratdığından Daxili İşlər Nazirliyinin Daxili Qoşunlarının əməkdaşları tərəfindən zərərsizləşdirilib.

Mətbuat xidməti məktəbin balansında olan təlim qumbaralarının hansı səbəbdən istifadə edilməyən sanitar qovşağına düşdüyü (saxlanması) və təlim qumbarasının hansı səbəbdən təhlükə törətdiyi barədə məlumat vermir.

Ehtimal etmək olar ki, məktəbdə təlim deyil döyüş qumbarası olub. Təlim qumbaraları heç bir əsasla təhlükə törədə bilməz. Belə ki, Təhsil Nazirliyinin təlimatına görə, məktəblərin balansına təlim məqsədi ilə verilmiş silah və sursatlar xüsusi mühafizə olunan otaqda dəmir seyflərdə saxlanmalıdır. Təlimata görə, təlim silah və sursatları məktəblərin balansına verilməmişdən öncə mütəxəssislər tərəfindən bir daha yoxlanmalı və təhlükəsizliyi ilə bağlı rəy verilməlidir.

Eyni zamanda məktəbdə hərbi hazırlıq dərslərini aparacaq müəllim rayon hərbi çağırış agentliyində silah və sursatlardan istifadə edə bilməsi ilə bağlı treninqə cəlb edilməli və psixoloji durumu barədə tibbi arayış təqdim etməlidir. -03D-