Mənzil tikintisi dələduzları həbsə alındılar

Bakı Ağır Cinayətlər Məhkəməsi aprelin 24-də mənzil-tikintisilə məşğul olan “Kamran B.Ə” MMC-nin rəhbərliyinin uzun müddətə azadlıqdan məhrum olunması haqda qərar verib.   

Fikrət Qəribovun sədrliyi ilə keçirilən məhkəmə iclasında cəmiyyətin təsisçi və rəhbəri Ələkbər Babayev 14 il, direktor German Hüseynov 11 il, tikinti nəzarətçisi Süleyman Əliyev 11 il, bir müddət direktor olmuş Rüfət Nağıyev 10 il müddətinə azadlıqdan məhrum ediliblər. 

Hökmə əsasən, adı çəkilən hər üç şəxsin əmlakının müsadirə olunması qərarı verilib. Bu işlə bağlı “İnşaat-E” MMC-nin direktoru Kənan Quliyev isə 6 il 25 gün müddətinə şərti olaraq azadlıqdan məhrumetmə cəzası alıb.

İstintaq müəyyən edib ki, bu şirkətlərin rəhbərləri Yasamal rayonu ərazisində tikdiyi çoxmərtəbəli yaşayış binasında ümumilikdə 92 mənzili saxta müqavilələr tərtib etməklə 291 şəxsə təkrar sataraq 8 milyon 566 min manat əldə ediblər. Bu məbləğin 2 milyon 545 min manatı inşa edilən binanın tikintisinə sərf olunub. Qalan 6 milyon 20 min manat məbləği isə dələduzluq yolu ilə talanıb.

Bundan başqa, “Kamran B.Ə.” MMC 2008-ci ilin yanvarından 2011-ci ilin avqustuna kimi olan dövrdə mənzil satışından əldə etdiyi 7 milyon 428 min manat məbləği bəyannamədə əks etdirməyib, 1 milyon 623 min manat məbləğdə külli miqdarda vergiləri dövlət büdcəsinə ödəməkdən yayınıb.

Belə fırıldaqçı şirkətlərin ortaya çıxması əsasən 2005-ci ildən sonra baş verir. Özəl mənzil tikinti şirkətlərinin vətəndaşları mənzil tikintisi adı ilə aldatmaları adi hala dönüb. “Mur-Ay”, “Kamran B.Ə”, “İnşaat-E”, “Orxan”, “Birlik-İnşaat”, “GEN”MMC, “Fuad-LTD”, “Belıy Lebed” və s. kimi şirkətlərin 30 minə qədər insanı aldatması mətbuatda yer alır. Ölkə mətbuatı mənzil-tikinti adı altında dələduzluqla məşğul olan 20 belə şirkətin adını çəkir. -05B-