Mətbuat-Monitorinq 01.09.12

Ölkə qəzetlərinin bugünki sayının əsas mövzusu Lökbatan qəsəbəsində ağır nəticələrlə başa çatan yol-nəqliyyat qəzası və erməni zabitini qətlə yetirdiyinə görə 2004-cü ildən Macarıstanda həbsdə olan Azərbaycan zabiti Ramil Səfərovun Azərbaycana ekstradisiya olunması və əfv edilməsidir. 

Rəsmi qəzetlər London Yay Olimpiya oyunlarında idmançıların qələbəsini önə çəkib, milli olimpiya komandası üzvlərinin təltif edilmələri haqda sərəncamın mətnini dərc ediblər. “Yeni Azərbaycan” qəzeti isə aparıcı müxalifət düşərgəsində “parçalanma” yaranması, AXCP sədri Əli Kərimlinin eks-prezident Əbülfəz Elçibəyi zəhərləməsi barədə yazılara yer verib. 

“Azadlıq” qəzeti 2006-cı ildə Macarıstanda erməni zabitini qətl etdiyinə görə həbs edilən Azərbaycan zabiti Ramil Səfərovun Azərbaycana ekstradisiya olunduğunu və əfv fərmanı ilə azadlığa buraxılmasını manjetə çıxarıb. Qəzet R.Səfərovun azadlığa çıxmasının Ermənistanda ictimai-siyasi gündəmi gərginləşdirdiyini yazır. 

Qəzet avqustun 31-də ağır nəticələrə səbəb olan Lökbatan qəsəbəsindəki yol qəzasını “səhlənkarlığın Bakı sakinlərini qana boyaması” kimi dəyərləndirir.  

Qəzet yazır ki, Sabirabad rayon müxalifətçiləri Xalq Cümhuriyyətinin banisi Məhəmmədəmin Rəsulzadənin büstünün götürülməsinə etiraz olaraq kütləvi aksiyalar keçirəcəkləri xəbərdarlığı ediblər. 

İqtidarın AXCP sədri Əli Kərimliyə qarşı başladığı eks-prezident Əbülfəz Elçibəyin zəhərlənərək vəfat etməsi kampaniyasını Ə.Kərimli açıqlamasında “iqtidarın mənəvi cəhətdən daha da iflasa uğraması” adlandırıb. 

“Zerkalo” qəzeti avqustun 31-də Lökbatanda ağır faciələrlə nəticələnən yol-nəqliyyat hadisəsinin səhlənkarlıq adlandırılmasına “insan həyatına görə məsuliyyəti kim daşıyacaq?” sualını gündəmə gətirir. 

Qəzet eks-prezident Əbülfəz Elçibəyin zəhərlənərək vəfat etməsilə bağlı iqtidarın başladığı kampaniyanı “siyasi ikiüzlülük və hüquqi nihilizm” kimi dəyərləndirir.

“Ekspress” qəzeti bu ilin 7 ayı ərzində əsgər itkilərinin 71 nəfər təşkil etdiyini yazır. 

“Exo” qəzeti son zamanlar ARDNŞ sistemində əməkdaşların zorla işdən azad edilmə ərizələri yazmağa məcbur edildiklərini bildirir. 

Qəzet ölkədə kitabxanaçı, metallurq, aqronom, ipəkçi, rəssam və s. peşələrin sıradan çıxmağa başladığını, əksinə piar, menecment, marketinq sahələrinin inkişaf etdiyini nəzərə çatdırır. 

“Novoe Vremya” qəzeti beynəlxalq birliklərin başçılarının yaxın vaxtlarda Azərbaycana nəzərdə tutulan səfərlərini “Qərbin hər tərəfdən hücuma keçməsi” adlandırır. 

“Bizim yol” qəzeti Lökbatan qəsəbəsində ağır nəticələrə səbəb olan yol-nəqliyyat qəzasını “ilin ən dəhşətli qəzası” kimi qiymətləndirir. 

Qəzet Azərbaycan zabiti Ramil Səfərovun Macarıstandan Azərbaycana ekstradisiyasına etiraz olaraq rəsmi Yerevanın Macarıstanla əlaqələri kəsdiyini yazır. PA hüquq-mühafizə orqanları ilə iş üzrə şöbəsinin müdiri Fuad Ələsgərov Azərbaycan zabiti Ramil Səfərovun Azərbaycana ekstradisiyası və əfv olunmasını “dövlət başçısının humanistlik nümayiş etdirməsi, düşmənə qarşı Azərbaycan xalqının həmrəyliyə çağırılması” kimi şərh edib. 

“Yeni Müsavat” qəzeti R.Səfərovun Azərbaycana ekstradisiya edilən kimi azadlığa buraxılmasını ermənilərin Azərbaycana qarşı müharibəyə başlamaq hədələrilə qarşılamalarına diqqət çəkir. 

Qəzet “Bloomberq” agentliyinə isnadən postsovet ölkələrindən Latviyaya milyardla dollar axdığını yazır. Bunu “çirkli pulların yuyulması” kimi dəyərləndirir şübhəli sayılan banklardan birinin Bakıda yerləşdiyi qeyd edilir. 

Ölkə bazarlarında un, ət, kartofun qiymətinin artdığını yazan qəzet payızda bahalaşmanın daha ciddi olacağı xəbərdarlığı edir.