Mətbuat-Monitorinq 01.11.12

Rəsmi qəzetlər dövlət başçısı İlham Əliyevin Bakının mərkəzində məşhur müğənni Bülbülə qoyulan abidənin açılışında iştirakı haqda yazırlar və dövlət başçısının bəzi sərəncamlarının mətnlərini dərc ediblər.

“Azadlıq”  “The Telegraph” qəzetinin Azərbaycanda korrupsiya və repressiyalar haqda yazmasını “İlham Əliyevin Britaniya mediasının hədəfində olması” kimi dəyərləndirir. 

Qəzet 1993-cü ildə milli hökumətin devrilməsinə səbəb olan 4 iyun qiyamının başçısı Surət Hüseynovun “Milli Qəhrəman” adını geri istəməsini yenidən siyasi səhnəyə qayıtmaq cəhdi kimi dəyərləndirir. 

Eks-prezident Əbülfəz Elçibəyin zəhərlənərək vəfat etməsi ilə bağlı başlanan cinayət işini ailəsi əsassız sayır və olkə ziyalıları ailəni dəstəkləyir.

“Rüşvət olayı”nda ifşa edilən keçmiş deputat Gülər Əhmədovanın barəsində hakim partiyanın tədbir görə bilməməsini qəzet “YAP-ın Gülər Əhmədovadan qorxması” kimi dəyərləndirir. 

Deputat Hüseynbala Mirələmovun oğlu Rəşad Mirələmovun polisdən çıxarılması, istintaqa çağırılması atasına məxsus “1001 gecə” istirahət mərkəzindəki qətllə bağlıdır. 

Rəsmi Gürcüstan ARDNŞ ilə bağladığı müqavilələrə yenidən baxacağı barədə xəbərdarlıq edib.  

“Zerkalo” rəsmi Gürcüstanın ARDNŞ ilə bağladığı müqavilələrə yenidən baxacağı haqda bəyanatına “görünür, ARDNŞ Gürcüstanın yeni hakimiyyətilə məsləhətləşmələrə başlamalı olacaq” mövqeyini ifadə edir. 

“Ekspress” yazır ki, Moskvaya səfər edən PA ictimai-siyasi şöbəsinin müdiri Əli Həsənov səfərin təfərrüatlarını açmaq niyyətində olmadığını bəyan edib. 

Kənd Təsərrüfatı Nazirliyi Bakıdakı “Laləndə” şadlıq sarayında təşkil etdiyi bal yarmarkasını başa çatmasına hələ bir həftə qalmış polis vasitəsilə dağıdıb, bunun nə ilə bağlı olmasını izah etmir. 

Həcc ziyarəti başa çatan kimi Səudiyyə Ərəbistanı krallığı Mədinədəki (məscüdüql-nəbəvi) “Peyğəmbər məscidi”ni sökməyə başlayacaq.

“Novoe Vremya” Böyük Britaniyanın “The Legatum İnstitut” analitik mərkəzinin ictimai rifah və onun qlobal miqyasda inkişfı təhqiqatına istinadən Azərbaycanın ürəkaçan mövqe tutmamasına “siyasət necədirsə, nəticəsi də elədir” mövqeyini ifadə edir.

“Bizim yol” hərbi xidmətdən cəmi 14 gün sonra əsgər Abid Məmmədlidə psixi pozuntuların aşkarlanmasını hərbi xidmət müddətindsə aldığı işgəncə və xəsarətlərlə əlaqələndirir. 

“Yeni Müsavat” dövlət başçısı İlham Əliyevlə əlaqələri olan York hersoqu prins Endryünün Böyük Britaniyanın Azərbaycan səfirini Londona çağırmasını “Bukinqhemdə Azərbaycanla bağlı məxfi dinləmələr” kimi dəyərləndirir. 

Qəzet rəsmi Bakının icazəsiz aksiyalarda iştiraka görə cərimələri fantastik həddə qaldırmaq cəhdini ATƏT-in sərbəst toplaşma azadlığına zidd sayır.  

Qəzet Qərbin rəsmi Bakını “ifşaedici materiallar və “ərəb baharı” ilə, Rusiyanın isə Moskvada yaradılan “milyarderlər ittifaqı” ilə sıxmasını “Azərbaycan məsələsində Kreml və Qərbin anlaşması” adlandırır. 

Füzulu küçəsində sakinlərin evlərinin “qış bulvarı”nın salınacağı adı ilə sökülməsi yalan çıxıb, orada ikimərtəbəli avtodayanacaq tikilir, 2013-cü ilin mayına başa çatacaq.