Mətbuat-Monitorinq 15.11.12

Rəsmi qəzetlər dövlət başçısı İlham Əliyevin Birləşmiş Ərəb Əmirlikləri iqtisadiyyat nazirinin müavinini qəbul etməsi haqda yazır. Bu qəzetlər dövlət başçısının Devid Alan Harris adlı şəxsin “Şöhrət” ordenilə təltif edilməsi, bəzi qanunlara dəyişikliklərin edilməsi haqda sərəncamların mətnlərini dərc ediblər.   

“Yeni Azərbaycan” qəzeti isə iqtidarı kəskin tənqid etdiyinə, Azərbaycanda inqilabi proseslərə başlayacağı barədə xəbərdarlığına görə tanınmış ziyalını təhqirə məruz qoyan “Rüstəm İbrahimbəyov sən kimsən ki...” məqaləsini dərc edib.  

“Azadlıq” qəzeti yazır ki, tanınmış ziyalı Rüstəm İbrahimbəyov iqtidara siyasətşçilərini dəyişmədiyi halda ölkədə inqilab olacağı mesajını edib, cəmiyyətə isə “Suriya, Misir bizim yanımızda toya getməli olacaq” xəbərdarlığı ünvanlayıb. 

Moskvada təsis edilmiş son vaxtlar səs-küyə səbəb olan şərti “milyarderlər ittifaqı”nın Dərbənddə bölməsi yaradılıb. 

Məhkəmə cərimələri üzündən “Azadlıq” qəzetinin hesabına həbs qoyulmasına etiraz artır, Ümüd və Milli İsitqlal partiyaları bunu pisləyən bəyanatla çıxış edib, professor Çapay Sultanov ölkə ziyalılarını qəzetə dəstək olmağa çağırıb. 

Ölkədə insan azadlıqlarının qadağan olunmasını hüquqşünaslar qəzetə “ağzı yumulan adamın əl-qolunu işə salmağa məcbur olacağı” kimi şərh ediblər. 

İctimai Palata dövlət büdcəsilə ilə bağlı müzakirələrdə dövlət başçısına “ona gələcək nəsilləri soymağa kim ixtiyar verib?” mövqeyini sərgiləyib. Qəzet dövlət büdcəsində “və.s xərclər” adlı bölməyə 2 milyard manatın nəzərdə tutulmasına “təyinatı qaranlıq qalan 2 milyard manat” mövqeyini ifadə edir.   

“Zerkalo”  yazır ki, qətlə yetirilmiş yazar Rafiq Tağının həyat yoldaşı qatil tapılmadığı halda özünü uşaqları ilə birgə Prezident Administrasiyasının  önündə yandıracağını bəyan edib. 

Təkcə bu ilin 10 ayı ərzində ailədaxili zorakılıqlar nəticəsində 30 qadın öldürülüb.   

“Ekspress”.  Bakıda keçirilən beynəlxalq İnternet forumla bağlı Avropa Birliyi Avropa komissiyasının vitse- prezidenti Neelle Kreosin rəsmi Bakını tənqidə məruz qoymasından narazı qalan nazir müavini Mahmud Məmmədquliyev  qurumun Bakı təmsilçisinə narazılığını çatdırıb.    

Qəzet ölkədə şəkərli xəstələrin sayının artdığını yazaraq 2005-ci ildə bu sahəyə 1,5 milyon manat, 2013-cü ilə isə təqribən 34 miyon manat vəsaitin ayrıldığını nəzərə çatdırır.  

“Bizim yol”  Moskvada azərbacanlıların təsis etdiyi şərti “milyarderlər ittifaqı” adlı qurumun Dərbənd bölməsinin yaradılmasını “Putinin Azərbaycan sərhəddinə “mili desant” çıxarması” adlandırır.  

Rəsmi Bakının insan azadlqlarını qadağan etməsinə baxmayaraq ATƏT-in Bakı ofisinin rəhbəri müsahibəsində iqtidara loyallıq etdiyinə görə vətəndaş cəmiyyəti institutları təmsilçilərinin tənqidlərinə məruz qalıb.  

“Yeni Müsavat” RF-in Azərbaycandakı səfirini separatçıları Azərbaycana qarşı təşkilatlandırmaqda suçlayaraq Moskvanın Azərbaycanda etnik müharibə hazırladığını yazır.  

Gürcüstanın baş naziri İvanişvili ARDNŞ-nın Gürcüstana yatırdığı  investisiya xərclərini şişirtməsindən ehtiyatlanaraq yoxlama əmri verib. 

“Bizim yol” qəzetinə təzyiqlərlə bağlı qəzetin redaktoru “bandotdel”də ifadə verib. Keçmiş rektor Elşad Abdullayev ölkədə adam oğurluğu ilə məşğul olmuş Hacı Məmmədovun dəstəsindən də qorxulu dəstə olduğu haqda  bəyanat verib. 

Artıq 15 gündür ki, Naxçıvanda “QAZ-3110” markalı maşın vasitəsilə əhalini üsyana çağıran vərəqələr yayılır.