Mətbuat-Monitorinq 20.06.14

Rəsmi qəzetlər dövlət başçısı İlham Əliyevin RF baş naziri müavininin başçılıq etdiyi nümayəndə heyətini qəbul etməsi haqda yazıb, bəzi sərəncamlarının mətnlərini dərc edib.

Həmin sərəncamlardan birinə görə, iyunun 25-i “dənizçi günü” elan edilib.

“Azadlıq” qəzeti vaxtilə Naxçvanda gömrük məntəqəsinin rəisi olmuş Mübariz Pənahovu yanına gətirməsini, deputatlıqdan xaric edilən Hüseyn Abdullayevin bağışlanması üçün səy göstərməsini ARDNŞ prezidenti R.Abdullayevin özünə “komanda yığması” kimi dəyərləndirir.

Qəzet yazır ki, Hərbi Hava Qüvvələri heyətinə komandan təyin edilən Ramiz Tahirovun xalası uşaqlarını yüksək vəzifələrə təyin etməsini heyət təəssüflə qarşılayıb.

Qəzetin iddiasına görə, bir neçə gün öncə Saatlı rayonundakı hüzr məclisində din xadimi Tahir Hacıyevlə vəhabilər arasında insident yaşanması haqda xəbərlər əsassızdır, burada insident tərəfi rayondakı iki dini qruplaşmadır.

“Ekspress” qəzeti yazır ki, politoloq Zərdüşt Əlizadə Kremlin “Avrasiya İqtisadi İttifaqı” layihəsinin Azərbaycan üçün mənası olmadığını bildirib.

“Exo” qəzeti yerli ekspertlərin broyler toyuqlarının 90%-nin keyfiyyət standartlarına cavab vermədiyi qənaətlərini ilk səhifəyə çıxarıb.

Əmək Məcəlləsində işə qəbulla bağlı yaş senzi olmadığına baxmayaraq, 40 yaşdan yuxarı şəxslərə rədd cavabı verilməsini qəzet “yaşa görə əmək ayrı-seçkiliyi” adlandırır.

“Novoe Vremya” qəzeti bir çox dünya ölkələrində hərbi əməliyyatlar getməsində ABŞ-ı günahkar saymasını önə çəkərək, duruma “üçüncü dünya müharibəsinə hazırlaşırıq?” sualı ilə mövqe ifadə edir.

“Bizim yol” qəzeti deputat Rəbiyyət Aslanovanın və oğlu Elnur Aslanovun mülklərinə və bank hesablarına qeyri-rəsmi həbs qoyulmasını, ana-oğulla bağlı araşdırma aparılmasını manjetə çıxarıb.

Səfərbərlik xidmətinin ehtiyatda olan zabitləri yerli şöbələrinə dəvət etməsinin qəzet Suriya və İraqa gedənlərin sayının dəqiqləşdirilməsi məqsədi daşıdığını bildirir. 

“Yeni Müsavat” qəzetinə görə, RF xarici işlər naziri Lavrovun Bakı səfərindən sonra rəsmi Bakı seçim baxımından “Moskva ilə Brüssel arasında daha da sıxışıb” və proses daha kritik mərhələyə daxil olub.  

Qəzet yazır ki, azərbaycanlı mühacirlər Azərbaycanda insan haqlarının ağır durumuna etiraz olaraq iyunun 24-də Starsburqda aksiya keçirməyə hazırlaşırlar.

Rəsmi Bakının əcnəbilərin maliyyə əməliyyatlarını nəzarətə götürmək üçün uyğun qanunlara etdiyi dəyişiklikləri qəzet “iqtidarın olası inqilabın maliyyə qaynaqlarını kəsməsi” kimi dəyərləndirir.  

Qəzet ekspertlərə isnadən RF xarici işlər naziri Lavrovun Bakıdakı mesajlarını “tərəflər arasında Qarabağa dair hansısa sövdələşmənin getməsi” kimi dəyərləndiriblər.