NİDA fəallarının apellyasiyasına iyunun 23-də baxılacaq

NİDA hərəkatı fəallarının apellyasiya şikayəti üzrə hazırlıq iclası iyunun 23-nə təyin edilib. Dinləmələr Bakı Apellyasiya Məhkəməsində Həsən Əhmədovun sədrliyi ilə keçiriləcək, bu barədə Turan-a vəkil Nemət Kərimli bildirib.

Onun sözlərinə görə, müdafiə tərəfi saxta və siyasi motivli ittihamla həbs edilmiş 8 gəncə bəraət verilməsində israr edəcək.

NİDA fəalları Bəxtiyar Quliyev, Şahin Novruzlu, Məmməd Əzizov, Zaur Qurbanlı, Rəşad Həsənov, Üzeyir Məmmədli, Rəşadət Axundov və İlkin Rüstəmzadə (həbsi zamanı “Azad Gənclik” hərəkatının üzvü idi) 2013-cü ilin mart-may aylarında həbs ediliblər.

6 may 2014-cü il tarixində Bakı Ağır Cinayətlər Məhkəməsi onları 2013-cü il 10 mart etiraz aksiyası zamanı kütləvi iğtişaşlar planlaşdırmaqda, qanunsuz olaraq partlayıcı maddə və narkotik saxlamaqda, habelə xuliqanlıqda təqsiri bilərək, 6 ildən 8 ilədək müxtəlif müddətli həbs cəzalarına məhkum edib.

Gənclər ittihamları təkzib ediblər və cinayət təqibinin siyasi motivli olduğunu bildiriblər. Lakin iyunun əvvəllərində məhkumlardan biri – Bəxtiyar Quliyev təşkilatdan çıxdığını bildirib və prezidentdən əvf istəyərək, öz vəkillərindən imtina edib.

Vəkil Fariz Namazının sözlərinə görə, fəalın apellyasiya şikayəti onun məşhur bəyanatından əvvəl tərtib edilib. Buna görə şikayətdə onun ittihamları təkzib etdiyi yazılıb və bəraət məsələsi qaldırılıb. İndi onun mövqeyi məhkəmədə şikayətə baxılarkən aydın olacaq.

Xatırladaq ki, Amnesty İnternational bütün bu məhkumları “vicdan məhbusu” kimi tanıyıb. -06D-