Tikintiyə nəzarət olmadığı üçün yeni binalara maraq azdır

 Əhalinin mərkəzdən köçürülməsi fonunda Bakının ətrafında kütləvi tikinti işləri gedir. Bu, əmlak hüququnun pozulması ilə yanaşı, işin keyfiyyətinə də pis təsir edir. Səbəb budur ki, yüksək ranqlı məmurlar yoxlamalara məruz qalmır. Prokurorluq isə yalnız  iş icraçısı və icraçı direktorların oğurluğuna reaksiya verir.

Rieltor Bahadur Əliyev Turan-a bildirib ki, 80-ci illərdən hökumət tikinti işlərinin keyfiyyətinə fikir vermir. Çox az tikinti sahibi peşəkarlara müraciət edir, ona görə Avropa standartlarından danışmağa dəyməz.

Bakı seysmik aktiv zonadadır, sürüşmə təhlükəsi çoxdur. Ona görə hətta Yasamalda 9 mərtəbədən artıq ev tikmək olmaz.

Bakı ŞİH 12 mərtəbədən yüksək evlər tikməmək barədə qərar verib. Amma yeni binaların çoxu 17-22 mərtəbədir. Səbəb torpağın bahalığı (sotu 50 min manatdan başlayır), icazə almağın çətinliyidir. Yəni mənfəət üçün qaydalar pozulur, icra orqanları bu cinayətə göz yumur.

İcra hakimiyyəti evlərin fasadının rəng qamması barədə qərar qəbul edir. Yalnız mərkəzdə rəhbərliyin (arxutektor yox, hakim ailənin) arzusu nəzərə alınır. SSRİ dövründə Arxitektura və Tikinti Şurasının qərarı olmadan bina tikmək olmazdı. Ona görə Bakıda binalar 2000-ci ildə 6,2 bal zəlzələyə davam gətirdi. İndi belə zəlzələ olsa, yeni binaların çoxu tab gətirməz, - deyə o bildirir.

Onun sözlərinə görə, hazırda İH tikintiyə icazə verir, FHN-in qəbul komissiyası iş bitəndən sonra nöqsanlar aşkarlayır. Nəticədə binalar təmirsiz təhvil verilir, bu isə normativlərə ziddir. Proses mərkəzləşdirilmiş olmalı, obyektin kommunikasiyaları, yanğın və sanitar təhlükəsizliyi yoxlanmalıdır.

«Azad İstehlakçlar Birliyin»nin sədri Eyyub Hüseynovun sözlərinə görə, Cinayət Məcəlləsində icbari əməyə görə cəza var, amma tikintilərdə qanunsuz miqrantlar işlədilsə də, heç kəs məsuliyyətə cəlb edilməyib. Həmçinin qanunun 162-ci (əmək mühafizəsi qaydalarının pozulması), 200-cü (istehlakçıları aldatma, keyfiyyətsiz mal satma), 222-ci (tikinti işlərinə təhlükəsizlik qaydalarının pozulması) maddələri pozulur.

Ekspertin fikrincə, FHN-in saytında təhvil verilən obyektlər və ya onların istismara verilməməsinin səbəbi barədə informasiya verilməlidir. Sayğacların quraşdırılmasına görə pul alınmamalıdır. Bundan başqa, yeni binaların sahibləri öz adamlarını komendant təyin edir, onlar sakinlərdən işləməyən liftlər, zibil, olmayan qaza görə pul yığır. Konstitusiyada istehlakçıların hüququnun qorunması nəzərdə tutulur, amma proteksionizm hökm sürür – yüksək rütbəli məmurların hamısı səhm nəzarət paketinə malikdir, - deyə mütəxəssis bildirib..--17В—