Mətbuat-monitorinq 20.12.14

Rəsmi qəzetlər dövlət başçısı İlham Əliyevin Avstriya və Əfqanıstanın Azərbaycana təyin olunan səfirlərinin etimadnamələrini qəbul etməsi haqda xəbərləri, habelə bəzi idman müəssisələrinə fəxri adlar, bəzi şəxslərə fərdi təqaüdlər verilməsi haqda sərəncamların mətnlərini ilk səhifələrdə yerləşdiriblər.

Bundan əlavə, bu qəzetlərdə Xaçmaz rayonunun Qusarçay-Pirquluoba-Yeni Həyat avtomobil yolunun tikintisinə 4 milyon manat vəsait ayrılması haqda sərəncamın da mətni yer alıb.

“Azərbaycan” qəzeti ABŞ-ın Azərbaycan siyasətini tənqidə məruz qoyan irihəcmli “ABŞ-Azərbaycan münasibətlərinə kiçik ekskursiya və gələcək haqda düşüncələr” adlı yazını səhifələrində dərc edib.

“Azadlıq” qəzeti “Azərbaycan” qəzetinin ABŞ-ı sərt ittihamlara məruz qoymasını “iqtidarın anti-ABŞ isterikasının pik həddə çatması” adlandıraraq manjetə çıxarıb.

REAL Hərəkatının rəhbəri İlqar Məmmədovun dərhal həbsdən azad olunması haqda Avropa məhkəməsinin tələbinə Ədliyyə Nazirliyi “beynəlxalq qurumdur, belə çağırışlar edə bilər” kimi saymazyana cavab verib.

NİDA-çı İlkin Rüstəmzadə Bakı Apellyasiya Məhkəməsində hakimiyyəti sərt tənqidinə görə karserə salınıb.

Qəzet ad günü münasibətliə həbsdə olan tanınmış hüquq müdafiəçisi Leyla Yunusa ünvanlanan təbrikləri dərc edib.

Bakıda smart sayğacların kütləvi şəkildə dəyişdirilməyə başlanmasına qəzet “Azərsu” rəhbərinin “sayğac əməliyyatı” şərhi verir.

PA-nın rəhbəri Ramiz Mehdiyevin tənqidə məruz qoyduğu Arif Mehdiyevi dövlət başçısı İlham Əliyevin “Şərəf” ordenilə təltif etyməsini qəzet “Əliyevin R.Mehdiyevi çətin duruma salması” sayır.

Qəzet İlham Əliyevlə görüşdüyünə görə Malta baş nazirinin ciddi tənqid atəşinə tutulduğunu yazır.

 “Ekspress” qəzeti “Azərbaycan” qəzetinin ABŞ-ın Azərbaycan siyasətini tənqidə məruz qoymasını diqqət mərkəzinə çəkərək, bunu “Azərbaycanın ABŞ-a qarşı olması” kimi dəyərləndirir.

Karikatura dərc edən qəzet bu şəkil vasitəsilə beyənlxalq gərginlikdə ABŞ-ı daha çox günahkar saymasını nümayiş etdirir.

“AzərLayt” markalı Azərbaycan neftinin dəyəri 60 dollara enib.

 “Novoe Vremya” qəzeti Avropanın Rusiyadan qaz nəqlindən imtina edərək Azərbaycanla qaz nəqlinə hazırlaşmasını “Bakını yenə də qaz “oyun”larına çəkməsi” sayaraq ilk plana çıxarıb.

“Bizim yol” qəzeti Rusiyada çalışan azərbaycanlıların Bakıdakı əmlaklarını satmağa başlamasını ilk səhifəyə çəkib.

Qəzet bələdiyyə seçkilərinə 3 gün qalmasına baxmayaraq, vətəndaşların bundan xəbərsiz qalmasına toxunaraq, bələdiyyələrin vətəndaşın yaddaşında ancaq torpaq satması ilə qalmasını bildirir.

“Yeni Müsavat” qəzeti rəsmi Bakının ABŞ-ı Bakıda dövlət çevrilişinə cəhddə ittiham etməsini önə çəkərək bunu “ABŞ-a qarşı sensasion ittiham” adlandırır.

Avropa Komissiyasının SOCAR-la Yunanıstan arasında 500 miylon dollarlıq sövdələşmənin təsdiqini təxirə salmasına toxunan qəzet bunu “Brüssellə rəsmi Bakı arasında “qaz müharibəsinin” qızışması” kimi şərh edir.

Qəzet İTV-nin keçmiş sədri İsmayıl Ömərov və yaxınlarının şəriklərinə böyük pullar atdığını, keçmiş şəriklərin dövlət başçısından kömək istədiklərini yazır.