Mətbuat-Monitorinq 22.10.15

Rəsmi qəzetlər son 5 gündə ölkə mediasının gündəmini zəbt edən MTN-lə bağlı baş verən hadisələr barədə hər hansı bir analtik yazı dərc etməyiblər. Bu haqda MTN mətbuat xidmətinin nazirlik barədə əsassız informasiya yayılmasının yolverilməz olduğu nəzərə çatdırılır.   

Dövlət başçısı İlham Əliyevin Sabunçu Məhkəmə Kompleksinin açılışında iştirakı rəsmi qəzetlərin ilk səhifələrində yer alıb.

Bundan əlavə, bu qəzetlərdə Həmkarlar Təşkilatları İttifaqının bir qrup əməkdaşının dövlət mükafatları ilə təltif edilmələri də bu sırada yer alır.  

“Azadlıq” qəzeti MTN-in həbs edilən 7 zabitindən 5-nin adının bəlli olmasını, nazirin cinayətlərinin üzə çıxmasını və qohumunun vəzifədən azad edilməsini manjetə çıxarıb.

MTN ətrafında baş verın hadisələri hakimiyyətin mahiyyəti sayan ekspertlər rejimin istənilən kadrının tərcümeyi-halının “qara” olduğunu iddia edirlər. 

Ekspertlər MTN ətrafında baş verən hadisələrə “məmurların korrupsiyaya qurşanması, amma cəzalandırılmamalarının nəticəsi” şərhini veriblər.   

Ekspertlər MTN ətrafında baş verən hadisələrin “dinləmə” ilə bağlı olması haqda rəsmi açıqlamalara “iz azdırmaqdan başqa bir şey olmaması” kimi rəy veriblər.

Bu ilin avqustunda qətlə yetirilən jurnalist Rasim Əliyevin valideynləri ekspertizanın nəticələri hələ də açqılanmadığı üçün prezidentə müraciət etməyi nəzərdə tuturlar.

REAL Hərəkatının sədri, həbsdə  İlqar Məmmədov vəkili Fuad Ağayevə bildirib ki, oktyabrın 16-da 2 saylı həbsxananın rəis müavini və bir neçə əməkdaşı tərəfindən döyülüb.

Qəzet banka borcu olan vətəndaşların ölkədən çıxa bilmələrinə qadağa qoyulmasının ciddi narazılıqlara səbəb olacağı barədə xəbərdarlıq edir.

2016-cı il büdcəsinin azhəcmli olmasına diqqəti çəkən ekspertlər kommunal xidmətlərin qiymətlərinin artırılmayacağı ilə bağlı rəsmi Bakının açıqlamalarını əsassız sayırlar.  

“Ekspress”  Səhiyyə Nazirliyinin hazırladığı yeni qaydalara əsasən reseptlərə dərmanı icad edən firmanın adı yox, dərmanların tərkibinin yazılacaqını, bundan apteklərin qazanacağını, Çin dərmanlarının Avropa dərmanlarını bazarda sıxışdıracağını önə çəkərək bunu “dərman firmalarının sonu” kimi qiymətləndirir.

“Exo”  ölkənin Vergilər Məcəlləsinə dəyişikliklərə əsasən tikinti ilə məşğul olan fiziki və hüquqi şəxslərə “sadələşdirilmiş vergi və ya əlavə dəyər vergisi və gəlir vergisi” kimi vergi ödəmək seçimi olacağını ön plana çəkir.

“Bizim yol” MTN ətrafında baş verən hadisələrlə bağlı iki general və iki polkovnikin həbsə alınmasını ilk səhifəyə yerləşdirib.

“Yeni Müsavat” MTN ətrafında baş verən hadisələrə səbəb kimi sahibkarların incidilməsini yox, dövlət çevrilişinə cəhdin olduğunu iddia edərək ilk səhifəyə çıxarıb.

İş adamı Maqsud Mahmudov MTN-də 250 min manat gətirmədiyi halda qadınla şantaj olunacağı kimi hədə-qorxu ilə üz-üzə qoyulması haqda açıqlama verib.

Qəzet Nəqliyyat Nazirliyinin Dövlət Avtomobil Nəqliyyatı Xidmətinin keçmiş rəisi Hüseyn Salamovun həbsini “nəqliyyat sektorunda da hay-küylü həbslərin başlanması” kimi dəyərləndirir.

Ekspertlər Cənubi Osetiyanın Rusiyaya birləşmək istəməsi bəyanatını Kremlin eyni addımı Qarabağa münasibətdə də ata biləcəyi mesajı kimi dəyərləndirirlər.

Ekspertlər “Texnika Bank”ın durumunu “müflis, problemli kreditlərin çox olması, əmanətləri qaytara bilməməsi, Mərkəzi Bankın bu fakta susması” kimi şərh edirlər.