Rasim Əliyevin valideynləri prezidentə müraciət ediblər

“Cənab prezident, jurnalist Rasim Əliyevin ölümü ilə bağlı cinayət işini şəxsi nəzarətinizə götürmənizi nəzərə alaraq sizdən  ekspertiza idarəsinə və Səhiyyə Nazirliyinə qısa zamanda rəy vermə tapşırığı verməyinizi xahiş edirik.  Həmçinin xahiş edirik ki, Bakı Şəhər Prokurorluğu tərəfindən istintaqın gedişının sürətləndirilməsi ilə də bağlı tapşırıq verəsiniz”, -  mərhum jurnalist Rasim Əliyevin valideynləri: Məmmədəli və Teyfurə Əliyevlərin prezident İlham Əliyevə müraciətində  deyilir.

Valideynlər bildirirlər ki, Bakı Şəhər Prokurorluğu istintaqın gedişi barədə ailəyə və vəkil Əsabəli Mustafayevə demək olar ki, heç bir məlumat vermir.

“İstintaq qrupunun rəhbəri  müstəntiq Kamran Məmmədov ikihəftəlik bülletenə çıxandan sonra oğlumuzun ölümü ilə bağlı istintaq tədbirləri tamamilə dayandırılıb. Bu və yuxarıda qeyd etdiyimiz məsələlər ailəmizin ciddi narahatlığına səbəb olub. Ehtimal edirik ki, bəzi şəxslər istintaqın uzadılmasından sui-istifadə edərək oğlumuzun ölmündə təqsiri olanları məsuliyyətdən yayındırmaq niyyəti  güdürlər”, - sənəddə qeyd edilir.

Jurnalist Rasim Əliyev 2015-ci il avqustun 8-də Bakının Bayıl qəsəbəsi ərazisində bir qrup naməlum şəxs tərəfindən döyülərək çoxsaylı bədən xəsarətləri ilə Kliniki Tibbi Mərkəzə yerləşdirilib və avqustun 9-da orada vəfat edib. Fakt üzrə Bakı Şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkmiş şəxsin ölümünə səbəb olduqda) maddəsi ilə cinayət işi başlanılaraq prokurorluq və polis əməkdaşlarından ibarət istintaq-əməliyyat qrupu yaradılıb.

Jurnalistin ölümündə şübhəli bilinən 6 nəfər, o cümlədən futbolçu Cavid Hüseynovun  barəsində həbs qətimkan tədbiri seçilib.

Baş prokuror Zakir Qaralov oktyabrın 1-də bildirib ki, cinayətdə iştirak edən şəxslər müəyyən edilərək barələrində tədbir görülüb. 

“Yaxın zamanlarda iş məhkəməyə göndəriləcək. Bu məsələnin siyasiləşdirilməsi yolverilməzdir. Dünyanın hər bir ölkəsində jurnalist qətlləri baş verir. Biz bundan təəssüf hissi keçiririk. Bu, bizim cəmiyyətə xas olan hal deyil”,  -baş prokuror qeyd edib.

Vəkil Əsabəli Mustafayev isə deyib ki, jurnalistin qətli ilə bağlı məsələnin tezliklə məhkəməyə göndəriləcəyi inandırıcı deyil.

Vəkil artıq epizod üzrə oğurluq maddəsilə cinayət işinin başlandığını nəzərə çatdırıb. Onun sözlərinə görə, qətlin səbəblərilə bağlı hələ ekspertizanın nəticələri ortada yoxdur. Bundan əlavə, Ə.Mustafayev bir sıra prosedurların başa çatmadığını da qeyd edib.

“Ona görə də, kimin nə deməsindən asılı olmayaraq, ən yaxşı halda bu məsələ ay yarımdan tez məhkəmə baxışına çıxarıla bilməyəcək”, - Ə.Mustafayev bildirib.

Jurnalistin valideynləri prezidentə müraciətdə yazırlar  ki, 2 aydan çox vaxt keçsə də, “oğullarının ölümünün səbəblərini araşdırmaq üçün  təyin olunmuş məhkəmə-tibbi  ekspertizasının, Rasimin ölmündə həkim səhlənkarlığının olub-olmaması barədə mütəxəssis rəyi verməli olan Səhiyyə Nazirliyinin nəzdindəki xüsusi komissiyasının rəyləri nə istintaqa, nə də onlara verilməyib.

“Fikrimizcə,  rəylərin bu günə qədər hazır olmaması istintaqın gedişinə ciddi maneələr törədir. Düşünürük ki,  oğlumuzun ölümündə həkimlərin səhlənkarlığı  da ciddi rol oynayıb və komissiyanın rəyinin istintaqa təqdim edilməməsi şübhələrimizi daha da artırır. Qanuna uyğun olaraq tibbi ekspertizanın rəyi bir ay ərzində istintaqa təqdim edilməli idi. Lakin qeyd etdiyimiz kimi naməlum səbəbdən həm Məhkəmə-Tibbi Ekspertiza İdarəsi, həm də Səhiyyə Nazirliyi bu rəyin verilməsini süni şəkildə yubadır”, - valideynlər qeyd edirlər.  -03B-