Mobil operatorlardan yenilik

Rabitə və Yüksək Texnologiyalar Nazirliyinin Məlumat Hesablama Mərkəzinin (MHM) məlumatına görə, Sim-kartların online-satış sistemi tətbiq edilib.  Hökumətin qərarına əsasən bundan sonra üç mobil operator (Azercell, Bakcell və Azerfon) məhsulları mərkəzləşdirilmiş və vahid qaydalar əsasında satacaqlar. Yenilik artıq bir çox müştəri xidmətlərində uğurla sınaqdan keçirilib.

Nömrə satışı zamanı mobil nömrə operatorların şəbəkəsində aktivləşdirilməsi ilə bağlı ərizəçiyə aid məlumatların fiziki və hüquqi şəxslər üçün “Elektron hökumət” portalına qoşulmuş informasiya sistemləri vasitəsilə ilkin mənbədən identifikasiya edilərək operatorların və MHM-in vahid məlumat bazasına onlayn rejimdə elektron formada daxil edilməsi təmin olunacaq.

Yeni metod abunəçi bazasının fərdi identifikasiya nömrəsinə uyğun olaraq vahid şəklə salınmasına imkan verəcək. Belə olan halda “bir güllə ilə iki dovşan” vurmaq olar – avtomatik olaraq nömrənin kimin adına qeydiyyatda olduğu haqda məlumat əldə etmək, həmçinin elektron xidmətlər portalı vasitəsilə göstərilən xidmətlərin siyahısını  genişləndirmək olar.

Bundan əlavə, portal “şəxsi kabinet”in yaradılmasını nəzərdə tutur ki, burada da istifadəçilər öz mobil nömrələri haqda məlumat ala bilər. Həmçinin istifadəçilərə müxtəlif dövlət qurumlarının xidmətləri haqda bilgi (şəxsiyyət vəsiqəsinin  etibarlılıq müddətinin başa çatması, kommunal borclar, rabitə xidmətləri, bank xəbərdarlıqları, cərimə, çağırış, məhkəmədən bildirişlər və s.) verilməsi nəzərdə tutulur.--17D—