Mətbuat-monitorinq 23.08.13

Rəsmi və iqtidaryönlü qəzetlər dövlət başçısı İlham Əliyevin köçkünlərə yemək üçün verilən aylıq müavinətin artırılması, Balakən rayonunun sosial inkişafı və Balakən-Sarıbulaq-Qabaqçöl-Xalatala yolunun çəkilşi üçün hər birinə 2 milyon manat vəsait ayrılması haqda sərəncamlarının mətnlərini dərc ediblər. 

“Azadlıq” qəzeti Milli Şuranın avqustun 26-da keçirməyi nəzərdə tutduğu sessiyasının avqustun 23-də keçirilməsi və vahid namizədin müəyyən olunması haqda qərarını ilk plana çıxarıb. 

Dövlət başçısı İlham Əliyev köçkünlərə yemək xərcləri üçün verilən aylıq 16 manat 50 qəpiklik vəsaiti 10% artırıb ki, bu da 1manat 65 qəpik deməkdir.

Tanınımış bəstəkar Cavanşir Quliyev mövcud iqtidarın nə dinc, nə də savaşla Qarabağı geri qaytara bilməyəcəyi bəyanatı səsləndirib. 

Kəlbəcər rayon təhsil şöbəsinin hazırkı müdiri rayonun xanım sakininə saxta diplom düzəldib. Müstəqil jurnalist Ərşad İbrahimli video-material yayıb. Müsahibə verən “diplom sahibi” jurnalistin intervyunu hədə-qorxu ilə alması haqda Gəncə prokurorluğuna şikayət edib və jurnalistə qarşı cinayət işi başlanıb.    

“Ekspress” qəzeti büdcə təşkilatlarında maaşların artırılması ilə bağlı dövlət başçısının sərəncamının 85 min nəfəri əhatə edəcəyini bildirir. 

Bakının Dübəndi kənd bağ massivində seksual manyaklığa görə Naxçıvan sakini Elnur Abuzərovu kənd sakinləri döyə-döyə öldürüblər. 

“Exo” qəzeti ölkədə mütşərilərinə qısa müddətə, hətta bir neçə saatlığa otaq təqdim edən 300-ə qədər qeyri-leqal otelin fəaliyyətdə olmasını ilk səhifəyə çıxarıb. 

“Novoe Vremya” qəzeti rəsmi Bakının bütün beynəlxalq tənqidlərə diş qıcıtmasını “iqtidarın sevimli məşğuliyyəti” adlandırıb.

“Bizim yol” qəzeti Milli Şurada təmsil edilən partiyalardan 4-nün ehtiyat vahid namizəd müəyyən olunmasına qarşı qurumun bir qrup üzvünün etiraz bəyanatını “Milli Şurada üsyan” kimi dəyərləndirir.  

“Yeni Müsavat” qəzeti özünü “EL” Hərəkatının sədri Eldar Namazovun müavini kimi təqdim edərək Milli Şuranı ölkədə iğtişaş yaratmaqda suçlayan Əflan İbrahimovun açıqlamalarına qurumdan “bu iqtidarın təxribatıdır” cavabı verilib.

Məktəblilərin məktəbə hicablı gələ bilməsi və ya bilməməsinə Təhsil Nazirliyindən şagirdlərin məktəbə müəyyən olunmuş geyim formasında gəlməsi kimi qeyri-müəyyən cavab verilib. 

Bakıdakı “Ronahi” Kürd Mərkəzi qurumunda sədr Fəxrəddin Paşayevin vəzifəsindən uzaqlaşdırılması ilə bağlı qarşıdurma yaranıb, işə polis müdxiləsi baş verib.