Mətbuat-Monitorinq 24.11.12

Bugünki qəzetlər Bakıda keçirilən beynəlxlaq toplantıda Ermənistanın keçmiş xarici işlər naziri Raffi Ovanesyanın Azərbaycan əleyhinə danışmaq istəməsi mövzusuna maraq göstəriblər. 

Bu qəzetlər Bakının Pirallahı qəsəbəsinin sosial iqtisadi inkişafı ilə bağlı dövlət başçısının sərəncamı ilə 5 milyon manat vəsait ayrılması haqda sərəncamın mətnini dərc ediblər. 

“Azadlıq” qəzeti Meksikada Heydər Əliyevin heykəlinin götürülməsilə bağlı komissiya yaradılmasına cavab olaraq rəsmi Bakının bu ölkəyə diplomatik əlaqələri kəsəcəyi, yatırdığı 4 milyad dollar investisiyanı geri çəkəcəyi ultimatumunu “Heydər Əliev naminə görünməmiş rüsvayçılıq” adlandırır. 

Qəzet Gəncə universitetləri tələbələrinin iki aydır ki, təqaüdlərini ala bilmədiklərinə görə aksiyalara hazırlaşdıqlarını yazır. 

İctimayyət fəalları yazar Rafiq Tağının qatilinin tapılmamasını iqtidarın bunda maraqlı olmaması ilə əlqələndiriblər. 

“Zerkalo” qəzeti təbii fəlakət risklərinin dəyərləndirilməməsinin ağır nəticələrə səbəb olduğunu yazaraq, son 30 ildə təbii kataklizmlərlə bağlı sığorta ödəmələrinin 15 dəfə artdığını nəzərə çatdırır. 

“Ekspress” qəzeti 5 min ilə yaxın yaşı olan Dərbənd şəhərinin 2 min illik yubileyinin qeyd olunması haqqında Putinin fərmanındakı “Dərbəndin neçə yaşı var?” sualı ilə qaşrılayır. 

“Exo” qəzeti ekspert Nüsrət İbrahimova isnadən Bakıda ailələrin 70%-dən çoxunun 30 il və daha əvvəl tikilmiş binalarda yaşadığını, bu binaların istismar müddətinin başa çatdığını yazaraq, ölkə üzrə mənzillərin 65%-nin yaşayış üçün qorxulu olduğunu bildirir.

“Bizim yol” qəzeti rəsmi Bakının Meksikaya Heydər Əliyevin heykəli götürüldüyü halda bu ölkə ilə əlaqələrin kəsiləcəyi ultimatumunu ilk səhifəyə çıxarıb. 

Qəzetin yazdığına görə, YAP funksioneri Mübariz Qurbanlı bü günlərdə təsis edilən talış birliyini “milyardelər ittifaqı”nın yaradıcılarından Söyün Sadıqovun yaratması iddiası irəli sürüb. 

“Yeni Müsavat” qəzeti ARDNŞ prezidenti Rövnəq Abdullayevin London səfərini “İqtidarın Qərbdən dəstək üçün hərəkətə keçməsi” kimi dəyərləndirir. 

Azərbaycan iqtidarının yanında olan mətbuatın Moskvada azərbaycanlılardan ibarət şərti “milyarderlər ittifaqı”nın Kreml tərəfindən yaradılması ittihamına qurum təsisçiləri “qurum azərbaycanlılar tərəfindən və azərbaycanlılar üçün yaradılıb” cavabı veriblər. 

Qəzet azərbaycanlı miqrantların Rusiyadan çıxarılmalarının kütləviləşdiyini yazır.