Mətbuat-Monitorinq 25.12.15

Rəsmi qəzetlər dövlət başçısı İlham Əliyevin gözdən əlillər üçün yeni yaşayış binasının açılışında iştirakı, dünya azərbaycanlılarına təbrik məktubunu ilk səhifələrdə yerəşdiriblər. Bu qəzetlər ölkədə yaşanan iqtisadi böhranla bağlı hər hansı tənqidi məqalə dərc etməyiblər.

“Azadlıq” qəzeti MTN-in keçmiş şefi Eldar Mahmudovun yaxın qohumlarının qiymətli məlumatlarla ölkədən çıxdıqlarını, onların həbsi üçün hakimiyyətin səy göstərdiyini və bu məlumatların xaricə ötürülməsində E.Mahmudovun ətrafında şübhə yaranmasına diqqəti çəkir.

Milli Şuranın Koordinasiya Mərkəzi Nardaran olayları ilə bağlı həbs edilənlərin hüquqlarının pozulmasını və prokurorluq sistemindən istefa verən müstəntiq Eldar Səfərova təzyiqləri pisləyib, habelə son 10 ildə ictimai-siyasi fəallara və iş adamlarına qarşı təqib və həbslərdə əli olan müstəntiq və hakimlərin cinayət məsuliyyətinə alınmasını tələb edib. Qurumun Koordinasiya Mərkəzinin üzvü, keçmiş deputat Gültəkin Hacıbəyli rəsmi Bakının ABŞ-a sanksiya nəzərdə tutan layihə hazırlamasını bir şəxsin Sakit okeana “səni məhv edərəm” deməsilə müqayisə edib. Bu mövzu ilə bağlı yazan qəzet rəsmi Bakının ABŞ-a sanksiya nəzərdə tutan qanun layihəsini “özünü gülünc vəziyyətə salmaq” adlandırır.

Manatın devalvasiyası ilə bağlı bankların manatla 6 milyard fərqi yaranıb, bu baxımdan kreditlərin köhnə məzənnə ilə qaytarılması üçün  banklar öz borclarını ödəmək üçün əlavə olaraq 6 milyard manat mənbə tapmalıdırlar.

“Əliyev hansı inkişafdan danışır” adlı məqalədə ölkənin böhran yaşadığı halda dövlət başçısının ölkədə sürətli iqtisadi inkişafdan danışması yersiz sayılır. İndiki böhrana səbəb kimi ölkə rəhbərliyinin ölkənin dinamik inkişafını təmin edən çoxşaxəli iqtisadi inkişaf modeli yarada bilməməsi göstərilir.

Böhranla bağlı əhalinin düşmüş olduğu maliyyə problemlərini aradan qaldırmaq üçün Milli Şuranın sədri Cəmil Həsənli əməkhaqqı, pensiya və müavinətlərin devalvasiyaya uyğun indeksasiya olunmasını “ən təxirəsalınmaz yol” kimi dəyərləndirir.

Müstəqil ekspertlər hökumətin ölkədə 4% inflyasiya olması mövqeyni əsassız sayaraq real inflyasiya həddinin 11-12% olduğunu iddia edirlər.

“Ekspress”  Konresmen Smitin “Azərbaycan Demokratiya Aktı” layihəsində dini icmalara qadağalar olması müddəasına Azərbaycanda fəaliyyət göstərən dini konfessiya rəhbərlərinin etiraz müraciətini önə çəkib.

Ölkənin yaşadığı indiki böhranda vətəndaşların toy etməyə belə qorxduğunu deyən ekspertlər “devalvasiyanın “toy biznesi”ni də vuracağı”nı bildirir.

Ekspertlərə isnadən “ciddi bahalaşma”nın qaçılmaz olduğunu yazan qəzet illik inflyasiyanın 10% ötə biləcəyini ehtimal edir.

“Novoe Vremya”  neftin dəyərdən düşməsi nəticəsində baş verən devalvasiyanın Azərbaycana yaratdığı iqtisadi böhranı “neft nağılının qurtarması” kimi dəyərləndirir. 

“Bizim yol”  Hesablama Palatasının “Azərsu” ASC-də dövlətin milyonlarla vəsaitinin talan edilməsi kimi korrupsiya faktlarınnı üstünü açmasını ilk səhifəyə yerləşdirib.

Azərbaycanın ən böyük ərzaq təminatçısı olan “Azərsun Holdinq” şirkətin qiymətləri artırmasına “bahalaşma qaçılmazdır” mövqeyini bildirib.

Paytaxt sakinləri devalvasiyanın yaratdığı problemləriə dair qəzetə açıqlamalarını “qiymətlərin kəskin bahalaşmasının əhalini çətin vəziyyətə salması” adlandırırlar.

Hazırkı iqtisadi durumla bağlı ekspertlər inhisar və korrupsiyanın aradan qaldırılması kimi konkeret addımlar atılmadığı halda ölkənin iqtisadi xaosa getdiyi barədə xəbərdarlıq edirlər. 

“Yeni Müsavat”  baş nazirin müavini Əli Əhmədovun əmisioğlunin işini  Korrupsiya İdarəsinin, “Azərpoçt” MMC-nin direktor müavini olan bacısıoğlunun işini yeni rabitə naziri əvəzinin yoxlatdırmasını “baş nazir müavininin qohumları üçün həbs təhlükəsi” adlandıraraq ilk səhifəyə çıxarıb.

Keçmiş deputat Maksim Musayev ölkədəki iqtisadi böhrana görə YAP hakimiyyətini günahkar sayaraq “vaxt gələcək cavab verəcəklər” mövqeyini ifadə edir. 

ABŞ-a sanksiyalar  nəzərdə tutan “ABŞ-da insan hüquqlarının vəziyyəti haqqında” qanun layihəsinin müəllifi, deputat Rövşən Rzayev “bunu hökumətin mövqeyi yox, bir deputatın mövqeyi adlandırır.