Qeyri-infeksion xəstəliklərlə mübarizəyə dair strategiya təsdiqlənib

Dekabrın 23-də prezident İlham Əliyev “Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün Strategiya”nın təsdiq edilməsi haqqında sərəncam imzalayıb.

Sənəd siqaret çəkməyə və alkoqolizmə qarşı iqtisadi və digər metodlarla mübarizənin sərtləşdirilməsini nəzərdə tutur. Tütün məmulatlarından istifadənin səviyyəsinin  2020-ci ilədək 10% azaldılması nəzərdə tutulur. Araşdırmalrın nəticələrinə görə, kişilərin 50%-siqaret çəkir.

Azərbaycan zəngin tərəvəz və meyvə məhsulları ilə məşhur olsa da əhalinin 40%-dən çoxu bu məhsullardan gündəlik istifadə etmir. Yaş qrupları, cinslər arasında ciddi fərq olmadan əhalinin əksəriyyəti (84,9%-i) gün ərzində ÜST tərəfindən tövsiyə edilən miqdardan az meyvə-tərəvəz istifadə etdiyini bildirib. Ev təsərrüfatlarının yarıdan çoxunda (54%) doymamış yağlardan istifadə edilir.

Son 10 ildə ölkədə qan dövranı sistemi xəstəlikləri 5%, tənəffüs üzvlərinin xəstəlikləri 11%, endokrin sistemi xəstəlikləri 2,5 dəfə, o cümlədən şəkərli diabet 3,7 dəfə, sinir sistemi xəstəlikləri 15%, bədxassəli yenitörəmələr 30% artıb.

Ölümün səbəbləri arasında qeyri-infeksion xəstəliklər əsas yer tutur. Avropa ölkələrində ölüm hallarının 86%-i, Azərbaycanda isə 79,6%-i yuxarıda göstərilən 4 xəstəlik sinfi üzrə ölümün payına düşür. Birinci yerdə qan dövranı sisteminin xəstəlikləri (59,8%), 2-ci yerdə bədxassəli yenitörəmələr (12,5%), 3-cü yerdə isə tənəffüs orqanlarının xəstəlikləri (2%) durur.08B