Mətbuat-Monitorinq 30.07.13

Rəsmi və iqtidaryönlü qəzetlər dövlət başçısı İlham Əliyevin Lənkəran şəhərinin sosial inkişafı üçün 2.5 milyon manat vəsait ayırması haqda sərəncamının mətnini dərc ediblər.

“Azadlıq” qəzeti qarşıdakı seçkilərə Paşayevlərin nəzarti ələ götürməsini PA-nın rəhbəri Ramiz Mehdiyevin küncə sıxışdırılması sayaraq manjetə çıxarıb. 

Avropa və Rusiyanın Azərbaycan qurumları təmsilçilərinin görüşündə rəsmi Bakının dindən şəxsi məqsədləri üçün istifadə etməsi pislənilib.   

İnsan haqları müdafiəçisi Rebekka Vinsent Azərbaycan mediasının durumunu “azadlıq böhranı yaşaması” kimi şərh edib. 

Ekspertlər Azərbaycanda qiymətlərin MDB və Avropadan yuxarı olmasının səbəbi kimi inhisarçılığı göstəriblər. 

Siyasi ekspertlərə görə, Prtin, Nazarbayev və Əliyev görüşünün açar müzakirə mövzusu Azərbaycanın MDB Gömrük İttifaqına üzv olmasıdır. 

Milli Şuranın sədri Rüstəm İbrahimbəyov Bakıya gəlməsinin təxirə salınmasına səbəb kimi Amerikadakı məsləhətçilərinin mövqelərini göstərib. 

Qəzet şair Rüstəm Behrudinin “Hamıya qalib gəlib özünü satan Bakı” ifadəsinə Bakı sakinlərinin etirazlarının davam etdiyini nəzərə çatdırır.          

“Zerkalo” RF prezidenti Putinin Azərbaycana gözlənilən səfərini “Qarabağ münaqişəsinin tənzimlənməsinə dair Vaşinqtonun sülh təşəbbüslərini darmadağın olunması” kimi dəyərləndirir.

Dövlət başçısı yanında Təhsil Komissiyası təhsilini xaricdə davam etdirmək üçün 41 namizədi bəyənib.

“Ekspress” Urmu gölünün qurumasının qarşısını almaq üçün İran tərəfinin Araz çayının suyunu gölə yönləndirməsinə ekspertlərin “Azərbaycanın su ehtiyatlarının azalacağı” barədə rəy verdiklərini nəzərə çatdırır. 

Ölkədə 500 min nəfərdən çox sahibkar olduğunu yazan qəzet bunun 18 faizinin qadın olduğunu nəzərə çatdırır. 

“Exo” orta statistik azərbaycanlı kişinin öz gəlirinin 20%-ni spirtli içki və siqaretə xərcləməsi məsələsini ilk səhifəyə çıxarıb.

“Novoe Vremya” ölkədə qarşıdakı seçkilərin saxtakarlıqla keçiriləcəyini iddia edərək məsələyə “ölkə növbəti seçki saxtakarlığının astanasındadır” mövqeyini ifadə edib.

Qəzet ATƏT-in Bakı ofisinin statusunun dəyişməsinə “demokratiya Santa Klaus qiyafəsində” ironiyasını ifadə edib.

“Bizim yol” Mübariz Mənsimova məxsus “Pal-Süd” MMC-nin iflas etməsini biznesmenin “Azərbaycandaki biznesinin çökdürülməsi” adlandırır.

Azərbaycanda İnternet istifadəçilərinin yazdıqlarının istənilən zaman əleyhlərinə işləyə biləcəyi anonsunu verən ekspertlər “hər bir istifadəçinin risk altında olması”nı bəyan ediblər. 

Politoloq Hikmət Hacızadə ölkədəki qanunsuzluqlara xalqın reaksiya verməməsinə ironik “xalqımız ya məzuniyyətə çıxıb, ya da istefaya gedib” mövqeyini bildirib. 

“Yeni Müsavat” rəsmi Bakının Gürcüstan prezidentilə əlaqələri kəsdiyini yazaraq bunu Rusiyaya görə etdiyini bildirir. 

Milli Şuranın 15 üzvünün sədr Rüstəm İbrahimbəyovla görüş üçün Tbilisiyə getməsinə qəzet “müxalifətin Tbilisi sammiti” mövqeyini ifadə edib. 

Eks-spiker Rəsul Quliyev Azərbaycan müxalifətinin Tbilisi görüşündə yeni vahid namizəd məsələsi olarsa öz namizədliyini təklif edib, belə olarsa istənilən halda Bakıya dönəcəyini qeyd edib. 

Bu ilin çimərlik mövsümü başlayandan sularda 30 nəfər həlak olub ki, bunun da 11 nəfəri azyaşlıdır.