Mətbuat-Monitorinq 30.07.14

“Azadlıq” qəzeti nazir Kəmaləddin Heydərovun hakim ailənin hədəfinə gəldiyini və buna görə nazirin biznes imperiyasının çökdürülməsi planının işlənildiyi iddiasını ilk səhifəyə çıxarıb.

Uzun müddətdir ki, iqtidarın  təzyqi altında olan hüquq müdafiəçisi Leyla Yunus dövlət başçısına müraciətində ölkənin gənc ictimai-siyasi fəallarını həbsdən azad etməyə, özünü isə bu həbslərə səbəb olan vahimədən qurtarmağa çağırıb. 

Qəzet rəsmi Bakıya Ramazan bayramı münasibətilə bütün müsəlman ölkələrində əfv fərmanı verilsə də Azərbaycanda verilməməsi qınağını ifadə edərək bunu “hökumətin mahiyyətinə uyğun davranış” adlandırıb.

Müsavat Partiyasında “bir şəxsin partiya sədrliyinə iki dəfə seçilməsi” ilə bağlı nizamnamənin maddəsinə yenidən baxılması səbəbindən ikitirəlik yaranıb.

Hərbi ekspertlər Baş Qərargah üçün yeni inzibati binanı tikəcək şirkəti müdafiə nazirinə və Baş Qərargah rəisinə yaxın sayaraq bunu “korrupsiyaya yol açan addım” kimi dəyərləndirirlər.

Rəsmi Bakının Azərbaycanın Qafqazda bir saylı turist məkanı olması iddiası önünə Gürcüstan turist məkanlarının 7 dəfə çox vergi ödəməsi faktını qoyan ekspertlər bunu “ölkə turizmi ilə bağlı rüsvayçı statistika” adlandırırlar.

“Yeni Müsavat”  İraqda məzhəb qırğını salan “İraq Şam İslam Dövləti” (İŞİD) adlı terror qruplaşmasının Türkiyə üzərindən Azərbaycanı hədələməsini “qara kabus sərhədlərin bir addımlığında” iddası ilə ilk səhifəyə çıxarıb.

Rusiya xarici siyasətinin son vaxtlar Azərbaycana münasibətdə “yumşalmasını” ekspertlər rəsmi Kremlin Azərbaycanı Avrasiya İttifaqına cəlb etmək səyilə əlaqələndirirlər.

ABŞ-ın ATƏT-dəki səfiri Daniel Baer ATƏT-in Bakı koordinatorunun rəsmi Bakının tələblərinə tabe olmasına, vətəndaş cəmiyyəti institutları ilə fəal işləməməsinə “Sizin şefiniz Azərbaycan hökuməti deyil” etirazını ifadə edib.

Qəzet rəsmi Kremlin Ukrayna və Qafqazda tətbiq etmək üçün xüsusi hərbi birləşmələr yaratdığını, bu ordunun həm də postsovet məkanında daxili inqilabları zərərəsizləşdirmək məqsədi daşıdğını iddia edir.