Mətbuat yayımı sistemi yox olma həddindədir

 Çap mətbuatının yayımı sahəsində vəziyyət getdikcə pisləşməkdə davam edir, bu, ən çox satılan qəzetlərin redaktorlarını cümə günü “Zerkalo” qəzetinin redaksiyasında toplaşmağa və böhrandan çıxış yollarını müzakirə etməyə vadar edib.

    “Yeni Müsavat” qəzetinin redaktoru Rauf Arifoğlu bildirib ki, Bakının mərkəzi küçələrində yaranan yeni köşklər demək olar ki, qəzet satmır və sərinləşdirici, spirtli içkilərin, siqaret və s. satışı ilə məşğul olur.

    Bazarın ənənəvi inhisarçısı – QASİD firması böhran yaşayır, 150-yə yaxın köşk onun əlindən alınıb. QASİD satılan qəzetlərə görə redaksiyalarla hesablaşa bilmir.

    “QASİD-in bizim qəzetləri satması 5 mindən 2.5 minə qədər azalıb və biz ayda 8 min manat itiririk”, deyə o bildirib.

    Dövri mətbuatı regionlarda yayan “Mətbuat yayım” firmasının da vəziyyəti eynilə belədir. “Metroservis” firması metropoliten stansiyalarında müstəqil qəzetlərin satışını demək olar ki, dayandırıb.

    Yeganə müstəqil yayım firması – “Qaya” Bakıda və Sumqayıtda köşklərini itirməkdə davam edir. O, həmçinin abunə yazılışı ilə qəzet yayımında da ciddi itkilərə məruz qalıb.

    Bu gün bütün abunə yazılışı “Xəzər” firmasının əlində cəmlənib. Firmaya Prezident Administrasiyası ictimai-siyasi şöbəsinin müdiri Əli Həsənov himayə edir. Bəzi məlumatlara görə, demək olar ki, bütün büdcə təşkilatlarını bu firmanın xidmətlərindən istifadə etməyə və əvvəlcədən pul ödəməyə məcbur ediblər. Firmanın abunə yazılışından illik qazancı 8 mln. manata çatıb.

    Satış həcminə görə ikinci qəzet olan “Azadlıq”ın redaktoru Rəhim Hacıbəyli də vəziyyətin pisləşməsindən şikayət edib. O qeyd edib ki, Bakı meriyasının ticarət departamenti küçə ticarətçilərinə “Azadlıq” və “Yeni Müsavat”ı satmağı qadağan edir.

    Azərbaycan adambaşına düşən köşk sayına görə dünyada son yerlərdən birini tutur. Nəcəf Nəcəfov fondunun araşdırmasına görə, inkişaf etmiş ölkələrdə bir köşk 1-2 min oxucuya xidmət edir, Azərbaycanda isə 15000 nəfərə bir köşk düşür.

    Ölkənin 4762 kəndində demək olar ki, qəzet köşkü yoxdur. Ümumilikdə ölkədə 600 köşk və qəzet satışı nöqtəsi var və hər 1 milyon insana cəmi 60 köşk düşür. Rusiyada bu göstərici 333, Amerikada 600, Avropa ölkələrində 1000-1250 təşkil edir.

    Oktyabrda bir sıra KİV rəhbərləri prezident İlham Əliyevə çap mətbuatının yayımında yaranmış vəziyyətlə bağlı məktub göndərilib. Redaktorlar prezidentdən problemlərin həlli məqsədilə müdaxilə etməyi xahiş ediblər, lakin cavab almayıblar.

    “Zerkalo” qəzetinin redaksiyasında bugünki görüşdə Prezident Administrasiyası ictimai-siyasi şöbəsinin müdiri ilə görüşüb problemi müzakirə etmək qərara alınıb. Redaktorlar böhrandan çıxış yolları ilə bağlı baxışlarından ibarət layihə təqdim etməyə hazırdırlar. -0-