MİDA iki uğursuzluğun səbəblərini vətəndaşlara açıqlamaya borcludur

Güzəştli mənzil almaq istəyən doqquz min vətəndaşın dördaylıq ağır mənzil epopeyası başa çatdıqdan sonra Mənzil İnşaatı Dövlət Agentliyi (MİDA) və hökumət əhalinin böyük hissəsinə bu cür əziyyətin verilməsinin səbəblərini açıqlamır. Sentyabrın 5-də bildirilib ki, başqalarından cəld tərpənərək uğurla mənzil seçən vətəndaşların 90%-i Yeni Yasamal massivindəki beş çoxmərtəbəli evdə güzəştli daşınmaz əmlakın sənədləşdirilməsini başa çatdırıb.

2018-ci ilin mayında MİDA-nın onlayn satış portalında uğursuzluq baş verdikdən sonra agentlik açıqlama verdi ki, portal həddindən artıq yüklənmə səbəbindən işləməyib, sistemə giriş zamanı problemlər yaranıb.

Yəni, MİDA-nın proqramçıları güzəştli mənzillərin onlayn satışı başlayan anda portala təxminən nə qədər şəxsin daxil ola biləcəyini bilməyiblər.

"Güzəştli sistem"də baş vermiş yalnışla əlaqədar sistemə düşə bilən 1963 vətəndaşa yalnış bildiriş göndərilib. Onlardan 260-ı mənzil seçimini imzalayıb təsdiqləyə bilib. Texniki problemlərə görə 1703 nəfər prosesi başa çatdıra bilməyib. Mənzil seçimi şərtləri bərabər olmayıb. 07.05.2018 tarixli mənzil seçiminin nəticələri ləğv edilib.

Bazar qiymətindən iki dəfə ucuz qiymətə mənzil alacağını düşünən xoşbəxt ev sahiblərinin sonradan satışın ləğv edilməsi barədə məlumat aldığı zaman keçirdiyi psixoloji stresi təsəvvür etmək çətin deyil. O ərəfədə həmin şəxslər onların güzəştli mənzil almaq haqqının olub-olmadığını yoxlayıblar, "elektron kabinet" açıblar və hərracların açılmasını səbirsizliklə gözləyiblər. Ekranda mənzili kim birinci seçərsə düyməni sıxır və mənzili əldə etmiş olur.

Birinci uğursuzluqdan sonra güzəştli mənzil alanlara təkrar satış vəd edilib. Ancaq 2018-ci il sentyabrın 5-də saat 11:00-da sistem yenidən işləməyib, proqram təminatında nasazlıq yaranıb. Gərginlik yüksək həddə çatıb.

MİDA bildirib ki, satış həmin gün saat 15:00-a keçirilib. Hətta bir sayt məlumat yayıb ki, onlayn satış dekabrın 5-də keçiriləcək. Lakin saat 16:30-da portal 324 mənzilin uğurlu satışı barədə məlumat yayıb.

Hökumət və MİDA xalqın qarşısında hesabat verməyə borcludur. Əvvəla, dövlət portalının işində iki dəfə uğursuzluq baş verib. Halbuki, Nazirlər Habinetinin hesabatlarında qurumun "elektron hökumət" sahəsindəki işi uğurlu kimi təqdim olunur və ölkə prezidenti tərəfindən təqdir edilir. İkincisi, ictimaiyyət "ağır yarışma"nın xoşbəxt qaliblərinin adlarını bilməlidir. Ən əsası isə güzəştli mənzilləri həqiqətən ehtiyacı olan vətəndaşların almasına əmin olmaq lazımdır. Jurnalistlər üçün inşa edilmiş iki yaşayış binasında mənzillərin təmin olunmuş KİV işçiləri, hətta jurnalist olmayanlara paylanması ilə bağlı acı təcrübə MİDA-da da mütləq düzgünlüyə şübhə yaradır.

Güzətşli mənzil almaq istəyənlərin dörd ay ərzindəki durumunu ekspert cəmiyyətindən ancaq "Multimedia" İctimai Birliyinin direktoru Osman Gündüz izləyib. O, vaxtlı-vaxtında öz fikirlərini FB-də yerləşdirib. O.Gündüz hesab edir ki, MİDA öz fəaliyyətilə bağlı ictimaiyyətə səhih məlumat verməlidir və vətəndaşların niyə portala daxil ola bilməməsi və mənzil seçə bilməməsinin səbəblərini açıqlamalıdır. Portalın uzun müddətdir hazırlanmasına baxmayaraq, hansı səbəbdən sentyabrın 5-də yenidən işləməyib? O.Gündüz mənzil satışında saxtakarlığa yol verilməsinə, mənzillərin onu almaq hüququ olmayan şəxslərə satılmasına inanmır. Çünki prosesi üç müxtəlif dövlət qurumunun mütəxəssisləri izləyiblər. Belə nəzarət altında saxtalaşdırma mümkün deyil, ekspert yazıb.

Bununla belə, əgər MİDA tərəfindən açıqlama və hesabat olarsa cəmiyyətdə də qurumun işinin düzgünlüyünə şübhə olmaz.

O.Gündüz MİDA-ya təklif edir ki, müvafiq təşkilatların mütəxəssislərini, müstəqil ekspertləri cəlb etməklə, bu sistemin auditini həyata keçirən xarici şirkətləri dəvət etməklə öz log-fayllarının yoxlanmasına şərait yaratsın. Analizin yekunları rəsmi bəyanat şəklində ictimaiyyətə təqdim olunmalıdır. Xüsusilə bu, güzəştli mənzil almaq hüququ olan doqquz min vətəndaş üçün vacibdir.

O.Gündüz diqqəti ona yönəldir ki, mida.gov.az portalının işində nasazlıq zamanı eGov hökumət portalına giriş, eləcə də elektron imza prosesi sərbəst olub.