Mirqədirovun işi üzrə prosesin qapalı keçirilməsi istintaqın qanunsuzluğunun ictimaiyyətdən gizlədilməsi məqsədi daşıyır (YENİLƏNİB-VIDEO)

Jurnalist Rauf Mirqədirovun içi üzrə məhkəmənin hazırlıq iclası göstərib ki, məhkəmə prosesi açıq keçirmək niyyətində deyil. Bu barədə Turan-a jurnalistin vəkili Fuad Ağayev bildirib.

O, ittiham tərəfinin və məhkəmənin guya dövlət sirrinin qorunması məqsədilə prosesin qapalı keçirilməsi zərurəti haqqında dəlillərini əsassız hesab edir.

Bu işdə məxfilik möhürü ilə qorunan, xüsusilə məxfi məlumatlar, xüsusilə əhəmiyyətli dövlət sirri yoxdur, deyə vəkil bildirib. Onun fikrincə, cinayət işi uydurma ittihama əsaslanır.

Ağayevin fikrincə, qapalı prosesin məqsədi ittiham tərəfin və bəzi MTN əməkdaşlarının Azərbaycanın maraqlarına zidd olan fəaliyyətini gizlətməkdir.

Fuad Ağayevin vəkili həmçinin əlavə şahid kimi guya Mirqədirovu casusluğa cəlb edən Laura Baqdasaryan və David Şahnazaryanın məhkəməyə çağırılması haqqında vəsatət qaldırıb.

Lakin məhkəmə müdafiə tərəfin bu şəxslərin ünvanını göstərməməsi bəhanəsi ilə bu vəsatəti təmin etməyib. Vəkil izah edib ki, 1993-cü il tarixli Minsk konvensiyasına əsasən, tələb göndərilən ölkə tələb olunan şəxslərin ünvanını özü müəyyən etməlidir.

Baqdasaryanın və Şahnazaryanın məhkəməyə çağırılması, müdafiə tərəfin fikrincə, istintaqın hansı əsaslarla onların Mirqədirovu cəlb etdiyini iddia etdiyini aydınlaşdırmaq nöqteyi-nəzərdən zəruridir.

Müdafiə tərəfi həmçinin işin materiallarından bir sıra yolverilməz dəlillərin çıxarılmasını təklif edir. Belə ki, istintaq Samvel adlı Ermənistan vətəndaşının Gürcüstanda yoldan keçən iki azərbaycanlıya hansısa disklər verdiyini iddia edir. Birincisi, disklərdə Mirqədirovu ifşa edən heç nə yoxdur. İkincisi, bu “Samvelin” özünün şəxsiyyəti göstərilmir. Dəlilin mənbəyi göstərilmədən o, səhih hesab oluna bilməz və iş materiallarından çıxarılmalıdır.

Vəkil həmçinin Mirqədirovun səhhətində problemlər olduğunu bildirib.

Müdafiə tərəfin gələcək addımları Mirqədirovla məsləhətləşmələrdən sonra müəyyən ediləcək. -06В-

* * *

Jurnalist Rauf Mirqədirovun işi üzrə məhkəmə prosesi qapalı olacaq. Bu qərar bu gün Ağır Cinayətlər Məhkəməsinin yarıqapalı şəraitdə keçirilən iclasında qəbul edilib.

Turan-a məlum olub ki, prosesdə vəkil Fuad Ağayev bir neçə vəsatət qaldırıb. Xüsusən, vəkil Mirqədirovun müdafiəçisinin yanında oturmasına imkan yaradılması, qətimkan tədbirinin dəyişdirilməsi və Mirqədirovun həbsdən azad edilməsi, cinayət işinə xitam verilməsi, habelə məhkəməyə əlavə şahid kimi Ermənistan vətəndaşı Laura Baqdasaryanın və David Şahnazaryanın dəvət edilməsi haqqında vəsatət verib. (Baqdasaryan Sülh və Demokratiya İnstitutu ilə birlikdə Mirqədirovun da iştirakçısı olduğu sülhməramlı layihələr həyata keçirən QHT-nin rəhbəridir. İstintaq guya Baqdasaryan və Ermənistanın vətəndaş cəmiyyəti fəalı, ölkənin keçmiş təhlükəsizlik naziri David Şahnazaryanın Mirqədirovu Ermənistanın xeyrinə casusluğa cəlb etdiyi haqqında absurd ittiham irəli sürüb).

Vəkil həmçinin iki cilddən ibarət cinayət işi üzrə istintaqın il yarım uzadılmasının əsassız olduğunu qeyd edib. Ağayev eyni zamanda Mirqədirovun Azərbaycan CM-in 10-cu maddəsi (ifadə azadlığı) üzrə hüquqlarının pozulduğunu bildirib.

Prokuror Mübariz Miriyev, onun fikrincə, dövlət sirrinə aid olan məsələlərə baxılması ilə əlaqədar prosesin qapalı rejimdə keçirilməsini istəyib.

Müdafiə tərəfin bütün vəsatətləri təmin edilməyib və məhkəmə prosesi noyabrın 18-nə təyin edilib.

"Zerkalo" qəzetinin baş redaktoru Elçin Şıxlı jurnalistlərə Mirqədirova qarşı cinayət işinin əsassız olduğunu və jurnalistin təqsirsiz olduğunu bildirib.

"Müsavat" Partiyasının rəhbəri Arif Hacılı Mirqədirovu siyasi məhbus adlandırıb.

Xatırladaq ki, Mirqədirov 2014-ci il aprelin 19-da Türkiyədən deportasiya olunduqdan dərhal sonra həbs edilib.

Jurnalistə qarşı CM-in 274-cü (dövlətə xəyanət) ittihamı irəli sürülüb. O, Sülh və Demokratiya İnstitutunun Ermənistanın vətəndaş cəmiyyəti strukturları ilə birgə həyata keçirdiyi layihələrdə iştirak etməkdə və bu tədbirlər çərçivəsində dövlət sirri təşkil edən məlumatları qarşı tərəfə verməkdə ittiham olunur. -16В-

2015 Noyabr 04 (Çərşənbə) 15:27:47

Bakı Ağır Cinayətlər Məhkəməsində Əlisultan Osmanovun sədrliyi ilə Ermənistanın xeyrinə casusluqda ittiham olunan jurnalist Rauf Mirqədirovun işi üzrə hazırlıq iclası başlayıb.

İctimaiyyət və müstəqil KİV nümayəndələri iclasa buraxılmayıb. Yalnız “Azadlıq” qəzetinin müxbiri, bir sıra Qərb səfirliklərinin diplomatları və jurnalistin özünün yaxın qohumları üçün istisna edilib.

Bütün siya proseslərdə olduğu kimi, hakimiyyət zalı Penitensiar Xidmətin işçiləri, məhkəmə icraçıları və digər şəxslərlə doldurub.

Xatırladaq ki, Mirqədirov 2014-ci il aprelin 19-da Türkiyədən deportasiya edildikdən dərhal sonra həbs edilib. Jurnalistə qarşı CM-in 274-cü (dövlətə xəyanət) maddəsi ilə ittiham irəli sürülüb. O, Sülh və Demokratiya İnstitutunun Ermənistan vətədaş cəmiyyəti strukturları ilə birgə layihələrində iştirak etməkdə və bu tədbirlər çərçivəsində dövlət sirri olan məlumatları qarşı tərəfə verməkdə ittiham olunur.

Jurnalist ittihamı təkzib edir. Hüquq müdafiəçiləri onu siyasi məhbus hesab edir. -16В-