M.Qələndərovun ölümü hakimiyyətin siyasətinin qanunauyğun yekunudur

Bakı/03.05.17/Turan: İctimaiyyət nümayəndələri, fəallar və jurnalistlər bu gün, Dünya Mətbuat Azadlığı Günündə aprelin 28-də 1 saylı Kürdəxanı istintaq təcridxanasında müəmmalı şəraitdə dünyasını dəyişən bloger Mehman Qələndərovun məzarını ziyarət ediblər.

Turan agentliyinin direktoru Mehman Əliyev xatırladıb ki, jurnalistlər hər il 2 mart 2005-ci ildə qətlə yetirilmiş Elmar Hüseynovun məzarını ziyarət edirlər.

“Bu gün biz burada, yeni məzarın başında toplaşmışıq. Allah eləməsin ki, daha kiminsə məzarı başına toplaşaq”, deyə o bildirib.

O, Qələndərovun qətlini ölkədə mətbuat və söz azadlığının vəziyyətinin göstəricisi adlandırıb.

O, hesab edir ki, media azadlığı sahəsində durum get-gedə ağırlaşır, mediaya, jurnalistlərə, blogerlərə basqılar artır.

Belə ki, M.Əliyev mayın 2-də “Kanal-13”ün rəhbərinin saxlanmasını və inzibati cəza almasını hakimiyətin müsətqil media mənsublarına mesajı kimi dəyərləndirib.

 Amma söz azadlığının qarşısını almaq cəhdi getdikcə çətinləşir. İnternet-resurslar artır, sosial media, vətəndaş jurnalistikası inkişaf edir. “Bu gün hamı bloger olub, hamı yazı yaza və ya video çəkə və bunu bütün cəmiyyətə çatdra bilir və Mehman Qələndərov belə xalq jurnalistlərindən biri idi.

Hüquq müdafiəçisi Oqtay Gülalıyev xatırladıb ki, bu gün 11 jurnalist və bloger həbsdədir. Bu, Avropada ən yüksək səviyyədir və bu, ölkədə mətbuatın vəziyyətinin göstəricisidir, deyə o bildirib.

Mehman Qələndərovun İstintaq Təcridxanasında ölümünə toxunan Gülalıyev rəsmi versiyaya – intihar versiyasına şübhəsini ifadə edib.

“İşgəncələr nəticəsində ölüm haqqında məlumat yoxlanılmalıdır və bunda təqsirli olanlar nə vaxtsa bu əməllərinə görə cavab verəcəklər”, deyə o bildirib.

Daha sonra Gülalıyev ictimaiyyətə müraciəti oxuyub. http://www.contact.az/ext/news/2017/5/free/politics%20news/az/61935.htm. -06D-