MTN əks-kəşfiyyat şöbəsinin rəhbəri həbsdə insult keçirib

Ləğv edilmiş Milli Təhlükəsizlik Nazirliyinin əks-kəşfiyyat şöbəsinin rəisi,  1 saylı Bakı İstintaq Təcridxanasında həbsdə saxlanılan Mirəziz Əsgərov fevralın 14-də insult və ağır ürək çatışmazlığı ilə Ədliyyə Nazirliyinin Müalicə Müəssisəsinə aparılıb.

Bu barədə Turan agentliyinə vəkil Kamandar Nəsibov fevralın 15-də MTN-in generalı Akif Çovdarov və digər 3 nəfərin cinayət işi üzrə  Sabunçu Rayon Məhkəməsində keçirilən məhkəmə iclasında A.Çovdarovun dediklərinə  istinadən bildirib.

Onun sözlərinə görə, buna qədər M.Əsgərov dəfələrlə müayinə və müalicə tələb edib. Lakin müraciətinə baxılmayıb.

“Akif Çovdarov məhkəməyə onu da Əsgərovun taleyi kimi talenin gözlədiyini bildirdi. Çünki Çovdarov və onun vəkilləri dəfələrlə yazılı  və  şifahi şəkildə müalicə ilə bağlı vəsatətlər və  müraciətlər ediblər. Müraciətlərin heç birinə  indiyədək müsbət cavab verilməyib”, - vəkil qeyd edib.

Onun sözlərinə görə, nə Çovdarovun öz həkimi təcridxanaya buraxılır, nə də  Çovdarov Ədliyyə Nazirliyinin Müalicə  Müəssisəsinə köçürülmür.

“Akif Çovdarovun səhhəti ilıə bağlı yarana biləcək hər hansı  problemə  görə məhkəmə  prosesinə sədrlik edən hakim və Ədliyyə Nazirliyinin Tibb İdarəsi məsuliyyət daşıyır”, - K.Nəsibov qeyd edib.  

2006-cı ildə Almaniyanın “Deustsches Herzzentrum Berlin” Klinikasında Akif Çovdarovun ürəyində şuntlama əməliyyatı keçirilib. Bundan başqa Akif Çovdarov 2011-ci ilin fevralında xərçəng xəstəliyilə bağlı Almaniyanın “Vivantes” Klinikasına müraciət edib və üzərində cərrahiyyə əməliyyatı keçirilib. Həmin ilin mayında Almaniyanın “Vivantes” Klinikasında Akif Çovdarovun üzərində keçirilən digər cərrahiyyə əməliyyatı nəticəsində mədəsi və bütün limfa vəziləri amputasiya olunub.

Akif Çovdarov 2015-ci il noyabrın 15-də həbs olunub. Ona qarşı Cinayət Məcəlləsinin 308.2 (vəzifə səlahiyyətlərindən sui-istifadə, bu məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (rüşvət alma (passiv rüşvətxorluq) təkrar törədildikdə), 311.3.3 (rüşvət alma (passiv rüşvətxorluq) külli miqdarda törədildikdə), 311.3.4 (rüşvət alma (passiv rüşvətxorluq) hədə-qorxu tətbiq olunmaqla törədildikdə) və 145.3-cü (qanunsuz azadlıqdan məhrumetmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddələri ilə cinayət işi açılıb.

Akif Çovdarov 2016-cı ilin oktyabrında kəskin ürək ağrılarından əziyyət çəkdiyini bildirib və müalicə müəssisəsinə köçürülməməsinə etiraz olaraq bir müddət aclıq aksiyası keçirib.-03B- 

Rəy yaz

Cəmiyyət

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti