Müdafiə tərəfi Mehman Hüseynovun işi ilə bağlı Ali Məhkəmənin qərarından razı deyil (YENİLƏNİB)

Bakı/29.09.17/Turan: Müdafiə tərəfi Mehman Hüseynovun işinin apellyasiya instansiyasına qaytarılması barədə Ali Məhkəmənin qərarı ilə razı deyil. Vəkillər hesab edirlər ki, bu qərar onun həbsdə saxlanmasının uzadılmasına yönəlib.

Sentyabrın 29-da Ali Məhkəmədə Əli Seyfəliyevin sədrliyilə M.Hüseynovun kassasiya şikayətinə baxılıb.

Müdafiə tərəfi məhkəməni blogerə bəraət verilməsinə çağırıb. M.Hüseynov prosesdə iştirak etmək istədiyini bildirsə də iştirakı təmin olunmayıb.

Vəkil Fuad Ağayev iclas zamanı bildirib ki, aşağı məhkəmə instansiyaları müdafiə tərəfinin əsas vəsatətlərini təmin etməyiblər.

Onun sözlərinə görə, məhkəmə blogerin saxlandığı yerdə və Nəsimi Polis İdarəsində müşahidə kameralarının qeydlərinə baxış barədə vəsatəti təmin etməyib.

Vəkil xatırladıb ki, M.Hüseynov yanvarın 9-da Bakının mərkəzində Qoqol küçəsində çoxsaylı videokameranın olduğu yerdə mülki şəxslər tərəfindən saxlanılıb. Onun başına torba keçirərək maşına oturdublar və hansı idarəyə aparmaqla bağlı göstəriş alana qədər şəhərdə gəzdiriblər.

Sonra Nəsimi Rayon Polis İdarəsində zorakılıq hərəkətləri davam etdirilib. Mehmanın halı pis olub, təcili yardım maşını çağırılıb. Həkimlər ona yuxu dərmanı vurublar.

Müdafiə tərəfi Nəsimi Rayon Polis İdarəsinin müşahidə kamerasından görüntüləri istəyib. Ancaq bu vəsatət təmin ediməyib.

Sonra vəkil diqqəti ona yönəldib ki, CM-in 147-ci maddəsinə (böhtan) görə, iddiaçı kimi fiziki şəxs çıxış edə bilər. Ancaq Nəsimi Rayon Polis İdarəsinin rəisi Musa Musayev idarənin adından, yəni, hüquqi şəxs kimi çıxış edib, odur ki, iddia qanunsuzdur.

Üstəlik, qanuna zidd olaraq xüsusi ittihamçı özü məhkəməyə gəlməyib.

F.Ağayev bildirib ki, Ali Məhkəmənin düzgün, qanuna uyğun qərarı bəraətverici əsaslarla cinayət işinin dayandırılması və Mehman Hüseynovun azadlığa buraxılması ola bilər.

Digər vəkillər də bunu xahiş ediblər.

Ancaq xüsusi ittihamçının nümayəndəsi Əlirza Əbilov hökmün qüvvədə qalmasını istəyib.

Sonda Ali Məhkəmə işi təkrar baxılmaq üçün Bakı Apellyasiya Məhkəməsinə göndərib.

Bu qərarı şərh edən vəkil Elçin Sadıqov deyib ki, Ali Məhkəmə kassasiya şikayətini qismən təmin edərək M.Hüseynovun hüquqlarının pozulduğunu tanıyıb.

Ancaq ümumilikdə müdafiə tərəfi məhkəmənin qərarı ilə razı deyil. Ali Məhkəmənin bu qərarı M.Hüseynovun həbsdə qalmasının müddətini uzadır. Əgər Ali Məhkəmə şikayəti tam təmin etməsəydi, oktyabrın 3-də cəza müddətinin üçdə bir hissəsinin çəkilməsi ilə əlaqədar müdafiə tərəfi blogerin şərti olaraq vaxtından əvvəl azadlığa buraxılması üçün məhkəməyə müraciət edə bilərdi. Hazırda onun həbsdə qalma müddəti ən azı 30-40 gün uzanır. Çünki qanuna əsasən Ali Məhkəmənin qərarı tərəflərə və Apellyasiya Məhkəməsinə bir ay ərzində göndərilir. -03C06--

* * *

2017 Sentyabr 29 (Cümə) 14:21:09

Ali Məhkəmə Mehman Hüseynovun şikayətini Apellyasiya Məhkəməsinə qaytarıb

Bakı/29.09.17/Turan: Sentyabrın 29-da Azərbaycan Ali Məhkəməsi iki il azadlıqdan məhrum edilmiş (CM-in 147.2-ci maddəsi- ağır cinayətin törədilməsi haqda böhtan) bloger Mehman Hüseynovun kassasiya şikayətini qismən təmin edib. Şikayət Apellyasiya Məhkəməsinə qaytarılıb.

Məlum olduğu kimi, Mehman Hüseynov bu ilin yanvarında saxlandıqdan sonra polisdə ona işgəncə verildiyini bildirmişdi. Buna cavab olaraq Nəsimi Rayon Polis İdarəsinin rəhbəri böhtana görə blogerin cəzalandırılmasını tələb edib.

Mayın 3-də Suraxanı Rayon Məhkəməsi M.Hüseynovu böhtanda təqsirli bilərək iki il azadlıdqan məhrum edib. Bakı Apellyasiya Məhkəməsi hökmdən şikayəti təmin etməyib.

Mayın 15-də Apellyasiya Məhkəməsinin qərarından Ali Məhkəməyə şikayət verilib, ancaq icraata avqustun 22-də qəbul edilib.

M.Hüseynov "Sancaq" onlayn-jurnalda yüksək vəzifəli məmurlar arasında korrupsiya hallarına dair videomaterialların yayılması ilə tanınır.-0-