Müharibə əlilinin ailəsi yerli hakimiyyətin laqeydliyindən şikayətlənir

Bakı/26.12.20/Turan: Yardımlıdan jurnalist Cəmil Zabitov Füzulidə ağır yaralanmış könüllü əsgərin atası Taleh İmanov  ilə söhbətlərinin videoyazısını çəkib Turan-a göndərib. Ailə Yardımlı rayonunun Dağüstü kəndində, köhnə evdə yaşayır. Ailəyə baxan yeganə şəxs Vahid İmanlı olub. O, Bakıda ayda 200-300 manata işləyirdi. Qazandığı pulu kəndə atasına və nənəsinə göndərirdi. Onlar bu pulla yaşayıblar. Cəmilin sözlərinə görə, Yardımlıda iş yoxdur. Yardımlıda adamlar ev heyvanlarından və bağdan əldə etdikləri vəsait hesabına yaşayırlar.

27 sentyabr 2020-ci ildə Qarabağ uğrunda Vətən Müharibəsi başlayıb və Vahid İmanlı cəbhəyə gedib. Onu hərəkətsiz halda cəbhədən gətirib hospitala yerləşdiriblər. Erməni gülləsi sağ tərəfindən keçib onurğasını zədələyib. Döyüşçü yataq vəziyyətindədir, bədənini həərkət etdirə bilmir. Bakı Hərbi Hospitalında müalicə olunur. Onun tam sağalma perspektivləri məlum deyil. Videogörüntülərdən birində Vahid yerli hakimiyyətə müraciət edərək hazırda tamamilə vəsaitsiz qalan atasına və nənəsinə kömək etməyi xahiş edir.

Yaralının atası Taleh də müraciət edir. Videoyazıda o, oğlunu pulsuz müalicə etdiyinə, dövlətin isə Qarabağı azad etdiyinə görə Azərbaycan prezidentinə və hökumətinə təşəkkür edir. Mərkəzi hakimiyyətə iddiası yoxdur. Amma Taleh İmanov Yardımlı Rayon İcra Hakimiyyətindən narazıdır. Deyir ki, üç dəfə Bakıya oğlunun yanına gedib, yol pulunu kənd camaatından borc alıb. Borcunu qaytarmağa heç nəyi yoxdur. O, yerli icra hakimiyyətinə yardımla bağlı ərizə ilə müraciət edib, ona 300 manat veriblər, vəssalam.

Nənəsi müharibə veteranıdır, 130 manat pensiya alır, ailənin qazancı yoxdur, evin oğlu da indi müharibə əlilidir. İmanovlar özlərini tərk edilmiş hiss edirlər, deyirlər ki, Yardımlı rayon rəhbərliyi onlarla maraqlanmır. Taleh Hərbi Komissarlığa şikayət etməyə getdiyində, orada ona etiraz ediblər ki, rayonda 500 belə yaralı var, onların hamısına necə kömək etmək olar?

Yardımlı Rayon İcra Hakimiyyətinin rəsmi İnternet saytında müharibə əlillərinə, şəhid ailələrinə dövlət yardımı haqqında qanundan çıxarışlar yerləşdirilib. Qeydiyyata alınmaq üçün lazım olan sənədlər göstərilib, birdəfəlik və aylıq ödənişlərin və pensiyaların məbləği bildirilib. Dövlət müharibə əlillərini avtomobillərlə pulsuz təmin etmək və yaşayış şəraitini yaxşılaşdırmaq öhdəliyini öz üzərinə götürüb.

Ödəmələr, avtomobillər və mənzillər gələcəkdə veriləcək, necə ki, 1992-1994-cü illər Qarabağ Müharibəsi əlilləri bu yardımı almışdılar. Son müharibə əlillərinin ailələrinə isə indi yaşamaq üçün pul lazımdır. Apteklərdə dərmanların qiyməti 500 manata qədər artıb, bəzi ailələr koronavirusa yoluxub. Dərman müalicəsi olmadan kovid xəstələri ölür. Əgər ər və oğullar müharibədən əlil vəziyyətdə qayıdıblarsa, müalicələri başa çatmayıbsa onlar yaşamaq və dərman almaq üçün bu qədər vəsaiti haradan alsınlar?

Turan Yardımlı Rayon İcra Hakimiyyətinin Ərazi İdarəsinin müdiri Şücayət İbişovla əlaqə saxlayıb. O, İmanovlar ailəsini tanıyıt, yaralı döyüşçü və onun atası ilə telefon əlaqəsi saxlayır. İH bir dəfə ataya 300 manat yardım edib və yenə verməyə hazırdır, ancaq Talehə ərizə ilə müraciət etməlidir”, - S.İbişov bildirib. Hava yaxşılaşanda yerli hakimiyyət ailənin şikayətini təmin edəcək və evin yaxınlığında yeni elektrik dirəyi quraşdıracaq, köhnəni götürəcək.

"Rayon İcra Hakimiyyəti icra başçısının göstərişini yerinə yetirərək Yardımlıda 110 nəfər müharibə əlilinin hamısının maddi vəziyyətini nəzarətdə saxlayır. Rayon hakimiyyətinin büdcəsindən vəsait ayıraraq bu ailələrə maliyyə baxımından yardım edirik. Əhali ilə iş davam etdiriləcək. İmkan daxilində sakinlərin şikayətləri təmin olunur", - o, Turan-a bildirib.

Məlumdur ki, dövlət bu kateqoriyadan olan vətəndaşlara təcili və mühüm yardım edilməsi ilə bağlı qayğı göstərməlidir. Müharibə iştirakçıları arasında demək olar ki, varlılar yoxdur, demək olar ki, hamı yoxsuldur. İndi üstəlik qazanmaq qabiliyyətini də itirdilər. Onlar qanunvericilikdə sadalanan ödənişləri gözləyənə qədər qalib ölkədə bir şəkildə yaşamalıdırlar. –0—