Müxalif güclər azad prezident seçkiləri üçün geniş hərəkat yaratmaq qərarına gəlib

Naxçıvan ziyalıları şənbə günü İctimai Palata, Siyasi Partiyaların Məşvərət Məclisi üzvlərinin, hüquq müdafiə təşkilatlarının iştirakı ilə Naxçıvanda ictimai-siyasi vəziyyət barədə dinləmələr keçirib.

Məşhur siyasi xadim İbrahim İbrahimli muxtar respublikadakı vəziyyətin təkcə siyasi partiyalar və QHT-lər üçün yox, bütün əhali üçün mürəkkəb və ağır olduğunu deyib. O bildirib ki, son vaxtlar vətəndaş cəmiyyəti fəalları, jurnalistlər və biznesmenlərə qarşı yeni təqib dalğası başlayıb.

2011-ci ilin sentyabrında Naxçıvan sakini Turac Zeynalovun yerli MTN-də öldürülməsi, xüsusi xidmət orqanlarının onun ailəsini təqib etməsi onu göstərir ki, bu qurum cinayətkar təşkilata çevrilib, deyə İbrahimli qeyd edib.

Bununla birgə, onun sözlərinə görə, repressiyalara baxmayaraq, İctimai Palatanın yerli şöbəsinin üzvlərinin sayı artır, müntəzəm iclaslar keçirilir.

O həmçinin qeyd edib ki, Naxçıvanda QHT-lərə və Demokratiyanın İnkişafına Yardım Regional Mərkəzinin yaradılması vacibdir. Bu qurum vətəndaşların hüquqlarının müdafiəsi və vətəndaş cəmiyyətinin inkişafı üçün çox iş görür.

Naxçıvanda vəziyyət mövzusu 2013-cü ildəki prezident seçkiləri işığında bütün ölkədəki vəziyyəti müzakirə üçün təkan verib. Çıxışların çoxunda azad, demokartik seçkilər uğrunda geniş ictimai hərəkatın yaradılması fikri nəqərat kimi səslənib. Bu, vətəndaş cəmiyyətində yeni vəziyyətdir, əvvəlki illərdə siyasi güclər seçki məsələsində vahid fikrə gələ bilmirdilər. Adətən, vahid namizəd məsələsi bütün siyasi və ictimai qrupların birləşməsinə əngəl olurdu.

Açıq Cəmiyyət Partiyasının sədri Sülhəddin Əkbər məlumat verib ki, yaxın vaxtlarda siyasi partiya və ictimai təşkilatların Azərbaycanda azad və ədalətli prezident seçkilərin keçirilməsi üçün birgə sənəd imzalaması planlaşdırılır.

Məlumdur ki, müxalifət partiyaları artıq beynəlxalq standartlara uyğun seçki keçirilməsi üçün seçki qanunvericiliyinin dəyişdirilməsi üzrə qanunvericilik təşəbbüsü paketi hazırlayıblar.  

Naxçıvan ziyalılarının təşəbbüsü ilə müxalif güclərin şənbə günü keçirilən iclası demokratik güclərin prezident seçkilərində qələbəyə nail olmaq üçün rejimlə mübarizə və bütün ictimai gücləri birləşdirmək əzmini göstərib.—0—